Cabugao, Ilocos Sur – Naangay ti miting dagiti kameng ti Local Development Council (LDC) iti ili a Cabugao, Ilocos Sur idi Oktubre 10, 2019 iti Cabugao Tobacco Farmers Hall a nakabuklan dagiti nagatendar ket dagiti Kapitanes ti Barangay; Department Heads; NGOs; Federated RIC ken kasta metten iti pannakabagi ti dadduma a sektor.
Nag-Preside ditoy a miting ni Mayor Edgardo “Ediboy” S. Cobangbang, Jr. ket nangipaay met ti mensahena para iti sapasap pakaseknan iti mabukel ken panagballigi dagiti maiplano a pagsayaatan dagiti umili. Timmulong da MPDC Florante S. Jara; SBM Danny Q. Gazmen ken ni ABC President Thaddeus “Teddy” U. Soller a nangtarawidwid iti miting ti LDC.
Nagatendar met ni Amado B. Naval, pannakabagi ti Congressional Office ti Umuna a Distrito.
Kalpasan ti panglukat a kararag, linuktan ni MPDC Florante S. Jara ti miting babaen iti panangibinsana ti akem ti LDC iti pannakaiplano dagiti mapunduan a proyekto ken aktibidades a pagsayaatan ti sapasap.
Nagreport dagiti pannakabagi ti Office/Department ti LGU kadagiti nairingpas ken madama a proyekto. Nairagpin ditoy dagiti Prioridad a Programa/Proyekto ken Aktibidades para iti CY 2020 Annual Investment Program ken Local Investment Development Program (term-based plan).
Dagiti Departamento/Sektor a kangrunaan a nagreport ket iti Engineering Office; Farmers/Fisheries Sector; Health Services; ken Solid Waste Management Program ti LGU.
Naaramid met ti panagsarita ni Amado B. Naval, Representative ti Congressional Office ni Cong. DV Savellano. Imbagana a maidalan iti Resolusion dagiti kiddaw a maiturong iti Congressional Office.
Nagsarita ni ABC President Thaddeus “Teddy” U. Soller. Kunana nga agtultuloy a maaksionan dagiti kalikagum ti nadumaduma a sektor ket kasapulan koma ngarud ti “Teamwork” a kayatna a sawen nga adda koma koordinasion iti nagbaetan ti Munisipio ken kadagiti Ahensia wenno Opisina nga agited ti proyekto iti ken kasta metten dagiti agkiddaw ken pakaituronganna ti resolusion ken maammuan koma met ti Munisipio dagitoy tapno maliklikan iti “overlapping” iti panagipundo ti proyekto nga addan napasamak a kastoy ket imbes a mangpadaras iti pannakaileppas ti proyekto ket mangibayag iti pannakairingpasna.
Naaramid ti Open Forum. Lima a Kapitanes ti nangipeksa iti tunggal pakaseknanda kadagiti kalikagumda a proyekto iti barangay ken imbagada metten dagiti kalikagumanda a mainayon a mangpasayaat ken mapaadda a kasapulan iti barangayda iti agdama.
Impaganetget ni Mayor Ediboy a tingitingen dagiti sektor no ania dagiti mainayon a kalikagumda ta adda nangrugian nga isu ti First Listings dagiti naited a proyekto ket dagiti saan a naited pay ket mairaman iti 2nd Listings a pakaadawan manen dagiti prioridad a maiprograma agingga a mapatgan dagitoy a kalikagum dagiti maserbian a sektor iti LGU.
Nupay kasta, nagyaman ni Mayor Ediboy iti naipakita dagiti Kapitanes ken NGOs ken dadduma a sektor a talek ken suportada iti administrasion a mangitultuloy a mangipatungpal kadagiti sumangbay ken ited a pagdur-asan ti Gobierno Munisipal kadagiti barangay ken iti sapasap nga umili.
Naikkan met ti gundaway dagiti pannakabagi ti tunggal sektor a nangyebkas iti pakaseknan ti itaktakderanda a hanay ken kasta metten dagiti kalikagumda a mapatgan. Nai-notar amin dagiti napagnanamingan a plano ken proyekto a binukel ti LDC Members. # (Web In-Action)
No comments:
Post a Comment