1ST GOLD MEDALIST TI CABUGAO ITI PALARONG PAMBANSA

Cabugao, Ilocos Sur – Napanda nagkortesia iti Opisina ni Mayor Edgardo “Ediboy” S. Cobangbang, Jr. ti grupo ni Mr. Ronel M. Ubaldo, Sports Coordinator iti Cabugao DepEd District a kaduana ti Gold Medalist  tapno ipagtengda ti panagballigi ti maysa a Pupil iti pagadalanda iti Salomague Elementary School a maysa kadagiti nagkampeon iti Volleyball (Boys) Elementary iti napalabas a Palarong Pambansa sadiay Dumaguete City, Negros Oriental  idi Abril 21-27, 2013.

Maibilang ni Julius Cesar V. Valdez, Grade V Pupil ti Salomague Elementary School nga idauluan ni Mr. Ronel M. Ubaldo, Head Teacher 3/District-PESS, Cabugao DepEd District,  Cabugao Ilocos Sur kadagiti napili a Volleyball  Player a nangirepresentar ti Region 1 iti Palarong Pambansa iti Volleyball Boys Event.

Iti pannaki-amad ti Web In-Action iti Mayo 3, 2013, imbatad ni Mr. Ronel M.  Ubaldo a  maysa ni Julius Cesar V. Valdez a napili a naikappeng iti Team Pangasinan a   nangbukel iti Region 1 Athletic Association (RIAA), Volleyball  Boys Elementary a nakisalisal iti nalatak a nasional a  pay-ayam:   “Palarong Pambansa”. Innayonna a naanduran ni Julius ti 10 a deretso nga aldaw a panagsanay idiay Dumaguete City sakbay a naisangalda iti salip. Inyalatda ti Straight Win to the Finals iti ay-ayam a Volleball Boys a nagkampeonanda.

Ni Julius ket tinarabay da Mr. Meneleo B. Palma (EPS-PESS) DepEd-Ilocos Sur ken ni  Mr. Ronel M. Ubaldo, District-PESS Cabugao kabayatan ti panagsanay ken pannakidangadangda iti ay-ayam a Volleyball.

Nabara met  ti panangsarabo ni Mayor Ediboy kada Julius ken Sir Ronel iti Opisina ti Hepe Ehekutibo ti Ili  iti Mayo 3, 2013. Pinagyamanan ti Atleta ken ni Maestro Ronel ni Mayor Ediboy iti naan-anay a suporta ken akemna iti panagballigi ni Julius kas kaunaan a Gold Medalist Player iti Palarong Pambansa a Taga-Cabugao ken impeksada met a ti dayaw a nagun-odda ket balligi met ti sibubukel nga umili ti Cabugao. # (Web In-Action)

HOUSEHOLD CASE RECORD TI 4 P’S, MADAMA A MA-UPDATE

Cabugao, Ilocos Sur -  Iti pannakiuman ti Web In-Action iti Mayo 2, 2013, imbatad ni Mr. Gary Vicerra, Municipal Link ti DSWD iti LGU-Cabugao a nagtengan manen ti panawen a ma-update (kada 6 a bulan)  dagiti household case record dagiti kameng ti Pantawid Pamilyang Pilipino Program (4 P’s) iti ili ti Cabugao. Innayon ni Mr. Vicerra a mapanda kadagiti Social Workers  kadagiti barangay iti pannakikoordinarda  ken  ni MSWD Officer Mrs. Lydia S. Gazmen  tapno mitingenda dagiti 4 P’s members ken  pamrayanda metten kitaen no adda nagbaliwan ti kasasaad dagiti recipients.

Naipalaon iti Household Case Record ti kinasiasino ti Household Grantee iti General Intake Sheet sa maaramid ti score sheet iti Social Welfare Indicators Matrix iti pakaseknan ti Economic Sufficiency ken Social Adequacy ti Grantee.

Kalpasanna, mailanad ti natakuatan a datos iti Diagnosis and Assessment ken Treatment Plan. Iti Progress Notes, mailanad ti panagatendar ti kameng iti maang-angay a Family Development Session, naawatda a gatad, nagbaliw iti Family Information, implementasion ti Treatment Plan, dadduma a problema ken pakaseknan ti kameng.

Ti 4 P’s ket programa ti Gobierno Nasional babaen iti DSWD a kapartnerna ti LGU’s ken    naisaknap ita  iti Munisipalidad ti Cabugao  babaen ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maipamaysa a maasikaso iti panagsayaat ti kabibiag dagiti nakurapay a pamilia iti barangay. # (Web In-Action)

MITING DAGITI BNS, NAANGAY

Cabugao, Ilocos Sur – Naangay ti miting dagiti Barangay Nutrition Scholars (BNS) iti Munisipalidad ti Cabugao, Ilocos Sur  itay nabiit  a nagatendaran ti 29 a BNS iti 33 a barangay ti ili iti Municipal Conference Hall.

Kangrunaan a nataming ket iti pannakairingpas dagiti papeles  (workshop)  dagiti maseknan a kliente dagiti BNS iti tunggal masakupanda a barangay.

Nangipaay ti makainspirar a mensahe ni SB Member Dr. Carlito S. Pano, Committee Chair on Social Services kadagiti BNS. Innayonna a ti naimpapusuan a panagserbi kadagiti agkasapulan nga umili ket kaipapananna met ti pannakatun-oy ti ragsak a makatulong malaksid iti material a gunggona. Dinayawna ti natunos a panagtrabaho dagiti katinnulong ti Gobierno Lokal a mangpasayaat/mangiwanwan  iti pannakaragpat  iti agtultuloy a  salun-at ti kaaduan.

Naballigi a napagpapatangan dagiti pakaseknan ti tunggal BNS babaen iti panangrienda ti miting ni Mrs. Joenah G. Sevilleja, Municipal Nutrition Action Officer-Designate kasta met ni Miss Melanie Saquiton, JO,  a timmulong kenkuana.

Ti pannakaitandudo ti makapnek a serbisio ti  nutrision kadagiti ubbing  ket prayoridad a programa ti LGU-Cabugao nga idauluan ni Mayor Edgardo “Ediboy” S. Cobangbang, Jr., Chairman, Municipal Nutrition Council Committee tapno marimbawan  iti mal-nutrision a problema iti kagimongan. # (Web In-Action)

DALAN TI PUROK MURMURAY KEN LITTLE BAGUIO, NAKONGKRETO

Cabugao, Ilocos Sur – Iti pannaki-amad ti Web In-Action iti  Mayo 2, 2013, imbatad dagiti agindeg ti Purok Murmuray ti Sitio Paddual, Brgy. Pug-os, Cabugao, Ilocos Sur a pagyamyamananda iti Gobierno Munisipal iti panangidaulo ni Mayor Edgardo “Ediboy” S. Cobangbang, Jr. ta nairaman ti  purokda a nasemento ti dalanna. Saanen a kas idi a nalutlot ken likkaong ti pagnaanda ta sementadon ti dalanda nga agpaili.

Iti sabali a bangir, nasemento metten  ti kawatiwatan ti dalan-da iti Sitio Little Baguio iti sang-at-salog samo magteng a kabalbalayan iti pantok ti turod. Imbatad dgiti traysikelan nga idi un-unana ket paspasagadenda dagiti produktoda ken sakadaenda a lakoda iti tienda ken kasapulanda. Ngem gapu ta nairaman met a nakongkreto ti dalan, nanam-aydan nga agpaili gapu ta makabiahen ditoy ti traysikel ken lugan a dumanon  iti pantok ti turod a disso dagiti kabalbalayan.

Ti Barangay Pug-os ket idauluan ni Brgy. Captain Arnold “Bambi” Yangat. # (Web In-Action)

PASET TI SITIO BALUNGABING, NAKONGKRETON

Cabugao, Ilocos Sur – Iti pannaki-amad ti Web In-action idi Mayo 1, 2013, imbatad ni Brgy. Captain Edgar G. Sonido ti Turod Patac, Cabugao, Ilocos Sur a nasementadon ti sumrekan iti Sitio Balungabing ditoy a barangay. Impeksa ti Premiado ti Siglat Awards a Kapitan agraman kadagiti kabarangayanda iti dakkel a panagyamanna iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken ni Diputado Ryan Luis V. Singson iti pannaka-kongkreto daytoy a pagdalanan iti asideg ti Karayan Cabugao.

Ti pannakapasayaat dagiti  farm-to-market road, dalan ti sitio ken barangay road ket agtultuloy a prayoridad a  programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno nadardaras a mairuar dagiti mannalon dagiti produktoda ken manam-ayanda nga agdaliasat ken  agallatiw iti papananda ken panagpa-ilida. # (Web In-Action)

GAWAD SAKA EVALUATION, NAANGAY

Cabugao, Ilocos Sur – Naangay ti Gawad Saka Evaluation itay nabiit  babaen kadagiti pannakabagi ti Regional Technical/Search Commitee  iti Validation kadagiti Regional Nominees para iti Outstanding Rice Farmer Adopting Integrated Rice-Based Farming Systems. Immuna a nag-courtesy dagiti GAWAD SAKA Evaluators iti Opisina ni Mayor Edgardo “Ediboy” S. Cobangbang, Jr. sakbay a nagturongda iti Brgy. Turod Patac a lugar ni Mr. Sonido.

Napili ni Mr. Edgar Celestino G. Sonido ti Barangay Turod Patac, Cabugao, Ilocos Sur a maisalip iti Regional Category. Tinarabay dagiti Staff ti DA-LGU Cabugao dagiti Evaluators nga indauluan ni Municipal Agriculturist Zenaida S. Andrada agraman da Mrs. Joenah G. Sevilleja ken ni Mr. Nereo S. Daproza a  nangkasarita/nanginterbiu  ken ni Mr. Sonido.

Sakbayna, impakaammo ni OIC Regional Executive Director Valentino C. Perdido, Ph. D.,  iti DA-LGU Cabugao  a nangrugin ti Annual Search for the GAWAD SAKA Agricultural Achievers CY 2013 (National Category) iti Departamento ti Agrikultura (DA). Nainominar ni Mr. Sonido babaen iti panangabakna iti nadakamat a kategoria iti benneg ti Probinsial, Gawad Saka Search 2012 itay kallabes. # (Web In-Action)

ORIENTATION & BRIEFING DAGITI AGSERBI TI ELEKSION, NAANGAY

Cabugao, Ilocos Sur – Naaramid ti Orientation & Briefing  dagiti Board of Inspectors (Chairman, Poll Clerk ken 3rd Member) a buklen dagiti dadaulo ken  mangisursuro ti Cabugao DepEd District idi Abril 30, 2013 iti Conference Hall, Cabugao South Central School, Brgy. Bonifacio, Cabugao, Ilocos Sur.

Dagiti Principal ken Head Teachers ket agserbida nga Election Supervisors iti 33 a barangay ti Munisipalidad, segun ken ni  Acting  Election Officer Marivic A.  Castaneda iti COMELEC Cabugao.

Iti nasao nga orientation, nailawlawag dagiti pagannurotan nga intuyang ti Commission on Elections (COMELEC)  nga ipatungpal dagiti agserbi iti Eleksion Nasional ken Lokal inton Mayo 13, 2013.

Nakikaysa met iti nasao nga orientasion da Public Schools District Supervisor Helen V.  Siruno, Election Officer  Veronica B. Agcanas ken  ni   Cabugao Acting COMELEC Election Officer Marivic A. Castaneda.

Impakaammo  pay  dagiti Election Officers iti  nasao a taripnong  iti pannakaangay ti Final Testing & Sealing ti PCOS Machine inton Mayo 6, 2013. Ti Election Period ti 2013 Automated Synchronized National and Local Elections  ket masakupanna  iti manipud ti Marso 29, 2013 aginggana  iti Hunio 12, 2013.  # (Web In-Action)