Monday, September 4, 2017

DENTAL CHECK-UP, MAAR-ARAMID KADAGITI DAY CARE PUPIL

Cabugao, Ilocos Sur – Maar-aramid manen ti Dental Check-up kadagiti Day Care Pupils iti intero a Munisipalidad ti Cabugao nangrugi idi  Agosto 29, 2017 iti Cecilia T. Flores Memorial Dental Clinic, Cabugao, Ilocos Sur. 

Imbatad ni Mrs. Lydia S. Gazmen, MSWD Officer a babaen iti koordinasion ti MSWDO ken kadagiti Dodoktor ti Dental Clinic ket mayeskediul ti papan dagiti ubbing iti tunggal Day Care Center (DCC) nga agpaamiris iti ngipenda iti nasao a dental clinic.


Umuna nga agpa-Dental Check-up dagiti Day Care Pupils ti Barangay ket tarabayen ida ti Day Care Teacher-da ken kasta metten  ken ni Dr. Anastacia De Los Reyes, DMD agraman dagiti kameng ti Staff iti nasao a dental clinic.

Kabayatanna, naikkan dagiti ubbing iti libre a toothpaste ken toothbrush a kas pangtulong kadakuada ti Gobierno Lokal nga idauluan ni Mayor Josh Edward S. Cobangbang.

Dagitoy nga aksion ken inisiatiba ket gubuay iti napintas a koordinasion ti DOH, Provincial Health Office ken iti LGU Cabugao nga idauluan ni Mayor Josh Edward S. Cobangbang tapno mamantener ti dental a salun-at dagiti umili a maysa a kapatgan nga aspeto iti salun-at nga  agtultuloy a matagiben. # (Web In-Action) 

No comments:

Post a Comment