ENVIRONMENTAL MANAGEMENT PROGRAM TI MUNISIPIO, AGTULTULOY

Cabugao, Ilocos Sur – Agtultuloy a monitoren ni MENRO- Designate Edgar S. Balangatan ken dagiti kakaduana  ti naregget nga  implementasion ti Environmental Management Program, Clean and Green Program ken Solid Waste Management ti Munisipio a  maipakpakat  kadagiti 33 a barangays agraman dagiti pageskuelaan elementaria ken sekundaria iti masakupan ti Munisipalidad ti Cabugao.

Daytoy a gannuat ket naibasar iti rekomendasion ni Mayor Edgardo S. Cobangbang, Jr. a pannakailungalong  dagitoy a gannuat    babaen iti direktiba tapno mamantener ti sanitasion ken  pannakaprotektar iti aglawlaw  a pakaisagutan met laeng ti sapasap ken dagiti umili. 

Pakabuklan ti programa ket dagiti sumaganad: 

A. 1. Clean and Green- Pannakaaramid ti Nursery, Tree Park, Herbary, Gulayan (intensive gardening) 2. Pannakadalus dagiti kalsada, hall, canals, ken karayan 3. Tree Planting, beautification along roads. 

B. 1. Para iti Coastal Barangays- Maintenance of mangrove areas 2. Massive  coastal greening/tree planting 3. Massive coastal clean-up 4. Conservation and protection of fish sanctuaries 5. Info-drive and ocular inspection. 

C. Forest Protection and Management- 1. Massive reforestation (idle lands & watershed areas) 2. Monitoring and check of illegal logging activities.

D. Solid Wastes Management - Functional committee on environment (barangay) 2. Establishment of barangay Material Recovery Facility (MRF)  3.  Proper waste segregation 4. Info-drive and visitation.

E. Pollution Control- 1. Ordinances: no open burning, no illegal wastes disposal, no illegal fishing, ken no illegal logging.

Segun ken ni MENRO Balangatan, agpadpada ti barangay ken eskuela a pakaipakatan dagitoy a pagannurotan tapno mamantener ken maprotektaran ti aglawlaw. Innayonna a malaksid ti aktual a pannakabisita ti barangay ken koordinasion iti eskuela, maaramid pay iti regular a documentary report panggep daytoy.  # (Web In-Action)

ALL SOULS’ DAY, ADU TI KIMMAMAKAM A SIMMARUNGKAR

Cabugao, Ilocos Sur – Naruay pay laeng ti simmarungkar a tattao kadagiti minatayda kadagiti nitso ken tanem nangruna iti Kamposanto Katolika iti nagmalem iti Nobiembre 2, 2012.

Kabayatan a maipatpatungpal ti Oplan Kaluluwa 2012  iti pannakabagi ti linteg kadagiti agsangpet-agawid a tattao  nangruna iti National Highway a mabatogan ti Cabugao Public Cemetery, naangay  ti Nasantuan a Misa a maidaton iti minminatay  iti malem ti maikadua nga aldaw ti Difuntorum.

Iti pannakiamad ti Web In-Action, naballigi ti dua nga aldaw (Nobiembre 1-2)  a panagselebrar ta awan ti aniaman a madi a napaspasamak iti ruar ken uneg ti sementerio, segun ken ni  Deputy Chief Police Inspector Rodel Ularte ti Municipal Police Station ti Cabugao. # (Web In-Action)

ALL SAINTS’ DAY, SAPASAP A NAGSELEBRAR ITI NOBIEMBRE 1

Cabugao, Ilocos Sur – Nagselebrar ti sapasap nga adda minatayna kadagiti kadakkelan a  kamposanto (Kamposanto Katolika ken Kamposanto Aglipayano) iti Nobiembre 1, 2012 babaen ti panagatendarda iti Nasantuan a Misa a naidaton kadagiti minatay babaen ti panangannong dagiti Padi ti Iglesia Romano Katolika a ni Rev. Fr. Felix Costales, Kura Paroko ken ti Padi ti Iglesia Filipina Independiente a ni Rev. Fr. Joseph Badua.

Naaramid  ti Misa iti Municipal Cemetery iti Sitio Benneg, Brgy. Cuancabal iti  kabigatan ti Nobiembre 1, 2012 ken nagpabendision dagiti adda minatayna kadagiti nitso ken tanem.

Kasta pay a naaramid  ti Misa iti Kamposanto Katolika  iti malem iti dayta met la nga aldaw ket dupudop  ti tattao a simmarungkar kadagiti nitso ken tanem dagiti patpatgenda ti biag a pimmusayen.

Kanaig daytoy, napasnek met a nagasikaso ti Kapolisan (Municipal Police Station) a  nangtarabay ken  nangiwardas ti naannayas a  trapiko iti batog  ti kamposanto (Cabugao Public Cemetery)  a sumrekan ken rummuaran ti tao a kaduada dagiti Barangay Tanod (BPATS), Security Personnel  ti LGU, Medics iti RHU-Cabugao ken BFP (Cabugao Fire Station). Adda met latta a naidestino a Security Personnel  iti uneg ti sementerio kabayatan nga umad-adu ti sumarungkar a tattao. (Web Situational Report)

ARAW NG PARANGAL, REGIONAL WINNER TI BRGY. ARAGAN

Cabugao, Ilocos Sur – Inyalat ti Lupong Tagapamayapa ti Barangay Aragan nga idauluan ni Brgy. Captain Modesto P. Ronque, Lupon Chairman,  ti pammadayaw kas maysa kadagiti Regional Winners iti Search for Most Outstanding Lupon Tagapamayapa  Incentive Awards (LTIA) iti Region 1. Binayabay ni Mayor Edgardo S. Cobangbang, Jr. dagiti Opisiales ti Barangay Aragan a nagatendar iti “Araw ng Parangal” nga inwayat ti DILG Regional Office No. 1, San Fernando City La Union  iti Vigan City Convention Center, Vigan City idi Oktubre 30, 2012. 

Naigiddan ti pammadayaw ti pannakaselebrar iti 21^st nga anibersario ti Local Government Code nga addaan ti Tema: “Tanglaw Kinabukasan Awtonomiyang Lokal: Reporma sa Pag-unlad ng Ekonomiya ng Pamayanan at Pagsulong ng Kapakanan ng Taong Bayan.”

Nairagup  iti delegasion ti Cabugao a kadua ni Mayor Ediboy  ni MLGO  Officer Constancia “Connie” L. Quinola a nangimatang ti pannakapadayaw ti Barangay Aragan.

Ti DILG Region 1 ket idauluan ni Regional Director Corazon P. Guray, CESO III. # (Web In-Action)

OPLAN KALULUWA 2012, FIRE SAFETY TIPS TI BFP

Cabugao, Ilocos Sur – Nakikaysa ti puersa ti Bureau of Fire and Protection, Cabugao Fire Station  nga idauluan ni Fire Marshal Elmer Acapuyan iti pannaka-obserbar  ti selebrasion ti All Saints’  Day ita a Nobiembre 1, 2012 iti Cabugao Public Cemetery.

Paset ti aktibidad ti BFP iti makitimpuyog kadagiti law enforcers kas iti Municipal Police Station, BPATS ken Security Staff ti LGU iti pannakamantener ti natalna a kaadda ken panagbisita dagiti tao iti masanguanan ken uneg ti Kamposanto.

Indauluan ni Fire Marshal Elmer Acapuyan ti pannakaiwaras ti pamphlet a nakailanadan ti Candle Fire Safety Tips, panangoperar ti Fire Extinguisher no adda rumsua nga uram, Home Fire Safety Tips ken  dagiti umisu nga aramiden no mapasamak ti uram.

Daytoy nga aktibidad ti BFP ket mangkomplementar iti pannakatagiben  ti linak ken talna babaen iti Kapolisan  a kaduada dagiti Barangay Tanod/BPATS a naka-duty. # (Web In-Action)

FFS IN GARLIC ITI PUG-OS FARMERS, NARUGIAN

Cabugao, Ilocos Sur – Narugianen ti panagadal ti umabot ti 35 a Farmer-Cooperators iti Season-Long Farmers Field School on IPM-Garlic in Rice-Based Cropping Systems ket naipasdek  ti Learning Area ken Learning Field   iti Brgy. Pug-os, Cabugao, Ilocos Sur. Nangrugi ti panagbasada idi Oktubre 31, 2012.

Immuna a natratar  ti Launching Program ket naaramid dagiti sumaganad: Election of Officers, Ballot Box Exercise (Pre-Test) ken Group Dynamics Activities : Finding One’s Group and I Draw Myself, Presentation of Host Team Functions ken Collection of Soil Samples for Analysis.

Aganay a 16 a lawas ti panagadalda mangrugi iti Oktubre 2012 agingga iti Pebrero 2012. 5 oras ti panagalda iti kada Huebes ti lawas ket dagitoy ti pakabuklan ti adalenda: Agro-Ecosystem Analysis (AESA)-2 Hours, Special Topics-2 Hours, Group Dynamics/Planning-1 Hour.

Daytoy a proyekto ket nagbuligan nga isayangkat ti Philrice ken ti  LGU-Cabugao nga idauluan ni Mayor Edgardo “Ediboy” S. Cobangbang, Jr.

Dagiti napili nga Opisiales: Benjamin Saquiton, Presidente; Roberto P. Sablay, Bise Presidente; Norman Silvania, Sekretario; Reynaldo Saliganan, Treasurer; Carlo Castillo, PIO; Rogelio Somera ken Alwin Castillo, Business Managers. Facilitator ni Mrs. Ester Aguimbag, AT ken katulonganna da Mrs. Ednalyn Silario ken Mrs. Marjorie Castillo, agpapadada  a Personnel ti DA-LGU Cabugao. # (Web In-Action)