Cabugao, Ilocos Sur – Naaramid ti panagselebrar dagiti kameng ti Cabugao Federated Senior Citizens Association maipapan iti Elderly Filipino Week Celebration iti Oktubre 11, 2016 babaen iti Tema: “Pagmamahal at Respeto ng Nakababata Nagpapaligaya sa Nakatatanda” iti Cabugao Cultural and Sports Complex, Brgy. Rizal, Cabugao, Ilocos Sur.
Immuna a naangay ti Nasantuan a Misa iti St. Mark the Evangelist Parish Church. Naaramid ti Fun Walk sa naangay ti salu-salo ket sinagrapda dagiti naisagana a napagsasanguan dagiti Senior Citizen.
Kalpasanna, narugian ti programa iti Sports Complex. Indauluan ni Dr. Romeo Pira, Spiritual Adviser ti Invocation.
Panglukat a sarita ti impaay ni MSWD Officer Mrs. Lydia S. Gazmen ken nagsarita ni Former Judge Efren S. Ubungen. Imbinglayna dagiti napintas a padasna ken kinaritna dagiti padana a nataengan iti panangipakitada iti pannakidanggayda iti Gobierno a mangpasayaat ti kasasaadda a nataengan.
Naiballaet ti SC Presentation babaen iti pannakaipabuya ti Folk Dance babaen kadagiti babbai a kameng ti Senior Citizens.
Nagsarita ni Provincial Social Welfare Officer Ferdinand R. Concepcion a naawis a sangaili ti selebrasion. Kimmablaaw ken nagyaman iti sapasap ket kunana a taginayonen dagiti Senior Citizens ti napintas a timpuyogda tapno umad-adu ti bendision a masagrapda. Bininsana dagiti kangrunaan nga ipatungpal ti Gobierno pakaseknan iti pannakapasayaat ti biag dagiti nataengan nga agtawen iti 60 nga agpangato.
Innayon ti Opisial a maangay ti Regional Convention ti Senior Citizen inton Oktubre 26-28, 2016 a ditoyto a maited ti P100,000 a premio dagiti living centenarian a Senior Citizen.
Iti Welcome Talk, kimmablaaw ken nagyaman ni Mr. Bonifacio Somera, Presidente, ket inawisna ti amin nga umili a mangimatang iti naregget a pannakipaset dagiti nataengan iti kagimongan babaen kadaytoy a selebrasion.
Iti Mensahe ni Mayor Josh Edward S. Cobangbang, kimmablaaw ken nagyaman iti pannakaaramid daytoy a programa a mangpalag-an ti rikna dagiti nataengan. Bininsa ti Alkalde iti pateg ti panagrinnespeto dagiti nataengan ken dagiti appoda. Innayonna a maited koma iti agtultuloy a pammateg kadagiti nataengan babaen iti umisu a pannaripato ken panangdayaw kadakuada.
Kabayatanna, indauluan ni Mayor Josh Edward dagiti Opisiales a nangiyawat dagiti sagut iti dua a Centenarian nga isuda Ms. Marina Saturno iti Barangay Bonifacio ken ni Ms. Florentina Salazar ti Barangay Salomague babaen iti pannakaited kadakuada iti saggaysada a kabarbaro a wheelchair ken sertipiko ti pammigbig.Timmulong da MSWD Officer Mrs. Lydia S. Gazmen ken ni OSCA Head Remigio Sunico a nangiyawat kadagitoy a naited a sagut ti LGU-Cabugao.
Kalpasan ti Intermission Number (Duet) dagiti Senior Citizen ti Barangay Rizal, nagsarita met da Vice Mayor DJ Savellano ken ni SBM Atty. Bryan Jett S. Pano, Committee Chairman on Social Services. Kinablaawanda dagiti Senior Citizens agraman dagiti amin a nagatendar iti nadakamat a selebrasion.
Pangserra a balikas ti inakem ni Mrs. Constancia Sonido, Vice President ti Federated Senior Citizens ti ili a Cabugao. Nagyaman iti sapasap iti naballigi a panagselebrar dagiti nataengan ditoy nga ili. # (Web In-Action)
No comments:
Post a Comment