Cabugao, Ilocos Sur - Iti pannaki-amad ti Web In-Action idi Hulio 10, 2013, imbatad ni Dr. Bernardino P. de Gracia III, Medical Officer III a naisaad a Doktor ken destino iti Rural Health Unit (RHU)-Cabugao a kalikagumanna a maaksionan a daras ti pakaseknan ita ti sapasap maipapan iti panagraira ti lamok a makadangran a dengue ken dadduma pay a pakaseknan ti salun-at dagiti umili ti Cabugao.
Babaen iti direktiba ni Mayor Edgardo “Ediboy” S. Cobangbang, Jr. iti pannakataming iti salaknib dagiti ubbing ken umili kadaytoy a sakit, kinasarita ni Dr. De Gracia ti amin a Medical Personnel iti RHU-Cabugao nga ukkonenda ti rekord dagiti biktima ken pasiente ti “dengue” uray iti barangay tapno mairaman iti pakabuklan ti tignay-medikal a maigannuat ken ti pannakapaadda dagiti nasken a ramit ken apparatus iti panangdeterminar kadaytoy a sakit. Innayon ni Dr. De Gracia a babaen iti pannakaasikaso ti masakit iti dengue ket saanen a maipannuray pay laeng a maipan kadagiti ospital nga addaan iti mayataday a ramit iti ruar ti ili.
Iti kasta, madagdagus a maagasan ken mataripato ti masakit. Insupusop ni Dr. De Gracia nga aramidenda dagiti information initiatives kontra iti dengue. Panagdaldalus ti aglawlaw ken iti pagtaengan, panangipakbo dagiti nagurnongan ti danum ken madalusan dagiti nasamek a disso a posible a pagyanan ti lamok ti kaskenan a maaramid ita. Sumarsaruno ti defogging a mausar a pangkontra ti makadangran a lamok.
Dagitoy nga aksion ken inisiatiba ket gubuay ti nasamay a programa iti pananglapped ti panagsaknap ti nadakamat a sakit babaen iti panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno masalbar dagiti umili nangruna dagiti ubbing iti pannakakagat ti agdangran a lamok. # (Web In-Action)
No comments:
Post a Comment