Cabugao, Ilocos Sur – Iti pannakiuman ti Web In-Action, naammuan kadagiti mannalon nga iti panagbuslon ti tudo kadagiti limmabas a Bagyo/Habagat iti nangipaay iti kasapulan tapno mapalawa ti matalon ken agtan-ay dagiti naimula a pagay iti Wet Season 2019 (Hunio-Nobiembre).
Kaaduan ita ti nanam-ayan iti kaadda ti naited a nainayon a nagpuonan a ganagan babaen iti programa ti Gobierno Munisipal kasta metten a dakkel a katulonganda dagiti nagun-odda a Farm Machineries & Farm Implements.
Kanaig daytoy, dakkel ti naitulong dagiti Municipal Techno-Demo Farm kadagiti estratehiko a lugar kas iti Farmers Field School (FFS) in Rice Production kadagiti disso ti barangay ti ili. Dagitoy a demonstration area iti panagtalon ket patinayon a maar-aramid a pagtuladan dagiti mannalon a pagtitinnulongan nga isayangkat dagiti Ahensia a kas iti DA-RFO 1; OPAG-Ilocos Sur; Agriculture Training Institute (ATI)- Region 1; Ilocos Norte Research Experimental Center (INREC-Batac) ken iti LGU-Cabugao nga idauluan ni Mayor Edgardo “Ediboy” S. Cobangbang, Jr.
Dagitoy nga aksion ken inisiatiba ket gubuay iti napintek a programa ti Gobierno Munisipal tapno makomplementaran iti regta dagiti mannalon nga agpataud iti umanay a suplay a pagtaraon dagiti umili ken mamantener latta iti rice self-sufficiency status iti Munisipalidad. # (Web In-Action)
No comments:
Post a Comment