Cabugao, Ilocos Sur – Segun ken ni Engr. Nestor B. Somera, Waterworks Superintendent ti LGU-Cabugao, nakasagana dagiti kangrunaan a mausar pang-emerhensia no dumteng iti kalamidad. Dagitoy a ramit ken epektos ket naidepositoda iti Operation Center ti Municipal Disaster Risk Reduction Management Council (MDRRMC) a masarakan iti Munisipio.
Innayon ni Engr. Somera a maibilbilang met a parte ti pannakadidigra iti panagkurang ti suplay a mausar a danum iti pagtaengan isu nga ikagkagumaananda ken dagiti kakaduana a mamantener ti napintas a pannakaibunong ti adda a suplay ti danum para iti sapasap.
Kanaig daytoy, naaramid ti pannakamonitor ken pannaka-clearing ti koneksion ti danum iti Roma-Kinalian Water Sources a kabinnadang ti Magarang Springs a mangsustener ti suplay ti danum para kadagiti umili iti agdama.
Insupusop pay ni Engr. Somera a nakasagana pay ti puersa ti MDRRMC kasta met dagiti lugan para iti mobilisasion ken Hotlines Numbers a mabalin a kontaken no ingkaso nga adda mapasamak a kalamidad iti ikub ti Munisipalidad. # (Web In-Action)
No comments:
Post a Comment