Cabugao, Ilocos Sur – Kaaduan dagiti DA-LGU Personnel nga idauluan ni Municipal Agriculturist Zenaida S. Andrada ti nagturong iti Brgy. Reppa-ac, Cabugao, Ilocos Sur idi Hulio 11, 2013 tapno idanonda ti adal ti baro a teknolohia a sinaguday ti proyekto a nagbuligan nga ipatungpal ti DA-RFU 1, San Fernando City, La Union nga idauluan da DA Regional Executive Director Dr. Valentino Perdido, Ph. D. ken ni Mayor Edgardo “Ediboy” S. Cobangbang, Jr. ti LGU-Cabugao.
Maaw-awagan pay daytoy a 15 ektaria a masakupan ti proyekto iti “rice fallow technology” (kaaduan a saanen a masunotan a mamulaan iti main crop, Nobiembre-Mayo) ket mamaksimisa ti pannakatalon daytoy a disso ti daga tapno maprobitsar dagiti mannalon babaen iti tulong dagiti nadakamat nga Ahensia.
Kalpasan a maited dagiti supplies a maaramat iti panagadalda kas iti notebook ken ballpen, naaramat ti manila paper a nakailanadan dagiti maadal (visual aid) tapno maikintal iti isip ti learner ti masursurona.
Mapunganay ti addang iti panagtalon base iti baro a wagas. Naglektiur dagiti dua a Trainors a da Mr. Obas Bill Y. Baclig ken ni Miss Kathryn Tapuro. Nag-back up met da Mr. Nereo S. Daproza ken ni Mr. Robert S. Savella. Detalyado a pamay-an ti pannakaiparang ti maadal iti umuna a maaramid iti panagtalon.
Kabayatanna, nasalun-at met ti panagtan-ay ti naibunubon a mairaep iti Learning Field iti proyekto. Manamnama a mairaep ita a bulan ket ditoyto ti aktual a pagobserbaran dagiti agad-adal ket mapasamakto ti group dynamics a pagsisinnukatan iti kapanunotan iti Learning Center ti proyekto a maaramid ditoy Rang-ay ti Away Building ti barangay a pagbasbasaanda.
Dagitoy a wagas ti panangipaagsep ti kaipapanan ti baro a takuat ti panagtalon ket gubuay iti di agsarday a panangilunglungalong ti Gobierno Munisipal nga idauluan ni Mayor Ediboy tapno maedukaran dagiti mannalon iti umisu a panangigannuat ken alubogen ti panagtalon ket ngumato ti maapit ken masapulanda ditoy a deppaar ti ili. # (Web In-Action)
No comments:
Post a Comment