LANDSCAPING TI SANGO TI BALAY TI ILI KEN PARKE, MAAR-ARAMID

Cabugao, Ilocos Sur – Iti pannaki-amad ti Web In-Action,  imbatad ni Mr. Gabriel Sunio, Landscape Coordinator nga agtultuloy ti panang-landscape-da kadagiti pampubliko a disso ken sango ti pasdek ken pasilidad ti baro a pasdek ti LGU-Cabugao  agraman iti Rizal Park (dua kadisso) tapno makaay-ayo ti buyada ken agtultuloy ti pannakadalusda babaen iti programa ti Clean and Green ken Environmental Management ti Munisipio.

Kangrunaan nga  as-asikasuen  ti grupoda iti pannaka-landscape ti sango iti amianan a paset ti Balay ti Ili agraman iti matupar a sangona iti National Higway kasta metten ti  Monumento ni Dr. Jose P. Rizal iti abay ti RTC-MCTC Building ken Rizal Park iti abay ti Rizal Barangay Hall ken Senior Citizen Building iti isu met la a disso.

Dagitoy nga aksion ken inisiatiba ket gubuay  iti napintek a programa ti   Environmental Management ti LGU-Cabugao nga idauluan ni Mayor Edgardo “Ediboy” S. Cobangbang , Jr.  tapno mapagtalinaed iti napintas a buya ken kinadalimanek  ti aglawlaw ken napintas a mabuybuya iti amin nga umuneg ken lumabas iti kabarbaro a pasdek ti Cabugao Tobacco Farmers Hall ti ili. # (Web Situational Report)