INPUTS TI 15 EKTARIA A PROYEKTO, NAKASAGANAN

Cabugao, Ilocos Sur – Naisangpeten ti mausar a ganagan iti 15 ektarias a masakupan ti nagkammayet a proyekto ti Department of Agriculture (DA-RFU 1), San Fernando City, La Union ken ti Local Government Unit (LGU) Cabugao nga idauluan ni Mayor Edgardo “Ediboy” S. Cobangbang, Jr. kadagiti mannalon ti rainfed area iti Brgy. Reppa-ac-Pug-os, Cabugao, Ilocos Sur.

Iti pannaki-amad ti Web In-Action idi Hulio 2, 2013, imbatad ni Municipal Rice Program Coordinator Nereo S. Daproza a daytoy a proyekto ket napanaganan ti: “Increasing Productivity in Rainfed Areas Through Promotion of Modern Rice Farming Technologies” a naisangrat kadagiti rainfed area kas iti nadakamat a barangay. 

Segun pay  ken ni Mr. Obas Bill Y. Baclig, Project Assistant Coordinator, dua laeng nga ili ti Region 1 ken  nakapilian  ti Cabugao a pakaipakatan daytoy a proyekto. Umar-arngi met laeng ti napasamak a Farmer’s Field Schooling  iti Brgy. Pug-os, Brgy. Bungro ken maipakat ita iti Brgy. Reppa-ac ken Brgy. Dardarat.

Impadamag pay  ni Municipal Rice Program Coordinator Nereo S. Daproza nga addan  ti simmangpet a ganagan a para iti Brgy. Reppa-ac-Pug-os ket buklen ti 75 bags nga Organic Fertilizers, 15 bags ti Complete Fertilizers (14-14-14), 15 bags a 16-0-0 (Ammonium Sulfate) ken 7.5 bags a Herbicide (0-0-60). Dagitoy nga inputs ket nakapempen ita iti Dap-ayan  Center ti Brgy. Pug-os nga aywanan ni Mr. Obas Bill Y. Baclig, AT ti DA-LGU.

Innayon pay ni Mr. Daproza a naikasada ita  a Cropping Season (Wet Season 2013)   dagiti proyekto ti LGU-Cabugao-DA-RFU 1  para iti panagpatanor ti nakalidad ken eco-friendly a teknolohia  ti  pagay iti FFS Projects-Brgy. Reppa-ac-Pug-os ken Brgy.  Dardarat, Municipal Techno-Demo ti Brgy. Nagsantaan ken Brgy. Catucdaan.

Insupusop pay ni Mr. Daproza a babaen ti nakammayet a panagasikasoda iti DA-LGU ken dagiti Farmer-Cooperators-da iti project sites  ket naballigi dagitoy a maisayangkat a proyekto a mangtignay ken mangpatulad kadagiti dadduma a mannalon  iti  barangay ti Munisipalidad.
Dagitoy nga aksion ken inisiatiba  ket gubuay ti napintek a pannakailunsad ti kada cropping season ti  naregget a programa ti Rice Production  ti LGU-Cabugao nga idauluan ni Mayor Ediboy tapno di makatakatan ti suplay ti tinawen a pagtaraon dagiti umili iti bagas ken agtultuloy a  mangingato ti masapulan dagiti mannalon. # (Web In-Action)

PUNONG BRGY. TI BRGY. QUEZON, NAGSAPATA KEN NI MAYOR EDIBOY

Cabugao, Ilocos Sur – Nagsapata ni Kagawad Nida Somera Braceros a mangsukat ken ni  dati a Punong Barangay Dodjie S. Santella a nabutosan a kas kameng ti  Konseho Munisipal  ti ili a Cabugao itay napalabas nga Eleksion ti  Nasional  ken Lokal.

Nagsapata ni Brgy. Captain Braceros ken ni Mayor Edgardo S. “Ediboy”  Cobangbang, Jr. iti imatang ti Pamilia-LGU ken dagiti kameng ti Sangguniang Bayan nga idauluan ni Vice Mayor Deogracias Jose Victorino H.  Savellano kalpasan iti Flag Ceremony iti sango ti Municipal Hall idi Hulio 1, 2013.

Ni Kapitan Braceros  ket kabsat ni Waterworks Superintendent Engr. Nestor B. Somera ti LGU-Cabugao a nangimatang met ti panagsapata. Ti kabarbaro a Kapitan ket 1st  Kagawad ti Sangguniang Barangay ti Brgy. Quezon sakbay ti pannakapilina nga agtakem a Punong Barangay iti nadakamat a barangay ti Poblasion. # (Web In-Action)

MASANGO TI UMILI TI MAPAN ITI RHU URAY ANIA NGA ALDAW

Cabugao, Ilocos Sur – Iti pannakapasayaaten dagiti  kalsada a pagdaliasatan  kadagiti barangay babaen iti agdama nga Administrasion ti ili a Cabugao, Ilocos Sur, manam-ayan itan dagiti umili nga agpaili ken mapan iti Rural Health Unit (RHU) a mangipaamiris ti salun-atda.

Mangrugi ti aldaw ti Lunes agingga iti aldaw ti Biyernes ket inaldaw a maipan dagiti maladaga ken ubbing iti nadumaduma nga eskediul kadakuada nga aggapu iti barangay  para iti Immunization ken check-up. Naregget  met  dagiti RN-Heals nga agasikaso  kadagiti   kliente a   kaaduan nga  agtutubo, agkabannuag ken nataengan (babbaket ken lallakay) ken agpaamiris ti tuprada para iti Anti-TB Program ti Directly Observed Treatment Status (DOTS) a programa ti Departamento ti Salun-at (DOH)  kadagiti adda an-annayenna ti bara a maikagumaanan a maagasan no masapsapa a mataming ti maseknan. Maar-aramid pay ti pannakataming dagiti masikog nga inna para iti naballiginto  a panagpasngayda.  

Idadauluan ita  ni Mrs. Janet Sison, Public Health Nurse dagiti Nurses, RN-Heals,   Midwives ken Attendants a nasanayen nga agtaming ti masakit gapu iti napasnek  a serbisioda  iti panangasikasoda kadagiti masaksakit a pasienteda.

Dagiti aksion ken inisiatiba a maipakpakat ket gubuay ti agtultuloy a prayoridad a programa para iti napintek a salun-at  babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. a pannakatratar ti pakaseknan ti salun-at ti sapasap.  Madagdagus ti  pannakaited ti agas a mangikkat  ti sagsagabaen ti masakit tapno agbalinda  a produktibo para iti pamilia-da, komunidadda ken ilida. # (Web Situational Report)

LANDSCAPING TI SANGO DAGITI LGU BUILDINGS KEN FACILITIES, MAAR-ARAMID

Cabugao, Ilocos Sur – Iti pannaki-amad ti Web In-Action idi Hulio 1, 2013, imbatad ni Mr. Edgar  S. Balangatan, AT nga agtultuloy latta ti panang-landscape-da kadagiti pampubliko a disso ken sango ti pasdek ken pasilidad ti LGU-Cabugao tapno makaay-ayo ti buyada ken agtultuloy ti pannakadalusda babaen iti programa ti Environmental Management ti Munisipio.

Kangrunaan ti as-asikasuen  ti grupoda iti pannaka-landscape ti sango ti Municipal Garden, dagiti kabarbaro a pasdek iti amianan ti Municipal Hall, Parke,  sakaanan dagiti monumento  dagiti bannuar ken pannakamula ti kayo iti sango ti Food Court iti NISTC-Public Market.

Dagitoy nga aksion ken inisiatiba ket gubuay  ti napintek a programa ti   Environmental Management ti LGU-Cabugao tapno mapagtalinaed ti kinadalus ti aglawlaw ken mabuybuya. # (Web Situational Report)

FARMER’S FIELD SCHOOL-RICE, NARUGIAN ITI BRGY. DARDARAT

Cabugao, Ilocos Sur – Narugian ti Farmer’s Field School on Sustainable Rice Production Project  babaen ti panagbinnulig ti Department of Agriculture, Regional Field Unit (DA-RFU 1), San Fernando City, La Union ken ti Local Government Unit (LGU)-Cabugao, Ilocos Sur iti panangidaulo ni Mayor Edgardo “Ediboy” S. Cobangbang, Jr.

Segun ken ni Mr. Nereo S. Daproza, Municipal Rice Program Coordinator, dagiti sumaganad ti panggep daytoy a programa:

• Pananggun-od ti kabaelan iti panagpatanor ti pagay babaen iti aktual a kapadasan manipud iti panagbunubon agingga iti panagapit. 
•  Panangadal ti amin nga aspeto iti panagtan-ay ti pagay tapno umadu ti maapit.
•  Panangbaliw ti kadaanan a wagas ti panagmula ti pagay ket aramiden ti kabaruanan a takuat a mangingato ti matgedan.
•  Mangipasigurado ti 15% a ngatuan ti apit kada panagtalon ken 5% ti tinawen.
•  Panangpapigsa ti gimong ti mannalon ken panangnayon ti kabaelanda nga agmanehar iti naimulada a pagay.

Dagiti kangrunaan a pagwerretan  ti maisuro ket iti:  1.   Agro-ecosystem  Analysis  (AESA) 2. Palay Check Session 3. Group Dynamics 4. Panangtaming iti aktual a maduktalan iti panagadal.

Iti panglukat a sarita ni Municipal Agriculturist Zenaida S Andrada ti DA-LGU, kinaritna dagiti mannalon ti Dardarat FA nga idauluan ni Mr. Fermin S. Sesuca, Presidente, Dardarat FA nga ikagumaananda  dagiti recipients nga adalen ti maited a baro a teknolohia ti panagtalon ket iyallatiwdanto iti padada nga agtaltalon para iti sapasap a pagririnnanudan.

 Pinagyamanan met ni Mr. Sesuca iti DA-LGU, Gobierno Munisipal nga idauluan ni Mayor Ediboy ken ti DA-RFU 1 nga idauluan ni Dir. Perdido ta maikkanda iti kastoy nga adal a mangyintek ti napintas a pagbanagan iti mulada a pagay.

Malaksid kadagiti kabaruanan a teknolohia a masagsagrap ti Dardarat FA, karamanda pay kadagiti asosasion ti mannalon iti programa ti LGU-Cabugao a nakagun-od ti ramit ken makinaria iti panagtalon ken financial assistance a pangpasayaatda ti asosasionda. # (Web In-Action)

OATH-TAKING-INAUGURATION CEREMONIES, NAANGAY DITOY CABUGAO

Cabugao, Ilocos Sur – Naangay ti panagsapata dagiti Opisiales-Lokal ti ili a Cabugao, Ilocos Sur idi Hunio 30, 2013 iti uneg ti Simbaan ti Iglesia Romano  Katolika kalpasan iti naidaton a Nasantuan a Misa nga inannong ni Rev. Fr. Amador Cabaluna.

Nagsapata ni nailayon iti maikadua a Termino a  Mayor Edgardo  “Ediboy” S.   Cobangbang, Jr. a kinadua ti kaingungotna, Mrs. Jerlie Seguban-Cobangbang  ken dagiti annakda  ken kakabagianna. Pinagsapata  ni Brgy. Captain Edgardo S. Cobangbang, Sr. ti Brgy. Sabang, Cabugao, Ilocos Sur iti sidong ti altar nga inimatangan dagiti umili, natakneng a personalidad, Opisiales ti Barangay ken pannakabagi ti nadumaduma nga Opisina, Ahensia ken Sektor iti kagimongan.

CLICK HERE TO VIEW MORE PHOTOS

Iti mensahe ni Mayor Ediboy, imbatadna a babaen laeng ti panagkaykaysa  ti tulbek ti pannakagun-od ti natimpuyog a panagasenso ti ili a Cabugao.

Dinakamat ni Mayor Ediboy ti kaibatogan ti pannakaidur-as pay ti ili babaen kada Governor Chavit, Governor DV ken Governor Ryan a nakaipaaydan ti dadakkel a nagprogresuan ti ili ken manamnama   dagiti sumaganad a proyektoda a mamaglupos pay   ti Munisipalidad ti Cabugao.

Inulit ti Alkalde Munisipal ti nagyaman kadagiti umili iti naited manen kenkuana  a talek ken ayat iti maikadua a Termino-na a kas Municipal Mayor ti ili a Cabugao.

Simmaruno a nagsapata  ni Duly Elected Vice Mayor  Deogracias Jose Victorino “DJ” H. Savellano a binayabay ni Mrs. Dina Bonnevie-Savellano  ken pinagsapata ni Vice Governor Deogracias Victor “DV” B. Savellano.

CLICK HERE TO VIEW MORE PHOTOS

Naisaganad a nagsapata dagiti walo a nabutosan a kameng ti Sangguniang Bayan ti Cabugao a da:  Hon. Danilo Q. Gazmen; Hon. Vicky S. Serna; Hon. Dodjie S. Santella; Hon. Jayhan Charisma A. Tan;  Hon. Benedicto M. Savellano; Hon. Jemaima S. Tan Yee; Hon. Josefina S. Vallejo ken Hon. Carlito S. Pano. Pinagsapata ida ni Vice Gov. DV Savellano ken immimatang da Mayor Ediboy ken Vice Mayor DJ Savellano ken ti amin a naitataripnong iti uneg ti Simbaan.

Kalpasan daytoy, naangay  ti umuna a Flag Raising Ceremony iti sango ti Municipal Hall nga inatendaran ti amin a nagsapata nga Opisiales ken  nangimatang ti panagsapata.
Nangipaay ti mensahe ni Vice Governor DV Savellano ket binigbigna ti pateg ti  pannakaitultuloy ti panagprogreso ti ili ti Cabugao  ken iti Probinsia ti Ilocos Sur.

Pinagyamanan met ni Vice Mayor DJ Savellano dagiti umili  a nangipabulod ti talek  kenkuana ket dinakamatna ti serbisio nga inrugi ti apona a lalaki a nag-Mayor ti ili kasta met ken ni Vice Gov. DV a nagbalin met a Vice Mayor ti Cabugao. Innayonna a salimetmetanna daytoy a gapuananda ken naganda  babaen iti nabuslon a panagserbina iti kailianna iti Cabugao kas Bise Mayor.

CLICK HERE TO VIEW MORE PHOTOS

Nagdedenna  dagiti nagsapata nga Opisiales iti sango nga idauluan ni Mayor Ediboy  a nangimatang ti pannakaisa ti bandera ken naurnos ti  linia ti tunggal sektor a naki-flag ceremony iti panagplastarda iti  agsumbangir a paset ti sango ti Munisipio.

Kabayatanna, naisaganad ti pannakabendision  ti kabarbaro a Municipal Conference Building  babaen ti panangannong ni Rev. Fr. Amador Cabaluna. Inaramid met ni   Mayor Ediboy  ti pannakagetteng ti laso a  binayabay da  Vice Governor DV Savellano ken Board Member Jeremias “Jerry” C. Singson agraman  dagiti nagsapata nga Opisiales Lokal ken inimatangan dagiti umili. Naisaganad a nabendisionan ti kabarbaro a pasdek  ti Local and National Agencies Building iti laud ti Conference Building  babaen met laeng kada Rev. Fr. Amy Cabaluna a binayabay da Vice Gov. DV Savellano ken Mayor Ediboy agraman dagiti nagsapata nga Opisiales, Barangay Officials, Department Heads ken Personnel ti LGU-Cabugao.

CLICK HERE TO VIEW MORE PHOTOS

Iti cutting of the ribbon ti maikadua a pasdek, inaramid ni Gobernador Ryan Luis V. Singson da  binayabay ni Congressman Ronald V. Singson, First District, Ilocos Sur, Vice Gov. DV Savellano ken Mayor Ediboy.

Iti Mensahe ni Diputado Ronald V. Singson, impeksana ti panagyamanda iti naipakumit a talek iti panagserbina manen nga agpanday ti linteg a mangibagi ti Umuna a Distrito ti Ilocos Sur idiay Kongreso ti Pilipinas. Innayon ti Diputado a subadanna iti panangilungalongna iti ad-adu a proyekto ken programa a mangpasayaat ti kasasaad dagiti kadistrituanna.
Nangipaay met ti Mensahe ni Governor Ryan Luis V. Singson. Nagyaman iti ayat ken suporta dagiti umili ti Cabugao kenkuana. Bininsana dagiti maikkan ti prayoridad a programa ti panagtakemna kas iti Benneg ti Salun-at iti  pannakapasayat dagiti Ospital ti Gobierno iti Probinsia ken pannakaited ti libre nga agas;  Edukasion babaen iti pannakaited ti kasapulan a ramit ken pasilidad kadagiti agad-adal;  Livelihood Assistance babaen iti pannakaidur-as ti OTOP (One Town, One Product) ti kada ili;  Turismo;  ken Agrikultura babaen iti mainayon a pagimbagan dagiti mannalon ken mangngalap babaen iti pundo ti RA 7171.

CLICK HERE TO VIEW MORE PHOTOS

Nakikaysa met iti nasao a seremonia  da MLGO Officer V Constancia L. Quinola; ABC President, Brgy. Captain Teddy U. Soller;  dagiti School Heads ti nadumaduma a pageskuelaan-Elementaria ken High Schools ti Cabugao nga idauluan ni Public Schools District  Supervisor Helen V. Siruno; CI Director Ret. Judge Efren S. Ubungen; Former Mayors  Dely Soller-Tan ken Bendell Soller-Tan; Mr. & Mrs. Jeremy Seguban; Former Board Member Francisco A. Savellano, Hon. Tirso Savellano ken dagiti kameng ti Municipal Police Station a nangtarawidwid ti seguridad nga idauluan ni COP William N. Nerona. 

Nagpaay nga Emcee/Facilitator da SB Secretary Maxfel S. Suboc ken Mrs. Lucille S. Somera kadagiti seremonia a naaramid. # (Web In-Action) 

AGTULTULOY A SUMAYAAT TI TRANSAKSION ITI DAYO

Cabugao, Ilocos Sur – Iti pannaki-amad ti Web In-Action idi Hunio 29, 2013, imbatad ni Mr. Marciano Raciles, Jr., Presidente, Cabugao Livestock Traders Association a puminpintas ti maaramid a transaksion dagiti Koridor ken agiday-dayo ti animalesda iti Cabugao Dayo.

Kaaduan a nabubun-as dagiti mai-dayo nga ayup ket maay-ayo dagiti aggatang kangrunaan  dagiti Meat Vendors nga agpannuray ti kaaduan a magatangda ditoy Dayo ti Cabugao.

Agtultuloy met latta ti pannakikammayet da Municipal Meat Inspector Dante Naval ken Municipal Livestock Coordinator,  Dr. Melvin G. Castro, DVM iti Management ti Cabugao Dayo tapno masigud a mataming dagiti pakaseknan maipanggep ti livestock kas iti presko a karne a    maipauraga a makonsumo iti publiko ken matagiben ti salun-at dagiti dinguen ken animales babaen iti pannakaprotektarda manipud iti rumsua a sakit.

Dagitoy nga aksion ken inisiatiba ket gubuay iti napintek a programa ti Gobierno Munisipal iti livestock industry   nga idauluan ni Mayor Edgardo “Ediboy” S. Cobangbang, Jr. tapno maidur-as met daytoy a benneg ti Agrikultura ken produksion ti pagtaraon ken pagkasapulan ditoy a lokalidad. # (Web In-Action)