Friday, June 13, 2014

CLEAN AND GREEN TI BRGY. RIZAL, AGTULTULOY

Cabugao, Ilocos Sur – Nakikaysa ti Barangay Rizal iti liderato ni ABC President ken Brgy. Captain Thaddeus “Teddy” U. Soller iti pannakaselebrar ti 116th Philippine Independence Day iti LGU-Cabugao ken  iti intero a pagilian iti aldaw ti Hunio 12, 2014.

Naangay pay ti Tree Planting Activity-da  iti Parke ti Barangay iti daya nga amianan ti Osmena Bridge ket ninayonanda dagiti mulmula ditoy malaksid kadagiti dadakkel a pinuon ti akasia a mangipapaay ti linong no panawen ti kalgaw. 


Segun ken ni Barangay Secretary Rodrigo Abad a malaksid iti panagmulada iti kayo ket maitultuloy latta nga aramidenda iti panagdalus iti masakupan ti barangay iti sirok ti rangtay iti asideg ti Karayan Cabugao kasta met kadagiti kalsada ken nagkurusan iti lugarda. 

Iti maang-angay a panagdalus ken panagmulada iti aldaw ti Sabado ket mismo a dagiti Opisiales ti Barangay ti mangidaulo kadagiti kakaduada a pannakabagi ti Sektor a mangigangannuat kadaytoy a panagmula ken panagdalusda.
Malaksid kadagiti naruay nga impraestruktura a naileppasen a kas iti kabarbaro a pasdek ti Barangay Hall, pannakaaramid dagiti Covered Canal, ipampamaysada latta met ti makikammayet iti programa ti Environmental Protection and Management iti Munisipio ti Cabugao  partikular iti napintas a pannakaannurot  ti Solid Waste Management Program kas iti pannakamantener ti Material Recovery Facility (MRF) ken ti Barangay Nursery. # (Web In-Action)

No comments:

Post a Comment