Tumultulong dagiti mannurat nga Ilokano a mangpreserba ken mangital-o ti pagsasao nga “Ilokano” tapno mataginayon ken agrangpaya daytoy para kadagiti sumaruno a kaputotan.
Daytoy ti inwaragawag ni Danilo Bautista, agdama a direktor ti “Gunglo Dagiti Mannurat nga Ilokano” iti Filipinas (GUMIL- Filipinas), kabayatan ti naangay nga “Ilocano Orthography Seminar-Workshop” a naaramid iti Guestel Conference Room iti University of Northern Philippines (UNP) idi Oktobre 6 nga inesponsoran ti “Center for Ilocano Studies” iti unibersidad.
Kinuna ni Bautista a napateg ti akem ti GUMIL nga addaan iti nadumaduma a sanga iti pagilian ken ballasiw taaw a kas iti Ilocos Sur, Ilocos Norte, La Union, Pangasinan, Cagayan, Isabela, Metro Manila, Nueva Ecija, Abra, Ifugao, Cordillera ken Metro Manila pakairamanan pay iti Hawaii ken California iti USA.
Kinunana a maisaysayangkat dagiti “seminar- workshop” iti panagsurat iti daniw, ababa a sarita, drama ken nobela tapno mapreserba ti Literatura – Ilokana.
Kiniddaw ni Bautista kadagiti kameng ti media, estudiante iti “Mass Communication” ken “Journalism,” ken dagiti mangisursuro iti “K to 12 Program” a timmabuno iti nasao a seminar a tumulongda para iti panakapreserba ken panangitandudo ti pagsasao nga Ilokano a maaw-awagan pay iti “Mother Tongue” tapno agtultuloy a ma-aramat daytoy a pagsasao iti radio, telebision ken diario, ken dagiti pagadalan.
Kinuna met ni Eliseo Contillo, nag-editor ti Bannawag Magazine ken agdama a manarawidwid ti GUMIL- Filipinas, napateg unay ti panakaisayangkat ti seminar maipanggep iti panagsurat ti lenguahe nga Ilokano gapu ta adu dagiti kameng ti media aglalo iti radio ti saanda pay laeng nga ammo dagiti annuruten iti Ortograpia ti Ilocano.
Kinuna pay ni Contillo a timmulong ti GUMIL- Filipinas ken dagiti editorial staff iti Bannawag nga indauluan ni Cles Rambaud iti pannakaisagana ti libro a Tarabay maipapan iti umiso nga Ortograpia ti Ilokano a pagbasaran iti panangisuro ken panagsurat ti pagsasao nga Ilokano.
Kinuna met ni Dr. Remigio Obrero, agdama a direktor ti Center for Ilocano Studies iti UNP, a nabuangay ti GUMIL- UNP Chapter a pagkamengan dagiti mannurat nga estudiante tapno katulongan ti GUMIL- Filipinas kadagiti gannuatna a mangparang-ay ken mang-preserba ti Literatura - Ilokana. # Source - (FGL/Ben P. Pacris- PIA-1/ Ilocos Sur)
No comments:
Post a Comment