OPLAN SUMVAC/TOURIST, EPEKTIBO PARA ITI BAKASION

Cabugao, Ilocos Sur – Maipatpatungpal ita ti Oplan SUMVAC 2014 (Summer Vacation)/Tourist Assistance Center kadagiti pannakabagi ti Linteg (Municipal Police Station) ti ili a Cabugao, Ilocos Sur babaen iti panangidaulo ni PCI Willian N. Nerona, Municipal Police Chief tapno matulongan dagiti Bisita ken Bakasionista nga agbakasion iti ili ken indibidual weno grupo nga aggapu iti sabali a lugar kabayatan a lumabasda/dumagasda  iti ili iti  panagturongda kadagti Tourist Destinations ita a   Summer Vacation.

Segun iti Hepe ti Polisia ti Cabugao, nakaalerto iti 24 nga oras dagiti kameng ti PNCO a mangkita ti Trapiko ken madadaan a mangigiya kadagiti Bisita iti direksion a turongenda iti pakaseknan iti damagenda a disso a  nangruna ita a pannakaselebrar ti Semana Santa.

Innayonna pay a paset daytoy ti tinawen a programa ti Philippine National Police (PNP) iti tunggal madanon ti bulan ti Marso agingga iti agawid dagiti bakasionista iti lugarda  iti kada tawen ken parte ti programa ti PNP  iti agtultuloy a pannakatagiben ti linak ken talna iti Munisipalidad.

Insupusop pay ti PNCO nga episiente/epektibo  dagiti Kapolisan iti trabahoda maipapan kadaytoy a banag ket agtultuloy a nasayud ken naballigi ti panangasistirda kadagiti agbakasion ditoy ili ken Probinsia. # (Web In-Action)

15-18 TI TAWENNA NGA ANAK, MAIRAMANTON ITI 4 Ps

Cabugao, Ilocos Sur -  Mairamanton  dagiti agtawen ti 15-18 nga annak dagiti kameng ti Pantawid Pamilyang Pilipino Program (4 Ps) maigapu iti K 12 Program ti Department of Education (DepEd). Iti rugrugina  ti programa, dagiti agtawen ti 0-14 laeng ti masakupan daytoy a programa ti DSWD.

Segun iti DSWD - 4 Ps Municipal Link Office-Cabugao  ket mayimplimentaren  ti Expanded Age Coverage (EAC) Program babaen iti pannakayenrol dagiti agbasa iti Elementaria ken High School a kaamaan ti 4 Ps  ket limitado ti tallo ti maala iti kada Household. Maikkan ti Cash Grant a P500 ti High School idinto ta P300 ti Elementaria ken kasapulan ti 85%  Attendance Rate-da.

Innayon ni Ms. Juliet Madriaga, DSWD Municipal Link-Cabugao  ket mangaramid dagiti Validators iti Registration dagiti kualipikado babaen iti maisayangkat a Community Assembly inton Abril 9, 2014 iti 1,716 a Potential Households iti Munisipalidad.

Innayon ni Ms. Madriaga a nabaliwan ti pagannurotan nga agpatingga laeng iti lima (5) a tawen ti kontrata ti 4 Ps Beneficiaries. Itan ket no la ket adda pay 15-18 nga annakda nga agbasa iti Elementaria ken High School ket masakupanda latta kadagiti makaawat kadagiti benepisio nga itden daytoy a programa ti Gobierno Nasional ken maipatpatungpal kadagiti Partner-LGUs iti intero a pagilian. # (Web In-Action)

BARO A PUNONG BRGY., KAGAWAD, NAGSAPATA KEN NI MAYOR EDIBOY

Cabugao, Ilocos Sur – Naangay ti panagsapata ni Punong Barangay Charlie R. Somejo ti Barangay Daclapan, Cabugao, Ilocos Sur idi Abril 2, 2014 iti mismo nga Opisina ti Mayor.

Pinagsapata ni Mayor Edgardo S. Cobangbang, Jr. ni Punong Barangay Somejo iti imatang da  MLGO Officer, Ms. Constancia L. Quinola, Vice Mayor DJ Savellano, ABC President Brgy. Captain  Thaddeus U. Soller ken ni  Baclig Brgy. Captain Carlos V. Sison ken dagiti Opisiales ti Barangay Daclapan iti nasao a seremonia ti Oath-taking. 

Naisaganad pay a nagsapata ken ni Mayor Ediboy ni Kagawad Rudy S. Cabasug a maikapito a Kagawad iti Sangguniang Barangay iti nasao a barangay iti dayta met laeng a petsa.  # (Web In-Action) 

ALS PROGRAM, NAGMENSAHE NI MAYOR EDIBOY

Cabugao, Ilocos Sur – Naangay ti Seremonia ti panagturpos dagiti agad-adal iti  Alternative Learning System (ALS) Completion Program ti Cabugao DepEd District idi Abril 1, 2014 iti Social Hall, Cabugao South Central School, Brgy. Bonifacio, Cabugao, Ilocos Sur.

Immuna a paset ti programa ti panagmartsa dagiti 51 Completers (49 a nakakompleto ti High School ken 2 nga Elementaria) a naggapu iti nadumaduma a barangay ti ili a Cabugao a  binayabay dagiti Nagannak/Guardians ken Opisiales ti DepEd ken dagiti Barangay Officials.

Iti Opening Remarks, inrepresentaran ni Kagawad Remedios S. Cruz ni Brgy. Captain Valentin S. Tuyor, Jr.  a nagsarita ket siraragsak a nangipeksa iti pannakaimatangda iti programa a mangpadayaw kadagiti nagleppas ti adal nga agtutubo.

Nangipaay met iti napateg a Mensahe ni Mayor Edgardo “Ediboy” S. Cobangbang, Jr. kadagiti agtutubo a nakaileppas ti adalda iti ALS.

Kimmablaaw ken nagyaman ni Mayor Ediboy ta adda iti kastoy a programa a mangtulong kadagiti agtutubo a mangted iti nasamay a wagas tapno maikkanda iti Edukasion. Innayon ti Ama ti Ili a kasapulan nga itultuloyda ti agadal dagitoy nga agtutubo  tapno agbalin a naranraniag ti masakbayanda a para iti pamiliada ken agbalinda a responsable nga umili. Insupusopna pay nga iti agtultuloy a maipakpakita a talek ken pammatida  iti pannakibadang ti Gobierno Lokal iti pannakaidur-as ti Edukasion ket maikkan ti ALS iti kabukbukodan nga identidad ken pagyananda iti ikub ti pagadalan ti Cabugao South Central School.

Impeksa pay ni Mayor Ediboy iti nabara a  “Congratulations-na” kadagiti nakaileppas ti adal, nagannak, mangisursuro, Barangay Officials  ken Opisiales ti Deped a naitaripnong iti daytoy a programa.

Simmaruno ti Presentation of Completers babaen ken ni Mr. Warren Sumibcay, ALS Mobile Teacher ken Confirmation of the Completers babaen ken ni Mrs. Digna Natura, Education Program Supervisor 1 ti ALS-DepED.

Kadua ni Mayor Ediboy da Mrs. Digna Natura ken Mrs. Helen V. Siruno agraman da Dr. Joan Somera ken dagiti Opisiales ti Barangay a nagi-Award kadagiti Medalia ken Sertipiko dagiti agtutubo a nakagun-od ti Accreditation and Equivalency Passers (51 Completers)

Nangipaayda  met ti Mensahe da Mr. Edgardo P. Sajonia, pannakabagi ni Mrs. Melvie S. Sajonia, Principal II, Cabugao South Central School kasta met  ni Public Schools District Supervisor Mrs. Helen V. Siruno ken ni Mrs. Digna Natura, Education  Program Supervisor 1 ti ALS. Anag ti mensaheda iti panagyamanda unay  iti Gobierno Munisipal ti Cabugao nga idauluan ni Mayor Ediboy iti pannakaited ti agtultuloy a tulong kadagiti agtutubo nga umar-araraw a makagun-od ti adal ken Edukasion. # (Web In-Action) 

PANAGDALUS ITI KALSADA KEN PASILIDAD TI LGU, AGTULTULOY

Cabugao, Ilocos Sur – Tumultulong ti grupo ti Clean and Green Program  ti Munisipio nga agdalus kadagiti kalsada ti Poblasion nangruna kadagiti Processional Routes, Pasilidad ti Munisipio (Parke ken Plaza)  tapno naan-anay ti pannakalinis ken pannakapapintas ti buya ti aglawlaw.

Kangrunaan a maikkan ti mentenansia ti panagdalus ket iti Cabugao Central Park (CCP) a daydaywen ti umili ken bisita  iti aldaw ken sardam kasta met idiay NISTC Public Market a paggatanganda iti kasapulanda.

Iti sabali a bangir, agtultuloy met a mamantener ti kinadalus ken sanitasion dagiti pasilidad nga usaren ti sapasap nga aggatang iti NISTC Public Market. Babaen ti panangilungalong ti LGU-Cabugao nga idauluan ni Mayor Edgardo “Ediboy” S. Cobangbang, Jr., napatakder ti dua a kabarbaro a Comfort Rooms (CR) iti likud ken sango ti pasdek-NISTC Public Market  tapno adda madadaan nga usaren ti publiko kabayatan nga addada a gumatgatang iti Tiendaan.

Segun ken ni MENRO Edgar S. Balangatan, AT, agak-akem a dadaulo ti grupo a kalpasan a maiwakasda iti agsumbangir ti National Highway manipud iti Brgy. Sagayaden nga  agpatingga iti Brgy. Pug-os ket  nakikoordinarda kadagiti barangay ti Poblasion tapno tumulongda nga agdalus ken agikkat iti makasipar a sanga ti kayo iti igid ti kalsada.

Innayon ni MENRO Balangatan a monmonitorenda pay iti Cleanliness and Beautification dagiti pito a Coastal Barangays a kangrunaan a pagpasiaran  dagiti  Balikbayans/bisita iti summer months babaen iti pannakikammayetda kadagiti Opisiales ti barangay kadagitoy a lugar. Tumulongda pay a mangpalinis iti agsumbangir a paset ti National Highway iti agpa-Port Salomague.

Dagitoy nga aksion ken inisiatiba ket paset ti Direktiba ti Local Chief Executive ti ili  iti agtultuloy a pannakaipakat ti panagdaldalus ken panangpapintas  iti aglawlaw ti ili a pagsayaatan ken pakairanudan met laeng iti sapasap ken panagsagana pay  iti umadani a panagpiesta ti ili iti Cabugao inton Abril 23-25, 2014. # (Web In-Action)

SENADOR GUINGONA, NAGBISITA DITOY CABUGAO

Cabugao, Ilocos Sur – Nagbisita ni Senador Teofisto Guingona  III itay nabiit ket nagkortesia iti Opisina ni Mayor Edgardo “Ediboy” S. Cobangbang, Jr. iti Municipal Hall (Presidencia), Cabugao, Ilocos Sur.

Paset iti Itineraria ni Senador Guingona iti panagpaayna a Guest of Honor and Speaker kadagiti nagturpos  nga agad-adal ita a Tawen 2014 sadiay University of Northern Philippines (UNP), Vigan City, Ilocos Sur  ken  maysa kadagiti LGUs ti ili a Cabugao a pinasiar ti nalatak a Senador kabayatan iti kaddana ditoy Ilocos Sur.

Nabara ti panangpasangbay dagiti Opisiales ti Gobierno Lokal nga idauluan ni Mayor Ediboy  iti ili a Cabugao, Ilocos Sur iti nadakamat a panagbisita ti agpampanday-linteg. # (Web In-Action)

PANAGPAADU TI SEEDLINGS, MAIGUNAMGUNAM

Cabugao, Ilocos Sur -  Ar-aramiden ita  dagiti DA-LGU Personnel iti panagpaadu ti seedlings iti ikub ti Municipal Plant and Nursery, Brgy. Baclig, Cabugao, Ilocos Sur babaen iti panangimaton  ni Mr. Robert S. Savella, Municipal Plant and Nursery Coordinator.

Segun ken ni Mr. Savella, kaaduan kadagiti napatubo a bukel ket iti Mahogany a maiyakar iti supot ket mapadakkelda babaen iti pannakasibogda iti inaldaw a nayon dagiti nagyan ti Municipal  Nursery tapno agtultuloy ti operasion ti pasilidad   a pangkomplementar ti “Clean and Green Program” ti Munisipio ti Cabugao.

Innayon ni Mr. Savella a kaduana nga agiyal-alison  dagiti Job Order Personnel ti DA-LGU ken mangsibsibog kadagiti seedlings iti inaldaw nangruna ita a panawen ti tikag. Insupusop ni Mr. Savella nga ikagumaananda a nayonan dagiti masagsagana a nagyan iti Municipal Nursery  ta ustonto no bulan a masapulda iti maimula a seedlings.

Dagitoy nga inisiatiba ket gubuay ti agtultuloy a programa ti Gobierno Munisipal iti  Clean and Green ken  Reforestation nga idauluan ni Mayor Edgardo “Ediboy” S. Cobangbang, Jr. tapno maalay-ayan ti nabara a  temperatura  ti aglawlaw babaen iti pannakanayon dagiti pinuon ti kayo a maimulamula. # (Web In-Action)