Cabugao, Ilocos Sur –Sumagmamano a bulan ti napalabas manipud nai-award ti 5 a Payao Project kadagiti kameng ti Fishermen Association iti Brgy. Namruangan, Cabugao, Ilocos Sur nga idauluan ni Brgy. Captain Robertson R. Gorospe.
Dagitoy ket naipakatdan iti baybay ket pagnumnumaranen dagiti Benepisiario a mangngalap iti kita wenno produksion dagitoy a proyekto nga impaay ni Governor Ryan Luis V. Singson babaen iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.
Segun ken ni Mrs. Milagros R. Paz, Municipal Fisheries Coordinator ket madama a kakokoordinarna dagiti asosasion ti mangngalap iti Barangay Namruangan iti pakaseknan iti pagdurdur-asan ti Payao Project nga inasistiran ti LGU-Cabugao iti pannakaited kadakuada daytoy a proyekto manipud iti Gobierno Probinsial.
Daytoy a pagimbagan ket nagubuay babaen iti panangikalikagum ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangtulong kadagiti mangngalap babaen iti pannakailungalong dagiti proyekto a maited kadakuada manipud iti Gobierno Probinsial para iti agtultuloy a pagsayaatan dagiti mangngalap iti ili ti Cabugao, Ilocos Sur. # (Web In-Action)
No comments:
Post a Comment