Cabugao, Ilocos Sur – Agtultuloy ita a mapappapintas ti inaladan ken iti uneg ti Cabugao North Central School babaen iti panangidaulo ni Mrs. Estrellita M. Siruno, Principal II.Kanaig daytoy, naballigi a naiwayat sakbayna ti Brigada Eskwela 2014 ken ti Oplan Balik Eskwela 2014 iti nasao a pagadalan sakbay ti panagseserrek ti klase idi Hunio 2, 2014. Kangrunaan pay a natarimaan dagiti nagobra ket dagiti Comfort Rooms, siled-pagadalan ken iti pannakasimpa dagiti dadduma a pasilidad iti compound ti pagadalan babaen kadagiti nagannak ken mangisursuro.
Kangrunaan a nagapuanan ita ti pagadalan iti napintas a panagbinnulig ti eskuela ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. iti pannakaipasdek iti baro ken kabukbukodanda nga School Stage ken iti Multi-purpose Building a naisaad iti uneg ti pageskuelaanda.Dagitoy a panagballigi dagiti maiwaywayat nga aktibidades ken proyekto ket gubuay ti napintas a panagbinnadang dagiti mangisursuro, nagannak ken iti suporta ti LGU iti daytoy a pagadalan iti Poblasion. # (Web In-Action)
No comments:
Post a Comment