GARCLIC PRODUCTION, MAISARUNO A MAADAL ITI FFS TI DA

Cabugao, Ilocos Sur – Kalpasan ti panagpatanor ti hybrid a  pagay a nayadal kadagiti mannalon a nag-session iti Farmers Field School (FFS)-Brgy. Pug-os, maisaruno ti panagpatanor ti bawang a  maipatungpal babaen ti Provincial Agriculture Office (OPAG), Ilocos Sur  kadagiti mannalon iti Cabugao, Ilocos Sur para iti Dry Crop Season 2012-2013 (Nobiembre-Mayo).

Paset daytoy ti programa ti High Value Crops Development Program (HVCDP)  ti Departamento ti Agrikultura (DA) kadagiti mannalon. Inyam-ammo daytoy a sumaruno a maisayangkat  ni Mrs. Remedios P. Inovejas, pannakabagi ti OPAG a timmulong a naglektiur iti session ti FFS iti Oktubre 4, 2012 iti Barangay Stage, Barangay Pug-os, Cabugao, Ilocos Sur. Mailunsad daytoy a programa inton Oktubre 25, 2012 iti Barangay Pug-os, Cabugao, Ilocos Sur.

Kanaig daytoy, iti pannakiuman ti Web In-Action, imbatad ni   OIC Nereo S. Daproza ti DA-LGU a maangay ti Field Day ti FFS-Pug-os Farmers Association inton  Oktubre 9, 2012 ket maaramid ti cross-visit dagiti mannalon iti Brgy. Cacadiran, Brgy. Arnap ken Brgy. Alina-ay nga ayan ti Demo-Farm ti Hybrid ti Munisipio (DA-LGU). Maaramid ti Crop cut and Data Gathering iti daytoy nga aktibidad.

Manamnama met  nga agturpos dagiti FFS Participants inton Oktubre 17, 2012 kalpasan a maapit ti naimulada a pagay iti Learning Field a masarakan iti Barangay Pug-os, segun ken ni Federated Farmers President Elmer Guerrero Bromeo.  # (Web In-Action) 

GRUPO DAGITI KAPITANES, BINAYABAYDA A NAGIPILA DA MAYOR EDIBOY

Cabugao, Ilocos Sur – Naipasimudaag ti nasged nga ayat ken  suporta dagiti grupo ti Barangay Captains ti ili a Cabugao, Ilocos Sur babaen ti panangbayabayda kadagiti nagipila ti kandidaturada (Certificate of Candidacy)  para iti May 13, 2013   National and Local  Elections nga indauluan da Mayor Edgardo “Ediboy” S. Cobangbang, Jr. ken paidasig a Vice Mayor Deogracias Jose Victorino H. Savellano ken ka-line-upda a kandidato  iti salinong ti  partido ti   Nationalist Peoples Coalition (NPC) ken Bileg Party a nagipila ti kandidaturada (COC)  iti Commission on Elections  (COMELEC)-Cabugao idi Oktubre 3, 2012.

Kakuyog  ni Mayor Ediboy nga agpailayon da Incumbent SB Member Dr. Carlito S. Pano, SB Member Benedicto M. Savellano, SB Member Josefina S. Vallejo, SB Member Dr. Jemaima S.  Tan-Yee, ken incumbent Vice Mayor Danilo Q. Gazmen a para Sangguniang Bayan Member.

Dagiti   kandidato a nakikaysa  ken nangkompleto ti line-up da Mayor Ediboy   ket da Incumbent Barangay Captain Inocencio S. Sadac ti Barangay Turod, Former SB Member Carlos V. Sison,  ken Incumbent Barangay Captain Rogelio S. Siruno ti Barangay Cuancabal.

Nasged ti pammati  ti grupo ni Mayor Ediboy  a babaen ti nagpinsan a suporta ti kaaduan a Kapitanes ti barangay iti Munisipalidad ket mangipalnaad ti agtultuloy a suporta, pammati ken talek dagiti umili para iti sabali manen a termino a tallo a tawen-da iti takem   tapno  maituloyda dagiti napadur-asen a programa ken pagsayaatan  para iti naprogprogreso  pay a masakbayan ti ili a Cabugao, Ilocos Sur. # (Jose Sabio Sajonia)

MUNICIPAL DEVELOPMENT COUNCIL, NAGMITINGDA

Cabugao, Ilocos Sur – Naangay ti miting ti Municipal Development Council (MDC)  a pakabuklan ti nagatendar ket dagiti  kameng ti  Sangguniang Bayan, Kapitanes ti Barangay, NGO’s kas iti Senior Citizen, Cabugao Vegetable Growers and  Producers Association, Federated Day Care, Federated RIC, kasta met iti  DepEd, MLGOO  ken dadduma a sektor. Nag-Preside ditoy da MPDC Florante Jara ken ABC President, Brgy. Captain Teddy U. Soller.

Linuktan ni Vice Mayor Danny Q. Gazmen ti miting  babaen ti panangibinsana ti akem ti MDC iti pannakaiplano dagiti mapunduan a proyekto ken aktibidades a pagsayaatan ti sapasap a Munisipalidad  para iti Tawen 2013.

Naisaganad ti panangibinsa ni MPDC Florante Jara ti gapuanan ti LGU kadagiti naiprograma a proyekto iti Tawen 2012 ket kinatinnulongna dagiti Opisiales ti DPWH District Office a nangilawlawag kadagiti saan a nairingpas nga impraestraktura  nangruna iti Kalsada Nasional. Impeksa met ti dadduma a Kapitanes dagiti pakaseknan ti barangayda partikular  kadagiti Provincial Roads a masakupanda. Naan-anay a nasungbatan dagiti problemada  babaen ti pannakabagi ti DPWH District Office.

Impaganetget ni Mayor Edgardo “Ediboy” S. Cobangbang, Jr. ti panangparegta  koma dagiti Barangay Officials  ti Barangay Development Council (BDC) a mangplano  kadagiti kasapulan a pasilidad ken serbisio kadagiti kabarangayanda. Dagiti dadakkel a pakaseknan ket daytoy ti mairaman iti plano ti Munisipio nga ipatungpal.

Nagyaman ni Mayor Ediboy iti naiparangarang dagiti Kapitanes a talek ken suporta iti agdama nga administrasion a mangitultuloy a mangipatungpal  kadagiti sumangbay a pagsayaatan nga ipaay ti Gobierno Munisipal kadagiti barbarangay.

Naikkan ti gundaway ti tunggal sektor a nangyebkas ti kasasaad ti itaktakderanda kas iti Day Care, RIC, DepEd, Vegetable Growers  ken kasta met dagiti kalikagumda a mapatgan. Nai-notar amin dagiti napagnanamingan a plano ken proyekto a binukel ti MDC Members a mairaman iti Municipal Development Plan.

Kalpasan ti miting, napagsasanguan dagiti nagatendar iti pangngaldaw nga insagut ni Hon. Deogracias Jose “DJ” Savellano. # (Web In-Action)

MAUSAR ITI PAPERLESS SESSION, NAI-DELIVER

Cabugao, Ilocos Sur – Naisangpet ti 12 units ti Ipadd 3 a mausar iti tunggal session ti Sangguniang Bayan ti ili a Cabugao, Ilocos Sur.  Nai-deliber dagiti ramit iti Oktubre 2, 2012 iti pasdek ti SB-ABC Hall, Cabugao, Ilocos Sur.

Imbatad ni SB Member Benedicto M. Savellano, Chairman, Committee on Rules a paset ti panangsurot  iti kabaruanan a sistema    ti  pannakagatang dagitoy a ramit kasta met a makatulong iti nadaras a panangistudiar  kadagiti mabukel a  gakat ken maikabassit ti pannakausar ti papel  iti deliberasion ti SB Session.

Inimatangan da Vice Mayor Danny Q. Gazmen, SB Member Benedicto M. Savellano, SB Secretary Maxfel S. Suboc ken GSO-Designate Gemma S. Castillo  ti panangideliber ti supplier dagitoy a ginatang ti Munisipio a ramit.

Sakbayna, napanday ti Gakat iti Konseho Munisipal iti pannakapaadda dagitoy a ramit a mausar iti Lehislatura  ti Ili ken  iti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)

BARO NGA RHU, NAISIBRO TI ADU A NAGPAAGAS

Cabugao, Ilocos Sur – Nagdudupudop ti umili a nagparikna iti baro a pasdek ti Rural Health Unit (RHU) ti ili a Cabugao, Ilocos Sur iti umuna ken maikadua nga aldaw (Oktubre 1 ken 2)  iti umuna a lawas ti Oktubre 2012.

Kas iti sigud, maladaga, ubbing, agtutubo, agkabannuag ken nataengan ti nagparikna ken nagpaagas. Naurnos ti panagpila dagiti pasiente ken sistematiko ti pannakakita kadagiti record no siguden a mapmapan ti pasiente  ken naannayas met ti pannakaala ti record dagiti agdadamo nga agpaagas. Nadardaras ita ti panaggunay ti agpaagas ta naituding ti tunggal kuarto a papananna. Tunggal akem dagiti personnel ket adda kabukbukodanda  a kuartoda a pagtaminganda ti klienteda.

Kanaig ti serbisio ti salun-at, imbinsa ni Ms. Janet Sison, Registered Nurse ti akem ti Rodolfo S. Sonido Lying-in Center apaman nga agoperar a  kadua ti RHU a  mangted ti serbisio iti kagimongan kas iti sumaganad:

• Mangted ti basic emergency obstetric ken newborn care services kadagiti masikog nga agpasikal ken aganak. Naakreditar daytoyen a pasilidad iti Ahensia ti Salun-at. 
• Manglapped ti insidente ti maternal death ken infant death.
• Buklen dagiti clientele dagiti Philhealth Card Holder ken Non-Philhealth nga inna ken agserbi para iti inna nga umay nga  aggapu pay  iti kabangibang nga ili.
• Mangted ti nakalidad a  maternal care.
• Babaen ti inisiatiba ni Mayor Edgardo  “Ediboy” S. Cobangbang, Jr., daytoy a pasilidad ket maneharen pay dagiti addaan ti nabalitokan a panagpuspuso a tattao, graduado ti Nurses, midwife volunteers nga agserbi iti 24 oras iti 7 nga aldaw ti makalawas.
• Kompleto ti ramit a pagpaanak nga addaan ti Obstetrician ken Pediatrician a dodoktor a mangsuporta kadagiti skilled health professionals  nga agserbisio nangruna no adda maaramid a surgery wenno komplikasion.
• Ti pasilidad ket addaan ti kuarto para iti labor room, quarters ti health staff, delivery room, nursery, recovery room nga addaan ti 3 a beds ken consultation room.

Ti pannakapabaro dagiti pasilidad ti salun-at ket prayoridad a programa ti Gobierno Munisipal nga idauluan ni Mayor Ediboy tapno agtultuloy a maipaayan ti nakalidad a serbisio dagiti umili ken umay agpaagas tapno mamantener ti salun-at a kapatgan a kupikopan ken  taginayonen ti sapasap. # (Web Situational Report)

RODOLFO S. SONIDO LYING-IN CENTER, NAINAGURASIONAN

Cabugao, Ilocos Sur – Nabendisionan ken nainauguraran  ti baro a pasdek a pammadayaw ken   ni Rodolfo S. Sonido babaen iti ayat ken pammateg a panangipaay ni Dr. Charlie Y. Sonido agraman dagiti kameng ti pamiliana ken kabagianna kadagiti kailianna  iti Cabugao, Ilocos Sur idi Setiembre 28, 2012. Ni Dr. Charlie Y. Sonido ket tubo ti Cabugao, Ilocos Sur ngem agnaeddan a sangapamilia idiay Hawaii, USA.

Indauluan ni Mayor Edgardo “Ediboy” S. Cobangbang, Jr. ti Pamilia-LGU ken umili  a nakikaysa kadagiti Opisiales ti Gobierno Probinsial nga idauluan da Gov. Luis “Chavit” Singson ken Vice Gov. DV Savellano agraman kakaduada, Opisiales ti Barangay, NGO’s, bisita, pannakabagi ti dadduma nga Ahensia ken Opisina, Media,  ken dadduma a sektor a nangimatang iti pannakagetteng ti laso babaen kada  Gov. Chavit ken Dr. Margarita S. Jara a mangipalnaad ti pannakaisibro ti baro a pasdek kalpasan ti pammendision ni Rev. Fr. Felix Costales, Kura Paroko, Iglesia Romano Katolika ti ili a Cabugao, Ilocos Sur. 

Naitampok pay iti nasao nga inaugurasion ti panangibasa ni SB Member Dr. Carlito S. Pano ti Resolusion ti panagyaman ken pammigbig  dagiti dadaulo ken umili ti Cabugao, Ilocos Sur  iti pamilia ni Dr. Charlie Y. Sonido kadaytoy a naindaklan a  panangidonarda iti pasdek ti paganakan   a  para iti amin nga agkasapulan ti serbisio iti nasao a lokalidad. 

Imbagian ni Mr. Elpidio Sonido ti Barangay Cuantacla iti pamilia ni Dr. Charlie Y. Sonido a nangawat kadagiti nakailanadan dagiti pammigbig.

Ti Rodolfo S. Sonido Lying-in Center ket naidonar para kadagiti umili kabayatan ti panagtakem dagiti Opisiales ti Gobierno Munisipal nga idauluan ni Mayor Ediboy. Manamnama ti panangipaay  daytoy a pasilidad ti nabayagen a pagkasapulan dagiti inna ken masalakniban dagiti maladaga a maipasngay iti umisu a pasilidad ken pakataripatuanda. # (Web In-Action)

AGMAYMAYSADA A MANGISAKIT TI DAYO

Cabugao, Ilocos Sur – Naannayas ti pannakaiwardas  ti aktibidades  iti Cabugao Dayo idi Setiembre 29, 2012 a kaaldawanna. Nasapa a naglukat dagiti panganan iti sirok ti kaykayo ta matarusan  metten a pagpammigatan  ditoy  dagiti koridor, bisita, maki-dayo iti bigat ti kada Sabado.

Iti pannakiuman ti Web In-Action ken ni Municipal Meat Inspector Dante Naval, imbatadna ti agtultuloy a kinaannayas ti transaksion a maaramid  ken   kaduana a  mismo  dagiti opisiales ti Livestock Traders ken LGU a mangan-andingay kadagiti ag-dadayo. No pakaseknan ti magatang nga ayup ken burias, ditoy lattan ti pagturongan dagiti makasapul a tattao. Adu met ti umay aggatang nga aggapu iti kabangibang nga ili.

Ti panagballigi ti Cabugao-Dayo ket maysa met  a makagapu ti panangited ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken ti Gobierno Probinsial iti importansia iti agtultuloy a pannakaitandudo ti Agrikultura iti sektor ti Livestock a mangtulong ti panagbiag dagiti umili ken ti ekonomia ti ili. # (Web In-Action)