TRACK AND FIELD OVAL, AGTULTULOY A MAARAMID

Cabugao, Ilocos Sur – Agtultuloy ti pannakatrabaho ti Track and Field Oval a proyekto ti LGU-Cabugao ken iti LGU-Probinsial a masarakan iti abagatan ti Cabugao South Central School, Cabugao, Ilocos Sur.

Segun ken ni Engr. Crescencio Marcos C. Formoso a maar-aramid ti back-fill works daytoy  a proyekto/pasilidad babaen iti panangpundo ni Gov. Ryan Luis V. Singson.

Apaman a maileppasto daytoy a pasilidad ket manamnama a ditoy ti pakaangayan dagiti sports competition iti Munisipalidad ken uray iti Umuna a Distrito ti Probinsia  partikular iti Sports Program/Activities  ti DepED.

Dagitoy a pagdurdur-asan ti Sports Sector ket maigapu iti panagkammayet ti LGU-Cabugao nga idauluan ni Mayor Edgardo S. Cobangbang, Jr., Gobierno Probinsial ti Ilocos Sur  ken ti DepED iti pannakaisagana iti pagsanayan dagiti atleta ken pakaangayan dagiti pay-ayam a mangpasayaat ti pisikal ken sosial a kasasaad dagiti ubbing ken agtutubo nagngruna dagiti agbasbasa. # (Web In-Action)

FIRE PROTECTION PROGRAM, MAIKASADA ITA A BULAN

Cabugao, Ilocos Sur –Inyuna ti Bureau of Fire Protection-Cabugao nga idauluan ni Fire Marshal Inspector Elmer C. Acapuyan iti naaramid a Motorcade iti pannakairubuat ti Emergency and  Disaster  Preparedness Month ita a bulan ti Hulio 2014 babaen iti naangay a motorcade.

Buklen dagiti nag-motorcade dagiti pannakabagi ti MDRRMC, DILG-MLGOO, MHO-Cabugao, PNP-Cabugao ken iti Public Safety Personnel ti Munisipio iti nasao a motorcade ket nagrikusda iti Poblasion partikular kadagiti processional route tapno maipasagepsep iti sentido ti kaaduan iti pateg ti panagimutektek/panagsagana  a mangtiped ti taudan  ti uram.

Daytoy ket tinawen nga aktibidad a paset ti programa ti DILG-BFP a maipatungpal kadagiti Partner-LGUs ti pagilian. Kas naipangruna nga aktibidad a mangsuporta kadaytoy a tignay sakbayna  ket iti naaramid nga 1st Provincial Fire Olympics a naangay idiay DMMSU, Agoo, La Union idi Hunio 25, 2014 a nagatendaran dagiti kameng ti Barangay Fire Brigade ti Brgy. Cacadiran a nakisalip kadagiti naangay nga events iti nasao a kompetision.

Napadayawan dagiti Fire Brigade Members   iti Brgy. Cacadiran kalpasan ti Flag Raising Ceremony idi Hunio 30, 2014 iti imatang ti Pamilia-LGU  nga idauluan ni Mayor Edgardo “Ediboy” S. Cobangbang, Jr. kasta met a nakiragup  ti pannakabagi ti BFP-Cabugao.

Kanaig daytoy, impakaammo ni Engr. Nestor Somera, MDRRMC Officer a kaduana ti BFP-Cabugao a support unit iti pannakaaksion dagiti pakaseknan no tiempo ti kalamidad. Innayonna nga iti uram ket maysa a karanggasan  a didigra a pasaren ti maysa a  maseknan  ket tumulongda nga agtignay ken sumuporta a mangprebentar iti kellaat a pannakapasamak

ti emerhensia.

Dagitoy nga aksion ken inisiatiba ket maigapu iti nakaysa a panagbinnulig  dagiti Opisina ken Ahensia iti pannakaobserbar daytoy a pakaseknan iti sapasap ita a bulan ti Hulio 2014. # (Web In-Action)

DERETSO TI PANAGKURRI DAGITI POST HARVEST TI BACALL MPA

Cabugao, Ilocos Sur – Maysa kadagiti agtultuloy nga aktibidad ti BACALL MPA ket iti panagoperar ti Corn Sheller, MPDP ken  ti Flatbed Dryer-da iti nadaras a panangisagana iti mailako a   mais (amarilio ken puraw) ta uray matapoganen ti bulan ti Hulio 2014 ket adu pay laeng ti awatda nga umay agpapusi ti apitda a mais. Imbatad ni Mr. D. Reynold Sabio, Presidente  a daytoy ti pakakitaan nga agtultuloy ti panagmula ti tattao iti mais ta mabalin lattan ti late planting  nangruna kadagiti nangangato a paset ti daga  a saan a pagtalinaedan ti danum gapu iti agtultutloy a napintas a presio nga inyetnag ti Gobierno Probinsial babaen ken ni Gov. Ryan Luis V. Singson. Innayon ni Mr. Sabio a nupay adu met ti self-financed nga agmulmula ti mais ngem napateg kadakuada   iti agtultuloy a tarabay ti Gobierno Munisipal ken ti Probinsial kas iti Ryan Corn Program tapno saanda nga ikkaten ti P12 Price/Kilo a manamnama a pakasubbotan met ti gastosda  nga agmula kadaytoy a cash crop ta nadarasda la nga urayen iti  kabiitan ti 2-3 a bulan ket agapitdan.

Insupusop pay ni Mr. Sabio a malaksid iti napintas a moisture content a paltuaden ti mabilag iti Multi-purpose Drying Pavement (MPDP) ket sumursurot met ti pamagaan ti  Flatbed Dryer  (nangruna no agtudtudo)   a kayatan a  nangruna dagiti Corn Traders a gatangen.

Insupusop ti BACALL MPA President a nasayaat met no kastoy ta adda latta pagobraan dagiti miembrosda ken manaynayonan ti matgedan ti asosasionda.

Dagitoy nga inisiatiba ket maaramid a maigapu iti agtultuloy a suporta ti LGU-Cabugao ken iti Gobierno Probinsial agraman metten  ti OPAG-Ilocos Sur ken iti DA-RFO 1 iti panagmulaan ken pannakapasayaat ti merkado  ti mais ditoy ili ti Cabugao, Ilocos Sur. # (Web In-Action)

NUTRISION, IPANGRUNADA A TAMINGEN ITA A BULAN

Cabugao, Ilocos Sur – Naangay ti miting dagiti Barangay Nutrition Scholars (BNS) iti 33 a barangay ti ili a Cabugao, Ilocos Sur idi Hulio 1, 2014 iti 2nd Floor Municipal Hall, Cabugao, Ilocos Sur.

Nag-Preside iti nasao a miting ni Mrs. Joenah G. Sevilleja, Municipal Nutrition Action Officer  ket napagsasaritaanda dagiti agdama a pakaseknan ti BNS kas iti natarus  a pannakaaramid ken pannakaisubmiter dagiti reports a  pakaseknan kadagiti datos a makalap iti panagserbisioda kadagiti kalugaranda maipapan iti trabaho ti nutrision.

Nagatendar kadayta a miting da Miss Aida S. Cueto ken ni Miss Jessie Anne O. Tabut, agpada a kameng ti Municipal Operations Office (MOO)  ti 4 P’s Municipal Link-Cabugao  tapno kakinnaawatanda dagiti BNS maipapan iti programa ti Nutrision nga ipamaysada met a trabahuen ita a bulan ti Hulio 2014.

Ti Municipal Nutrition Council Committee ken ti 4 P’s Program on Nutrition ti Munisipio  ket agtinnulongda a mangaramid  kadagiti aktibidad/proyekto  a mangpapintas iti serbisio ti nutrision kadagiti 33 a barangay ti ili a Cabugao, Ilocos Sur.

Dagitoy nga aksion ken inisiatiba ket maaramid maigapu iti napintas a panagbinnadang dagitoy dua a benneg ti opisina babaen iti agtultuloy a suporta  ti LGU-Cabugao nga idauluan Mayor Edgardo “Ediboy” S. Cobangbang, Jr. tapno agtultuloy met  a maaksionan dagiti pakaseknan ti nutrision iti hanay dagiti ub-ubbing. # (Web In-Action)

1ST PROVINCIAL FIRE OLYMPICS, NAKIPASET TI BFP-CABUGAO

Cabugao, Ilocos Sur –Nakipaset ti Bureau of Fire Protection-Cabugao nga idauluan ni Fire Marshal Inspector Elmer C. Acapuyan iti naaramid a 1st Provincial Fire Olympics a naangay idiay DMMSU, Agoo, La Union idi Hunio 25, 2014 a nagatendaran dagiti kameng ti Barangay Fire Brigade ti Brgy. Cacadiran a nakisalip kadagiti naangay nga events iti nasao a kompetision.

Daytoy nga Olimpiada ket parte ti programa ti DILG-BFP Nasional ket nagpartisipar ti walo nga ili iti Probinsia ti Ilocos Sur a nakaibilangan ti ili ti Cabugao, Ilocos Sur. 

Kanaig daytoy, napadayawan dagiti Fire Brigade  iti Brgy. Cacadiran kalpasan ti Flag Raising Ceremony idi Hunio 30, 2014 iti imatang ti Pamilia-LGU  nga idauluan ni Mayor Edgardo “Ediboy” S. Cobangbang, Jr. kasta met a nakiragup  ti pannakabagi ti BFP-Cabugao.

Kangrunaan a panggep daytoy a pannakisalip dagiti Fire Brigade ket tapno mapapigsa iti pannakikaduada iti akemda, Fire Safety Awareness, ken iti  Capability Build-up. 

Dagiti kategoria a  nagay-ayamanda ket iti Straight Hose Connection, Fire Extinguisher Relay ken Bucket Relay. Dagiti nadakamat a Fire Brigade iti nangabak iti Municipal Fire Olympics a naaramid  sakbay a nakisalipda iti Probinsial. Manamnama a makipasetda iti Regional Fire Olympics  ti  nasao nga Ahensia iti masungad nga aldaw, segun pay ken  ni Fire Marshal Inspector Elmer C. Acapuyan. # (Web In-Action)

1ST MEETING TI MAFC-CABUGAO TI 2014, NAANGAY

Cabugao, Ilocos Sur – Naangay ti panagmiting dagiti kapilpili nga Opisiales ti Municipal Agriculture and Fisheries Council (MAFC) para iti Tawen 2014 iti ili ti Cabugao, Ilocos Sur nga idauluan ni Mr. Rogelio Barlolong idi Hunio 30, 2014 iti 2nd Floor, Municipal Building, Cabugao, Ilocos Sur.

Dagiti natratar ken nagpagnanamingan:

1.Suhestion para iti Fund Raising ti MAFC.

2.Imbinsa ni Municipal Agriculturist Zenaida S. Andrada dagiti agdama a programa ken proyekto ti DA-LGU.

3.Imbinsa ni Mr. Elmer G. Bromeo, Federation President ti Mannalon iti naadal ken nakitana iti 15th P4MP National Congress a nagatendaranna idiay Tuguegarao City idi Hunio 24-26, 2014.

4.Ken dadduma pay a napapateg a napagsasaritaanda a pakaseknan ti MAFC.

Dagiti kabarbaro nga Opisiales ti MAFC-Cabugao iti Tawen 2014:

Chairman -Rogelio Barlolong; Vice Chairwoman – Grenalyn Amoroso for Private Sector; Zenaida S. Andrada for Government Sector; Joenah G. Sevilleja – Secretary/ Coordinator; Treasurer – Roberto Sablay; ken Auditor – Edgar Garcia.

Napili met dagiti mangibagi iti Food Crops; Livestock; Fisheries; Women; Commercial; Agri-Mechanization; Youth Sector; Irrigation ken Cooperative. # (Web In-Action)

FINANCIAL ASSISTANCE, NAITED

Cabugao, Ilocos Sur - Inawat ni Ms. Geronima Gorospe nga agindeg iti Brgy. Salomague, Cabugao, Ilocos Sur iti gatad a P25,000  a Financial Assistance a naggapu iti DSWD Regional Office 1 iti imatang dagiti Opisiales Lokal nga idauluan ni Mayor Edgardo S. Cobangbang, Jr. iti Hunio 30, 2014.

Ti nasao a gatad ket maiserbi a pagpaagas iti asawa ni Ms. Gorospe gapu iti sakit daytoy  iti kidney.

Nakikaysa met kadaytoy a pannakai-turnover ti gatad da Vice Mayor Deogracias Jose Victorino H. Savellano; SBM Danny Q. Gazmen;  SBM Dr. Jemaima S. Tan-Yee; MSWD Officer Mrs. Lydia S. Gazmen; SBM Benedicto M. Savellano; SBM Jayhan Alcid-Tan; SBM Josefina S. Vallejo ken ni  DOH Representative Beverly Ramos. # (Web In-Action)