CABUGAO FLORES DE MAYO, NARAMBAKAN

Cabugao, Ilocos Sur – Narambakan ti Cabugao Flores de Mayo & Santacruzan babaen iti St. Mark the Evangelist Parish, Cabugao, Catholic Church, Cabugao, Ilocos Sur  idi Mayo 31, 2014.

Iti naaramid a programa, nagmartsa ti Outgoing Queen a ni Ms. Crisel Vallejo Cabsag, simmaruno ti panagmartsa ti Royal Court ken Opening Remarks ni Mr. Benjamin Castillo, Parish Pastoral Coordinator.

Naisaganad ti Investiture ti 30 a Princesses a nangirepresentar kadagiti Santa a Babbai agraman ken ni Queen Bhea Alexia Nono, Reyna Elena 2014. Naisaad ti Sashes dagiti Princesses ken Bouquet ken Coronet iti 1st Princess agingga iti 4rth Princess babaen kadagiti napusgan a mangisaad kadagitoy a tanda ti pammadayaw.

Kinoronaan ni Mayor Edgardo “Ediboy” S. Cobangbang, Jr. a kaduana ni Mrs. Jerlie Seguban-Cobangbang a kapisi ti pusona ni Queen Bhea,  Reyna Elena 2014.

Nangipaay ti Mensahe ni Mayor Ediboy. Kimmablaaw ken nagyaman iti kaaduan ken iti Apo a Namarsua ta naaramid manen ti panagrambak ti Piesta para iti Debosion ken  ni Apo Sta. Maria a managnaganan  iti Flores de Mayo wenno Santacruzan. Innayonna nga iti kulminasion dagitoy a panagpiesta ket ipaduyakyakna iti napintas a panagkakammayet  dagiti umili ken dagiti Parishioners ken mangital-o iti naespirituan a kasasaad dagiti umili.

Insaad ni Rev. Fr. Felix A. Costales, Parish Priest ti Cape ti Reyna  a kaduana ni Mrs. Eufrocina N. Pante ken iti Scepter ti binagi  ni Outgoing Queen Crisel Vallejo Cabsag.

Nangipaay met ti makainspirar a mensahe ni Rev. Fr. Felix A. Costales para iti sapasap.

Kalpasan ti Investiture, naaramid ti Procession dagiti kandidata ken Parishioners  iti Poblasion.

Ti panggep ti naangay a  Popularity Contest iti Flores de Mayo ket maiserbi kadagiti proyekto nga igan-gannuat ti Parokia ni San Markos Ebanghelista iti Iglesia Romano Katolika iti ili a Cabugao, Ilocos Sur.

 Nagpaay nga Emcee ni Mr. Maxfel S. Suboc iti nasao a programa. # (Web In-Action)

KASAPULAN A PARA ITI ESKUELA, NAITED

Cabugao, Ilocos Sur – Nai-turnover kadagiti School Heads/Principal  kadagiti pageskuelaan ti Cabugao DepED District nga idauluan ni OIC District Supervisor Mrs. Estrellita M. Siruno, Principal II, Cabugao North Central School agraman dagiti dadaulo dagiti Public High Schools ti ili a Cabugao, Ilocos Sur babaen iti panangiyallawat dagiti Opisiales ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti naangay  a Meeting iti Cabugao DepED Conference Hall iti Hunio 3, 2014.

Dagitoy a materiales a naited ket napagtutulagan a maiserbi iti nadumaduma a pageskuelaan maibasar iti pagkasapulanda ken nagtaud iti Special Education Fund (SEF) babaen iti pannarabay ti Munisipio.

Kangrunaan nga anag ti Mensahe ni Mayor Ediboy iti daytoy a panagtataripnongda iti  agtultuloy latta a panagtinnulong ken panagkaykaysa  ti LGU ken ti DepED a mangilungalong ken mangipatungpal kadagiti pagsayaatan iti pagadalan a pakabenepisiaran  dagiti ubbing ken dagiti umili.

Nagsarita met iti nasao a panagtitipon  ni Committee Chair on Education SBM Dr. Jemaima S. Tan-Yee.  # (Web In-Action)

MULTISECTORAL ORIENTATION TI AFC, NAARAMID

Cabugao, Ilocos Sur – Naaramid ti Mutisectoral Orientation pakaseknan ti Agriculture and Fisheries Council (AFC) kadagiti Sektor ti Mannalon, Mangngalap, RIC, 4-H Club, Mango Growers, Vegetable Growers ken dadduma pay nga asosasion ti mannalon iti Cabugao Ilocos Sur iti Hunio 3, 2014 iti Municipal Conference Hall, Cabugao, Ilocos Sur.

Nagatendar dagiti pannakabagi ti Provincial Agriculture Office, Ilocos Sur iti panangidaulo ni Engr. Jojo Acance.
Immuna a naaramid ti Opening Prayer babaen ken ni Nagsantaan FA President Roberto Sablay.

Iti nasao nga orientasion, bininsa ni Engr. Acance dagiti panggep ken ti pakabuklan ti AFC manipud iti barangay, munisipal, probinsial, ken iti rehional a benneg   kasta met dagiti mangbukel nga Opisiales agraman dagiti pagrebbenganda.

Nairaman met a nagsarita ni Municipal Rice Program Coordinator Nereo S. Daproza, AT,  ket bininsana ti programa ti Departamento ti Agrikultura (DA) iti  pakaseknan ti “Rehabilitation and Mitigation of El Nino Phenomenon on Rice Area”. Napasnek a dimngeg dagiti nagatendar.
Kalpasanna, naangay ti Open Forum. Naballigi a natratar dagiti naidatag a problema ken pakaseknan dagiti nagatendar.

Nayeskediul a maangay ti Reorganizational  Meeting ti MAFC inton Hunio 11, 2014 ken Deadline iti pannakabukel ti Barangay Agriculture and Fisheries Council (BAFC) iti tunggal Barangay inton  Hunio 6, 2014. # (Web In-Action)

MUNICIPAL e-LIBRARY, AGLUKAT ITA NGA ALDAW

Cabugao, Ilocos Sur – Nalukatan ti Municipal e-Library ita nga aldaw  Hunio 3, 2014 a masarakan iti dayaen ti Municipal Hall  ket mausar para kadagiti estudiante nangruna iti panagsukisok (research) ken kasta pay kadagiti adalenda ken dadduma a kasapulanda nga impormasion.

Daytoy a baro a pasilidad ti Munisipio ket proyekto a nagbuligan a naipasdek babaen iti panagkammayet  ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken dagiti Asosasion ti Cabugaoenians nga agnanaeden iti ballasiw-taaw. # (Web In-Action)

BARANGAY FOOD TERMINAL, MAIKKAN ITI BRGY. DARDARAT

Cabugao, Ilocos Sur – Naaramid ti pakauna a pannakaited dagiti ramit iti maipatakder a Barangay  Food Terminal iti Barangay Dardarat, Cabugao, Ilocos Sur kas iti pannakaited ti maysa a Freezer ken Refrigerator a pagidulinan ti Frozen Foods. Daytoy a proyekto ket impaay ti Department of Agriculture (DA) para kadagiti lumugar iti nasao a barangay.

Naiyawat  dagitoy a ramit kadagiti Opisiales ti Konseho ti Barangay nga idauluan ni Brgy. Captain Charles F. Garcia babaen iti panangimatang  dagiti kameng ti Sangguniang Bayan ti ili  nga isuda SBM Dr. Jemaima S. Tan-Yee;  SBM Benedict M. Savellano;  SBM Atty. Bryan Jett S. Pano ken ni SBM Josefina S. Vallejo. Naiturnover dagitoy a ramit idi Mayo 29, 2014 idiay Barangay Dardarat, Cabugao, Ilocos Sur.

Nakikaysa met dagiti pannakabagi ti DA-LGU Cabugao iti nasao a turnover. Segun ken ni Municipal Farmers Association Coordinator Nathaniel B. Galamgam, AT, a malaksid kadagiti preliminary a maited a pakabuklan ti proyekto ket maikkan pay ti Barangay iti P150,000 a seedmoney kasta met iti pannaka-renovate ti pasdek a pakaibalayan ti Barangay Food Terminal. Nakitaripnong met ni Former Barangay Captain ken MFARMC Chairman Danny S. Garcia iti nasao a turnover nga inimatangan dagiti lumugar ken dadduma pay nga Opisiales ti Barangay iti Barangay Dardarat. # (Web In-Action)

ALS PARA ITI SCHOOL YEAR 2013-2014, NALUKTAN

Cabugao, Ilocos Sur – Segun ken ni Mr. Warren Sumibcay, ALS Mobile Teacher, Cabugao South Central School, Brgy. Bonifacio, Cabugao, Ilocos Sur, adda 69 nga estudiante a nagenrol iti Alternative Learning System (ALS) iti nasao a pagadalan iti School Year 2014-2015.

Daytoy a bilang ket pakabuklan dagiti re-enrolees a saan a nakapasa iti eksamen a naaramid iti napalabas a tawen ken kabarbaro nga agbasa iti ALS a naggapu iti nadumaduma a barangay iti ili ti  Cabugao, Ilocos Sur.

Innayon ni Mr. Sumibcay a nagturongda kadagiti barangay sakbayna tapno agkalapda pay kadagiti posible  a makaraman itoy a programa. Insupusop ni Mr. Sumibcay a nairut ti pannakikoordinarda kadagiti Opisiales ti Barangay, Asosasion ken dadduma a Sektor ti kagimongan tapno maipagtengda ti kaipapanan daytoy a programa.

Mangnamnama ni Mr. Sumibcay a babaen iti suporta ti Gobierno Munisipal kadagiti programa ti DepED ket mairaman met ti dadduma pay a pakaseknan ti ALS-Cabugao tapno maidur-as daytoy a sistema ti edukasion para iti pagsayaatan dagiti umili ti Cabugao, Ilocos Sur. # (Web In-Action)   

DRY SEASON 2013-2014, NAMANTENER TI KALAWA TI NAMULAAN

Cabugao, Ilocos Sur – Segun ken ni Municipal Rice Program Coordinator Nereo S. Daproza, AT, ti DA-LGU Cabugao a namantener ti kalawa ti namulaan iti agricultural crops iti napalabas a Dry Season 2013-2014 (Nobiembre-Mayo) kas iti sumaganad:

1.1, 300 Has.  – Tabako
2.425 Has. – Mais
3.300 Has. – Nateng
4.210 Has. – Pagay
5.19nHas. – Saan a namulaan.

Innayon ni Mr. Daproza a namantener ti kalawa ti namulaan maigapu iti inisiatiba dagiti nagmula ken pabor ti paniempo ken kaadda ti makaanay a danum ken dam-eg a kangrunaan a kasapulan iti panagtan-ay dagiti naimula.

Nupay kasta, insupusop ni Mr. Daproza a mapatta-patta nga adda panagbaliw ti estatistika ti mamulaan iti sumarsaruno a cropping season maigapu iti in-inut a panagbaliw ti klima. # (Web Situational Report)