MAYOR EDIBOY, NAKIPASET ITI MITING TI FEDERATED FARMERS

Cabugao, Ilocos Sur – Nakipaset ni Mayor Edgardo “Ediboy” S. Cobangbang, Jr. iti Monthly Meeting ti Cabugao Federated Farmers Association nga idauluan ni Mr. Elmer Guerrero Bromeo a naangay idi Setiembre 3, 2013 iti Right-wing ti pasdek ti Munisipio.

Kangrunaan a natratar ken napagnanamingan:

1.Pannakaidagadag ti panagbayad dagiti asosasion a saan pay a nakaited ti pagrebbenganda iti soft loan tapno maka-availda iti Plant Now Pay Later (PNPL) a nabiit a nairusat a programa ti DA-LGU.

2.Pannakapasingked ti nagan ken rehistrasion ti Pederasion para iti SEC.

3.Panangsarabo kadagiti baro nga usuat kas iti panagsaganada manen  iti panagmula ti mais iti sumuno a panagmumula, dagiti maigannuat a programa ti DA-RFU 1 a kas iti Palay Shed ti Bungro FA ken iti Small Water Impounding Project ti Pug-os FA.

 

4.Ken dadduma pay a pakaseknan a na-address-an a mangpasayud ti linnangen ti asosasion iti Pederasion.

Nangipaay ti Inspirational Message ni Mayor Ediboy ket ingunamgunamna ti panagregget ti Pederasion a mangaramnid kadagiti maikanatad nga obligasion tapno makomplementaran ti Munisipio dagitoy a kalikagumda ken agtultuloy latta ti pannakikammayetda kadagiti line agencies a makaited ti pagimbagan dagiti mannalon a mayoridad nga umili ti Cabugao, Ilocos Sur. # (Web In-Action)

HYBRID RICE TI BRGY. SAGAYADEN, MAYAT TI RUBUATNA

Cabugao, Ilocos Sur – Iti pannaki-amad ti Web In-Action iti Setiembre 2,  2013, imbatad ni Mr. Edgar S. Balangatan, AT/Techno-Demo Caretaker  nga adu ti nagraep ita ti Hybrid Rice gapu iti panagballigi iti napalabas a panagtalon (Wet Season 2012)   a nakaapitanda iti 6-7 Tonelada iti maysa nga  ektaria.

Nupay adda koma  irigasion ti kasapulan ti Hybrid Rice, pagimbaganna met ti kaadda ti makinaria a mausar nga impaay ti LGU-Cabugao  iti regular a pannakapadanum dagiti mulada  a pagay. 

Iti Brgy. Sagayaden  Norte, mayat ti rubuat ti naraepan ti Hybrid iti Municipal Demonstration Farm.  Daytoy a disso ti natalon ket masakupan a barangay a destino ni Mr. Balangatan a proyekto ti LGU-Cabugao ken agpapaay a pagtuladan dagiti mannalon iti aglawlaw ti Demo Area ken dagiti aglabas.

Dagitoy nga aksion ken inisiatiba ket bunga ti napintas a “partnership” ti LGU-Cabugao nga idauluan ni Mayor Edgardo “Ediboy” S. Cobangbang, Jr.  kadagiti asosasion ti mannalon, komunidad ken  dagiti sanga ti Departamento ti Agrikultura (DA) tapno maipaayan iti maikanatad a programa a pagtuladan  para iti nadur-as a panagtalon dagiti mayoridad nga  umili ti Cabugao, Ilocos Sur. # (Web In-Action)

CLEAN AND GREEN, KANKANAYON NGA AGAKSION

Cabugao, Ilocos Sur – Iti pannakiuman ti Web In-Action ken ni Mr. Edgar  S. Balangatan, AT iti Setiembre 2, 2013, impakaammona a kankanayon a nakasagana ken agaksion ti Clean and Green Program ken Solid Waste Management Program nga imatonanna.

Kalpasan ti panagdalusda kadagiti public facilities  and  places, dalusanda ti agsumbangir nga abaga ti Kalsada Nasional manipud iti  Brgy. Sagayaden Norte agingga iti Barangay Pug-os ditoy nga ili.

Innayon ni Mr. Balangatan a rinugianda metten  ti nagdalus manipud iti aglawlaw ti  Osmena Bridge agingga idiay daya ti Kambal Lumber.    Kabayatanna, isamsamira latta met ni Mr. Balangatan a monitoren ti pagdurdur-asan ti Environmental Management Program ti Munisipio iti 33 a barangay ken 26 a pageskuelaan ti DepED Cabugao tapno mayannurot ti kalikagum ti Hepe Ehekutibo ti LGU-Cabugao iti sustenable a pannakaipatungpal dagitoy a programa ti Munisipio. # (Web In-Action)

MANAM-AYAN ITA DAGITI PARTIDOR

Cabugao, Ilocos Sur – Gapu iti kaadu ti  konsumidores ti karne iti nuang ken baka, imbatad  ni Mr. Marciano Raciles, Presidente, Cabugao Livestock Traders Association a  manam-ayan  met ita dagiti partidor nga agbirok ti partienda nga ayup para iti merkado iti tunggal aldaw ti Tienda ken saan a tienda  ta addan ti madadaan a gatangenda iti Cabugao Dayo iti aldaw ti Sabado.

Inulit  ni Mr. Raciles a magustuanda ti kinalukmeg dagiti mailako a baka ken nuang ditoy pagdadayoan  ta naisagsagana latta dagitoy ket para konsumo lattan ti kaaduan a gatangenda. Patinayon met a tumartarabay ti Municipal Livestock Inspector,  Dr. Melvin Castro, DVM agraman dagiti Personnel iti LGU-Cabugao  a mangkitkita iti pannakaiproseso ti papeles dagiti ayup sakbay a mairuarda  iti Dayo.

Patinayon  met a tumartarabay dagiti Opisiales ti LGU-Cabugao nga idauluan ni Mayor Edgardo “Ediboy” S. Cobangbang, Jr. a mangtingtingiting kadagiti posible a pagdur-asan pay  ti operasion ti Cabugao Dayo. # (Web In-Action)

113th ANNIVERSARY TI SERBISIO SIBIL, BINIGBIG TI LGU-CABUGAO

Cabugao, Ilocos Sur – Nailunsad ti panagselebrar  ti panangbigbig ti pateg ti Philippine Civil Service Commission (CSC) iti Pamilia-LGU Cabugao kalpasan ti Flag Raising Ceremony iti Flagpole Stand ti sango ti Munisipio.

Imbasa ni Mr. Dario Roy A. Siruno, Municipal Information Officer ti Mensahe ni Presidente Benigno S. Aquino III iti pakaseknan ti panangbigbig ti kaipapanan ti Serbisio Sibil kadagiti umili a Pilipino ken  kadagiti kameng ti LGU-Cabugao.

Naisaganad ti panangibasa met ni Miss Mimi  S. Sison, Municipal Human Resources Management Officer (HRMO) ti Mensahe ni Dr. Francisco T. Duque III, CSC Chairman kadagiti amin nga empleado ti LGU-Cabugao.

Kalpasanna, binuya dagiti empleado ti LGU-Cabugao dagiti naiparang nga eksena a paset ti panagselebrar iti Municipal Website iti Munisipio. # (Web In-Action)

ASSESSMENT TI MASSAGE THERAPHY, NABALLIGI

Cabugao, Ilocos Sur – Naaramid ti Assessment dagiti nagsanay iti Massage Theraphy NC II a nagkammayetan nga inwayat ti Technical Education and Skills Development Authority  (TESDA)-Vigan City  ken ti MSWDO-LGU Cabugao iti 20 a nagsanay iti nasao nga ababa a kurso.

Itay nabiit, naipaayan dagiti nagsanay iti kompleto a ramit tapno mausarda ti inadalda iti Massage Theraphy.

Iti pannakiuman ti Web In-Action ken ni Mr. Edwin R. Antolin, Assessor ken agisursuro iti Ilocos Sur Community College-Vigan City iti Agosto 30, 2013, kunana nga ibabaon ida ti TESDA-Vigan City a mangpasingked ti kabaelan dagiti nagsanay tapno mairamanda iti Certification Program ti TESDA-National Office.

Innayon ti Assessor a no maaddaanda ti sertipiko ket maikkanda ti titulo nga adda karbenganda kas nagadal itoy a paglaingan a mangted ti serbisio iti kaaduan a makasapul itoy.

Insupusop pay ni Mr. Antolin a kaaduan ita ti agkasapulan ti serbisio ti massage ket saanda a kabaelan amin  a sakupen isu a napintas met no maidur-as daytoy a trabaho ken pagsapulan.

Iti 16 a na-assessed kalpasan ti aktual a panangipakatda ti naadalda, nagraduanda ti Competent a kayatna a sawen a kabaelandan ti mangpraktis ti inadalda.

Dagitoy nga  aksion ken inisiatiba ket resulta ti nadigem a pannakikammayet ti LGU-Cabugao nga idauluan  ni Mayor Edgardo “Ediboy” S. Cobangbang, Jr.  kadagiti Ahensia/Opisina  a makatulong kadagiti agtutubo nga agkasapulan ti adal ken trabaho tapno sumayaat ti masakbayanda a makipagili. # (Web In-Action)

MATH CLASS TI UBBING, NAILEPPAS

Cabugao, Ilocos Sur – Naangay manen  ti Math Class ti napilpili nga ubbing iti 26 a pageskuelaan ti Cabugao DepED District idi Agosto 31 2013 iti Cabugao South Central School, Brgy. Bonifacio, Cabugao, Ilocos Sur a nangkuyogan dagiti nagannak/Guardians kadagiti napili nga ubbing nga agadal iti Matematika iti maikalima a Sabado nga inda panagbasa kadaytoy nga asignatura.

Daytoy ket maikanem a Sabado  a panagbasada ket nagleppas iti dayta a petsa.    Kabayatanna, masansanay metten dagiti kangrunaan a mapili nga ubbing iti tunggal pageskuelaan a maisangal iti Math Challenge a maangayto ditoy ili ti Cabugao a pakasagatan dagiti dakkel ti kabaelanna nga agpangato.     Daytoy a programa ket paset ti panangpadigem ti kabaelan dagiti ubbing babaen iti panangirusat ti Departamento ti Edukasion (DepED) tapno maisaganada para iti masanguanan a pasalip ti Matematika. # (Web In-Action)