Cabugao, Ilocos Sur – Kalpasan ti Flag Raising Ceremony ti Pamilia-LGU iti Oktubre 3, 2016, pinadayawan ti Local Government Unit (LGU)-Cabugao, Ilocos Sur babaen iti Resolusion No. 58, Series of 2016 a pinanday ti Sangguniang Bayan idi Setiembre 26, 2016 iti nadakamat nga ili para kadagiti Mangisursuro iti nadumaduma a benneg wenno tukad ti Edukasion iti Publiko ken Pribado (Elementaria, Sekundaria) iti ili a Cabugao, Ilocos Sur.
Daytoy a Resolusion ket pinutar ni SBM Atty. Bryan Jett S. Pano ken pinagkaykaysaan dagiti kameng ti Konseho Munisipal babaen iti panangidaulo ni Temporary Presiding Officer SBM Danilo Q. Gazmen ken inaprobaran ni Mayor Josh Edward S. Cobangbang kalpasanna.
Linaon ti Resolution No. 58 ti panangbigbig ti Konseho Munisipal iti akem ken sakripisio dagiti Teachers a mangmulmuli kadagiti ubbing ken agtutubo para iti masanguanan a pagsayaatan ti Munisipalidad ti Cabugao. Mainaig daytoy a pammadayaw iti pannakaselebrar ti National Teachers Month (Setiembre 5-Oktubre 5, 2016) babaen iti Tema: “Guro, Kabalikat sa Pagbabago” manipud iti mandato ti Presidential Proclamation 242-2011 ken ti RA No. 10743-2016 a mangideklarar ti Oktubre 5 a “National Teachers’ Day”
Saggaysa a napan inawat dagiti pannakabagi dagitoy a tukad/pagadalan kas iti sumaganad: Elementary Level, DepED Cabugao babaen kada Public Schools District Supervisor Dr. Consesa T. Rumias, Ed. D. a kinadua ni Mrs. Estrellita M. Siruno, Principal II, Cabugao North CS; Miss Maria S. Rondon, Principal, Cabugao Institute; Ms. Velma Repollo, Pangulo ti Pug-os National High School; Mrs. Felipa B. Asuncion, Pangulo ti Cabugao National High School; Mr. Ma. Chito Agbulos, Pangulo ti Lipit NHS; Mr. Roger Dacanay, Pangulo ti Sisim NHS; Pannakabagi ti UCCP-Preschool ken Sacred Heart of Jesus Pre-school; Mr. Rudy Ilar, Day Care Worker ken Presidente ti Federated Day Care Workers ti ili a Cabugao kasta metten iti benneg dagiti Retired Teachers nga ibagian ni Mr. Remigio Sunico, Retired District Supervisor ti ili a Cabugao.
Nangipaay ti Mensahe ni SBM Pano ket bininsana ti pateg ti sakripisio dagiti mangisursuro a manghulma kadagiti ubbing ken agtutubo ket katulongan ida dagiti nagannak ken ti Gobierno Munisipal a mangpaprogreso pay ti ili a Cabugao.
Kabayatanna, naiyam-ammo ti panagserbisio ti kabarbaro a Doktor iti RHU-Cabugao babaen ken ni Mrs. Janet Sison, Public Health Nurse kasta metten a naipakaammo dagiti LGU Official and Employees nga agkasangay iti bulan ti Oktubre 2016. Kinantaan ida ti Pamilia-LGU a pangparagsak iti panagkasangayda. # (Web In-Action)
No comments:
Post a Comment