Cabugao, Ilocos Sur – Agmakatawenen manipud nai-award ti 10 a Fish Trap kadagiti kameng ti Western Salomague Fisherman’s Association nga idauluan ni Mr. Magno Carbonel, Presidente.
Daytoy a ramit ket maikabil iti 25 a kadapan ti kaadalemna iti baybay ket potensial nga alaenna dagiti dadakkel nga ikan a kas iti salmon, tanggige ken Lapu-lapu.
Naiyallawat idi dagitoy a ramit kadagiti mangngalap babaen kadagiti kameng ti BFAR nga inimatangan da Municipal Fisheries Program Coordinator Milagros R. Paz, SB Member Benedicto M. Savellano, Committee Chair on Agriculture and Fisheries ken Opisiales ti Barangay Salomague idi Hunio 13, 2013 iti Brgy. Salomague, Cabugao, llocos Sur.
Segun ken ni Mrs. Milagros R. Paz, Municipal Fisheries Coordinator nga immuna a naipakat ti lima a Fish Trap ket sumarsaruno dagiti nabatbati a bilang iti kabaybayan ti Barangay Salomague.
Ti Western Salomague FA ket addaan ti 30 a kameng iti agdama ken idadauluan ni Mr. Magno Carbonel, Presidente.
Daytoy nga aksion ken inisiatiba ket gubuay ti panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangtulong kadagiti mangngalap babaen iti pannakailungalong kadagiti proyekto iti BFAR a mangited ti pagsayaatan dagiti mangngalap iti ili ti Cabugao, Ilocos Sur. # (Web In-Action)
No comments:
Post a Comment