BRGY. BONIFACIO FIESTA, NAGATENDAR DA CONG. RYAN KEN MAYOR EDIBOY

Cabugao, Ilocos Sur – Naangay ti selebrasion  ti  149^th Birthday Anniversary ni Bannuar Andres Bonifacio a kaaldawan met  ti panagpiesta ti Barangay Bonifacio, Cabugao, Ilocos Sur idi Nobiembre 30, 2012.

Nangrugi ti panagpiesta ti Barangay Bonifacio idi  Nobiembre 29, 2012, ket naangay ti pannakapili iti Miss Gay 2012 iti karabiyanna  iti Cabugao Central Park (CCP), Brgy. Bonifacio, Cabugao, Ilocos Sur.

Iti 3:00 A.M. iti Nobiembre 30, 2012, naaramid ti Diana iti aglawlaw ti barangay. Naidaton ti sabong a pammadayaw iti sakaanan ti Monumento ni Andres Bonifacio iti kabigatanna. Naangay ti Grand Parade iti aglikmut ti Poblasion ken naisaganad ti Nasantuan a Misa iti Barangay Chapel. Naaramid ti Parlor Games sakbay a naangay ti Luncheon iti Barangay Hall a nakipasetan ti lumugar ken  sapasap a nakitabuno.

Karabiyanna, naangay ti Koronasion da King Jayro 1^st ken Queen Shermaine 1^st, Day Care Pupils a nangabak iti Popularity Contest a pangparagsak ti panagpiesta ti Barangay Bonifacio.

Opening Prayer ti inakem  ni Mrs. Salve Somera, National Anthem ti Apple Reign Band ken Welcome Address ni Ms.  Maricar Torres, Day Care President.

Kalpasan ti intermission number, pinagsapata ni Mayor Edgardo “Ediboy” S. Cobangbang, Jr. dagiti baro nga opisiales ti Day Care Parents-Service Group  2012.

Naisaganad ti Farewell March of Outgoing King and Queen 2007:  Outgoing King Jerwin Tabuac ken Outgoing Queen Mia Rubyne Somera.

Kalpasan ti Entrance of the Royal Court, nagkanta ken nagmensahe ni Hon. Deogracias Jose “DJ”  Victorino H. Savellano a nangirepresentar ken ni Vice Gov. DV Savellano a dadakkelna.

Nagmensahe met ni Mr. Abigail P. Pula kas Guest Speaker kalpasan a yam-ammo ni Mr. Ferico S. Arcebal, Jr.

Kinoronaan da Mr. Abigail P. Pula  ni King Jayro 1^st idinto ta ni Congressman Ryan Luis V. Singson, 1^st District, Ilocos Sur a kaduana    ni Mrs. Jerlie S. Cobangbang ti nangorona ken ni Queen Shermaine 1st.

Nangipaay  ni Diputado Ryan ti Mensahe ket kimmablaaw ken nagyaman iti pannakaawisna a makipagrambak iti piesta ditoy Brgy. Bonifacio. Nadakamat ti Kongresista a maipaayton ti proyekto a Covered Court iti Brgy. Bonifacio tapno adda paglinongan ti agatendar kadagiti maangay nga aktibidad ken programa iti barangay.

Kinoronaan met ni Mayor Ediboy a kaduana ni Ma’am Jerlie S. Cobangbang ni 1^st Princess Hanah Angela idinto ta ni Bokal Christian “Basi” Purisima ken Mrs. Eufrocina N. Pante  ni 1^st Prince Aaron.

Kimmablaaw met ken nagyaman ni Mayor Ediboy iti amin a naitallaong iti  kulminasion ti Piesta. Binigbigna ti kinabannuar ni Andres Bonifacio a nakaipanaganan ti Barangay ken pannakadanon ti panagkasangayna. Kanaig daytoy, sinaluduan ti Alkalde Munisipal dagiti agtutubo nga idauluan ni SK Chairman Arvin Jay Manauis iti panangitandudoda kadagiti aktibidades ken programada nga agtutubo.

Naiballaet dagiti intermission numbers dagiti ubbing, agtutubo, senior citizens a nangiparang iti agduduma a klase ti sala a nangparagsak pay ti rabii ti Koronasion.

Nagsarita met ni Bokal Purisima kalpasan nga agkanta a binayabay ti Apple Reign Singers. Nangipaay ti Bokal ti  P5,000 a donasionna iti Barangay Council iti panagpiesta ti Barangay Bonifacio kalpasanna.

Nakipagrambak met dagiti Balikbayans ken dagiti Opisiales ti Sangguniang Bayan a  da Vice Mayor Danny Q. Gazmen, SB Member Dr. Carlito S. Pano,  SB Member Vicky S. Serna, SB Member Josefina S. Vallejo, SB Member Jemaima Tan-Yee,  SB Member Benedict M. Savellano, SB Member Carlos V. Sison, ken Kakapitanes ti nadumaduma a barangay  nga idauluan ni ABC President, Brgy. Captain Teddy U. Soller.

Nagpaay nga Emcee da Mr. Ferico S. Arcebal, Jr. ken Ms. Rema Agustin. # (Web In-Action)

3-DAY GSP JUNIOR DISTRICT CAMP, NARUGIAN

Cabugao, Ilocos Sur – Nairugi ti pannakangay ti Girl Scout of the Philippines (GSP) District Junior Camp iti Nobiembre 30, 2012 iti Cabugao South Central School Ground, Brgy. Bonifacio, Cabugao, Ilocos Sur.

Immuna ti Entrance of Campers babaen ti GSP March, Prayer ti Sabang Girl Scout, Colors iti CSCS Girl Scouts, Panunumpa sa  Watawat ti Bungro GS ken Rededication to the GS Promise & Law. Opening Remarks ni Mrs. Evangeline U. Seatriz, Cabugao GSP District Troop Leaders Association.

Binagi ni Mrs. Nora Quibilan ti Presentation of Campers and Camp Staff. Iti mensahe ni District Commissioner Helen V. Siruno, kinaritna dagiti ubbing nga adda koma maadalda iti pannakigamuloda iti Girl Scouting kangrunaan ti panagluto, panagdalimanek ti aruaten, ken maasa ti talentoda. Innayonna nga iti Inter-troop Camp, adu ti saan a maikappeng ti GSP  nga ubbing gapu iti kinakurang ti pagbayadda. Tapno maidian ti apal ken liday ti maseknan nga ubing, ipursigeda koma ti “Adopt a Scout”  dagiti adda kabaelanna a manggastos ti usaren ti ubing tapno mariknada met ti padas ti adventure ti  biag ti  Girl Scout.

Impeksa ti GSP District Commissioner iti regget dagiti Stakeholders, NGO, nagannak ken iti agtultuloy a suporta ti  LGU nga idauluan ni Mayor Edgardo “Ediboy” S. Cobangbang, Jr.   iti Scouting activities. Kagiddan itoy, impakaamo ti District Supervisor iti opisial a panaglukaten/panagrugi  ti GSP Junior District Camp 2012.

Ti akem ti GSP  a panangpasalun-at ti aglawlaw babaen ti naregget a  panagmula ti kayo ken nateng ti bugas ti mensahe ni SB Member Vicky S. Serna, Committee Chair on Education.

Impaay met ni Mrs. Digna Talusig, District Field Adviser ken Camp Song ni Mrs. Perla S. Sajonia, Program Coordinator.

Nagpaay nga Emcee da Mrs. Marcelina C. Suetos ken Ms. Lory Anne Sistoza. # (Web Situational Report)  

PAGILASINAN TI PASKUA, ADDAN ITI ERE KEN ITI AGLAWLAW

Cabugao, Ilocos Sur – Saan pay a nakatengnga  ti bulan ti Disiembre 2012 ngem namayengmengen a masagrap  dagiti aldaw ken rabii a pakaipalnaadan  dagiti arkos ken silaw a mangiparparikna  ti isusungad ti nabara a  pannakaselebrar ti pannakaiyanak ti Naindaklan a Mesias-ni Maladaga a Jesus!

Iti ili ti Cabugao, naibaskagen dagiti dadakkel ken babassit a parol nga agduduma ti marisna ken adda Belenna iti sidiran ti pagtaengan iti  Kalsada Nasional partikular iti Barangay Pug-os.

Makita metten  iti arkos a silaw  ken pannakabisti  iti sanguanan ken aglikmut ti Munisipio nangruna ti rabii. Kasta met a maitangkarang  iti naestilo a Christmas Tree, Season’s Greetings with the Bouncing Santa Claus iti ikub ti Cabugao Central Park (CCP) ken kasta pay iti Christmas Décor on Brgy. Hall Ground ti Barangay Rizal ken ti asideg ti Cabugao Cultural and  Sports Complex.

Di met mailaksid dagiti agdidinnaeg nga arkos, bitin ken silaw nga agkidkidiap iti rabii kadagiti arubayan, pagtaengan ken establisimiento kadagiti igid ti kalsada iti Poblasion ken iti barangay.

Naibinggas iti Kultura ni Ilokano partikular ni  Cabugaoenios nga idauluan ni Mayor Edgardo “Ediboy” S. Cobangbang, Jr.  iti nadigem a panangpasungad (Adviento) iti pannakaselebrar ti pannakayanak ti Naindaklan a Mannubbot babaen kadagiti agdidinnaer a  pagilasinan/simbolo  ti umay a  Paskua 2012. # (Web Situational Report)

STAR SCOUTS DAY, RAY-AW KEN NABALLIGI

Cabugao, Ilocos Sur – Naisangrat ti Disiembre 1, 2012 a panagpabuya ti Star Scouts wenno masasao a Twinklers  iti maikadua nga aldaw ti GSP Junior District Camp (Nobiembre 30-Disiembre 2, 2012) iti Cabugao South Central School Backstage.    Iti Opening Ceremony, nagparade  dagiti ubbing iti aglikmut ti CSCS Oval. Inakem ni Ms. Arlyn Fernando ti panagkararag. Kalpasan ti Re-dedication of the Star Scout Promise and Law, nangted ti Welcome Greetings ni Ms. Digna Talusig, District Field Adviser. Presentation of Participants met ni Ms. Clarett B. Sambrana.

Iti panagmensahe ni District Commissioner Helen V. Siruno, dinayawna ti “high energy” nga impakita dagiti Twinklers. Bininsana ti pateg ti Tema: “Girl Scouts Can Create a Healthy and Safe Environment”. Pinagyamanan  ti District Supervisor iti amin a nakipartisipar nangruna dagiti nagannak a kimmuyog kadagiti babassit nga ubbing. Nagyaman  pay ti pangulo ti DepEd District iti agtultuloy a suporta/pannarabay  ti LGU nga idauluan ni Mayor Edgardo “Ediboy” S. Cobangbang, Jr. kadagiti amin nga aktibidadesda iti DepEd District  a mangpatan-ay ti pagimbagan dagiti agad-adal.

Panangipasagepsep iti naganus a panunot ti ubbing iti pateg ti  pannakitinnulongda a mangpasalun-at ti environment iti bugas ti mensahe ni SB Member Vicky S. Serna, Committee Chair on Education.

Indauluan ni Ms. Cheryll Ann Navarro ti Star Scouts’  Songs.

Kalpasan ti Snacks Break, naisaruno ti Laro ng Lahi kas iti Breaking the Pot, Sack Race, Centipede Race, Bottle and Straw Relay, Kadang Kadang and  Balloon Relay.

Kamalmanna, naaramid ti Badgework iti Christmas Décor Making out of Juice Tetra Pack sa naisaganad ti Star Revel babaen ti presentasion ti Zone 1-Cha-cha, Zone II-Folk Dance, Zone III-La Jota, ken Zone IV-Waltz.

Naangay ti Awarding Ceremony ket naited dagiti Special Awards (tokens and cash prizes). Impaay met ni Ms. Merlinda S. Sajonia, Vice President, Star Level, Cabugao Troop Leaders Association iti Words of Gratitude.

Nagpaay nga Emcee da Ms. Luz S. Valle ken Ms. Virgie Tipon. # (Web In-Action)

LYING-IN CENTER, MAKATULONG UNAY ITI MASA

Cabugao, Ilocos Sur – Agtultuloy ti pannakaipaay ti 24 oras a  serbisio kadagiti inna nga agdadagsen iti panagpasngayda iti Rodolfo S. Sonido Lying-in Center, RHU-Cabugao, Ilocos Sur.

Iti panagbisita ni Mayor Edgardo “Ediboy” S. Cobangbang, Jr. iti Lying-in Center, ken pannakisarsaritana kadagiti umili nga umay iti Munisipio, naipeksana   nga awan ti pangisukatanna iti sumken a rikna kenkuana iti makitana ken   madamagna a maited/umisu  nga atension ken asikaso kadagiti pasiente ken nangruna pay ti pannakapalag-an ti pamiliada iti pannakalibre  ti pagrebbenganda gapu iti Philhealth.

“Naisangayan unay daytoy a nagapuanan ti liderato ni Mayor Ediboy,” imbatad ni Kagawad Loreto Sadac ti Barangay Turod. “Iti 24 oras a panagduty dagiti agrebbeng ket mapatibker  ti rikna dagiti inna a masikog  nga adda iti barangay ken away no  madamagda nga  adda latta madadaan a sumaranay kadakuada no dumtengen  iti kabulananda.”

Nangrugi a nagoperasion ti Lying-in Center idi Nobiembre 5, 2012. Addaan kadagiti matalek ti kabaelanna nga agasikaso ti aganak ken maipasngay a maladaga a buklen ti Midwives, Nurses ken Doktor. #  (Web Situational Report)