SOLIDARITY MEETING, NAGSARITA NI MAYOR EDIBOY

Cabugao, Ilocos Sur – Naangay ti Solidarity Meeting dagiti  Officiating Officials ken Coaches iti  intero a pagadalan ti Probinsia (Elementaria ken Sekundaria) a mangbukel ti Unit I to V maipapan iti maaramid  a lima nga aldaw (Disiembre 1-5, 2014) a pasalip ti 2014 Ilocos Sur Division Sports Competition a no sadino a ditoy ket  ag-Host ti ili a Cabugao, Ilocos Sur. Naangay ti Solidarity Meeting  iti Cabugao Cultural and Sports Complex, Cabugao, Ilocos Sur  idi malem ti  Disiembre 1, 2014.

Nagsarita ni Mayor Edgardo “Ediboy” S. Cobangbang, Jr. iti imatang dagiti Opisiales ti Sports iti DepED-Ilocos Sur nga indauluan ni Mr. Meneleo Palma, CSEE, Division Sports Coordinator.

Kimmablaaw ken nagyaman ti Ama ti Ili iti panag-Host ti ili a Cabugao ken iti naurnos a pannakaisagana iti pakaangayan daytoy a pasalip ti DepED ita a tawen. Dinakamatna ti panangkomplementar iti Gobierno Lokal ken iti Gobierno Probinsial iti programa ti Sports kadagiti agad-adal tapno maipromot daytoy a tay-ak ti paglaingan a mainayon a manghulma kadagiti ubbing nga agbalin a nalaing nga agad-adal ken mapangnamnamaan nga umili.


Innayon ni Mayor Ediboy nga iti panangidur-as  ti programa ti Sports ket kolektibo a pagbibinnadangan dagiti maseknan a sektor iti pageskuelaan ket ania man a  kapanunotan a mainayonda  a mangpasayaat pay iti pakaseknan iti benneg ti sports ket awan sabali a maisagut no di iti para iti pagsayaatan dagiti pageskuelaan ken agad-adal ditoy a lokalidad. 

Nangipaay ti Mensahe ni SBM Dr. Jemaima S. Tan–Yee, Committee Chair on Education. Unity and Friendship ti kaipapanan ti bugas ti panagsaritana.

Nagsarita  met ni SBM Atty. Bryann Jett S. Pano, Committee Chair on Sports. Kimmablaaw ken nagyaman ket bininsana ti pateg ti Sports nga agtultuloy a mangmuli iti napintas a kinnaawatan ken linnangen a mangidur-as iti panagtan-ay dagiti ubbing ken agtutubo.

Nangited ni Mr. Meneleo Palma, CSEE, Division Sports Coordinator iti instruksion kadagiti kakaduada a mangtarawidwid iti Sports Competition para kadagiti nadumaduma nga events a tarawidwidanda ken idauluanda. # (Web In-Action) 

PIESTA TI BRGY. BONIFACIO, NABALLIGI

Cabugao, Ilocos Sur – Naangay ti pannakaselebrar ti 151st  a panagkasangay ni Gat Andres Bonifacio, Bannuar a Filipino ken dadaulo ti Katipunero a nakidangadang kadagiti ganggannaet idi panawenna a naigiddan ti kaaldawan ti panagpiesta ti Barangay Bonifacio iti Nobiembre 29-30, 2014.

Sakbayna, immuna a naaramiden dagiti naiplano nga aktibidadesda  kas  iti Basketball Tournament (Inter Purok) iti November 26-29, 2014; Bingo Bonanza iti Nobiembre  9,16,23, 2014; Lantern Making Contest iti November 28, 2014;  Zumba, Parade, Day Care Night iti November 29, 2014 ken Barangay Night iti November 30, 2014.

Iti karabiyan ti Nobiembre 29, 2014, nakoronaan da His Royal Highness Glen Jacob Serrano  1st ken ni Her Majesty Queen Frincess Gwen Jacob   1st babaen iti panangkorona kadakuada da SBM Benedicto M. Savellano a nangibagi ken ni Mayor Edgardo “Ediboy” S. Cobangbang, Jr.  ken ni SBM Josefina S. Vallejo a kinaasmang ni SBM Savellano.

Nangipaay ti panglukat a sarita ni Brgy. Captain Valentin S. Tuyor, Jr.  Kimmablaaw ken  pinagyamananna iti iti agtultuloy a kinaurnos ken kinatalna ti  panagselebrar ti barangay a  pammadayaw iti  lagip ken ni Andres Bonifacio.

Nagpabuya dagiti Kindergarten Class nga imatonan ni Mr. Ferico Arcebal, Jr., Day Care Teacher. Naaramid  ti panagsala dagiti Opisiales ti Ili agraman dagiti Opisiales ti Barangay ken Bumarangay a nagparagsak iti Salonan.

Kabigatan ti Nobiembre 30, 2014 ket naaramid ti Floral Offering iti Monumento ni Andres Bonifacio sa naisaruno ti pannakaaramid ti Parlor Games, Libreng Gupit, Barangay Mass, Merienda sa Barangay ken ti Barangay Night (On the Spot Selection of Miss Barangay Night) iti karabiyan dayta a petsa.

Sangsangkamaysa met dagiti bumarangay, Opisiales-da ken agraman dagiti natatakneng nga agindeg  a  nangsarabo kadagiti nasangailida 

Ti Brgy. Bonifacio ket maysa kadagiti uppat a naprogreso a barangay ti Poblasion nga  idauluan ni Brgy. Captain Valentin Somera Tuyor, Jr.  iti agdama. # (Web In-Action)

GAWAD PAGKILALA, NAIPAAY ITI ILOCOS SUR PROVINCIAL GOVERNMENT

Gapu kadagiti programana a mangpadur-as iti sektor dagiti mangngalap, naipaayan iti pammadayaw ti gobierno probinsialitay nabiit.

Kinuna ni Bokal Pablito Sanidad, Jr. a napadayawan ti gobierno probinsial iti Gawad Pagkilala gapu kadagiti ordinansa nga impasa ti sangguniang panlalawigan a pakaibilangan ti ordinansa a mang-regulate iti panagkalap iti ipon, mang-regulate iti panagkalap iti ludong, ken iti pannakaipasdek ti fish quarantine a mangprotektar iti livelihood dagiti mangngalap.

Segun ken ni Sanidad, paborito a sida daydi Presidente Ferdinand Marcos ti ludong, a maysa kadagiti kanginaan a lames nga agbalor manipud iti P2,500-P3,000 kada kilo ken maibilangen a maysa kadagiti endangered specie ti lames iti Kailokuan.

Kinuna ni Sanidad a babaen ti pannakaipasdek ti checkpoint iti Sinait, Narvacan, ken Tagudin, masiputan dagiti fish products a sumsumrek iti probinsia manipud kadagiti sabali a probinsia.

Kinuna ti bokal nga imbes a gatgatangentayo dagiti lames nga aggapu iti bukod a karayan ti sabali a probinsia, napimpintas a datayo laengen ti mangsuplay kadagiti kasapulan a lames a gatangen iti probinsia tapno adda agpaay a livelihood dagiti mangngalap iti Ilocos Sur.

Kinuna ti chairman ti committee on agriculture a dagitoy nga impasa a linteg ti sangguniang panlalawigan ti nagbatayan ti Bureau of Fisheries and Aquatic Resources (BFAR) a nangited iti pammadayaw iti gobierno probinsial.

Kinuna pay ni Sanidad a paneknekan daytoy nga award a ti gobierno probinsial ket sisasagana ken siaannugot a tumulong kadagiti napipintas a programa ti BFAR para kadagiti mangngalap.

Malaksid iti probinsia ti Ilocos Sur, inawat met ti LGU-Cabugao, Vigan City, ken UNP Laboratory School Science Club ti Gawad Pagkilala Group Category.

Inyawid pay ti Ilocos Sur Polytechnic State College ti Sta. Maria Campus, LGU-Sto. Domingo, ti Maritime Police Station, ken ti Barangay Mindoro, Vigan City ti Gawad Pasasalamat Group Category .

Inyalat pay ti LGU-Sinait babaen ti Barangay Dadalaquiten Sur Fish Sanctuary ti Healthiest Fish Sanctuary; idinto a kaadduan met iti bilang iti rehistrado a mangngalap ti LGU-Sta. Cruz.

Kadakkelan ti insalipna a lames ti Luba Fishermen’s Association ti Sta. Lucia, idinto a second runner-up iti cooking contest ti Suksukit RIC ti Sto. Domingo, ken karaman iti top 3 ti Lussoc, Sto. Domingo iti sabali pay a pasalip.

Kanaig daytoy, maysa a resolusion ti impasa ti sangguniang panlalawigan a mangipaay iti komendasion kadagiti napadayawan nga LGUs ken NGOs. # (Adapted, Tawidnews)

DepED REGIONAL DIRECTOR, NAGBISITA DITOY CABUGAO

Cabugao, Ilocos Sur  - Bimmisita ni DepED Regional Director Teresita Velasco ti Region 1 ditoy ili a Cabugao, Ilocos Sur itay nabiit.

Pinasangbay dagiti Opisiales/Mangisursuro  ti Cabugao DepEd District nga idauluan ni Public Schools District Supervisor Estrellita M. Siruno, Principal II, Cabugao North Central School  a kaduana dagiti School Heads iti nadumaduma a pageskuelaan ti ili. Nairaman pay iti grupo ti Regional Director da Mr. Anselmo Aludino, Assistant Schools Division Superintendent ken ni Mr.  Meneleo Palma, Division Sports Coordinator ti Ilocos Sur.

Binisita ti DepED Director ti Cabugao District Athletic Oval a pakaangayan ti Division Schools Sports Competition (Provincial Meet) ti Ilocos Sur ita a  Tawen 2014. # (Web In-Action)

BARANGAY NIGHT TI BRGY. BONIFACIO, NAGATENDAR NI MAYOR EDIBOY

Cabugao, Ilocos Sur – Naangay ti pannakaselebrar ti 151st Birthday Anniversary ni Andres Bonifacio, Bannuar a Filipino ken dadaulo ti Katipunero a nakidangadang kadagiti ganggannaet idi panawenna a naigiddan iti kaaldawan ti panagpiesta ti Barangay Bonifacio, Cabugao, Ilocos Sur idi Nobiembre 30, 2014.

Immuna a naaramid ti “Diana” iti parbangon iti dayta nga aldaw ket nagrikusda a nagtokar  iti  barangay ti grupo ti banda. Naisaganad ti naruay nga aktibidades a nangparagsak iti panagpiesta ti barangay.

Karabiyanna, naangay ti pasala iti las-ud ti  Covered Court. Nakulminar ti Piesta babaen iti pannakakorona ti “Queen of the Night 2014”  babaen ti panangorona da Mayor Edgardo “Ediboy” S. Cobangbang, Jr. ken ni Vice Mayor DJ Savellano agraman dagiti kaasmangda  iti Reyna ken First Runner-up. Nasangaili ti Piesta  ni Bokal Edgar Yabes ken timmarabay met dagiti kameng ti Konseho Munisipal ti ili a Cabugao a nakipagragragsak iti dayta a rabii.

Naaramid pay ti Parade of all NGO’s ti barangay kas iti 4 P’s, 4-H Club, RIC, Farmers, PWD’s ken Senior Citizen ken inannong ni Mayor Ediboy ti Mass Oath-taking dagiti Opisiales dagiti nadakamat nga NGO’s.

Nagpaay a Guest Speaker ni PSWDO Ferdinand R. Concepcion.

Naited met ti gunggona dagiti nangabak iti Inter-Purok Basketball Competition ken  ti Lantern Making Contest. # (Web In-Action)

1ST DAY TI PROVINCIAL MEET 2014, AGSANGPET DAGITI DELEGADO

Cabugao, Ilocos Sur – Naisaganan  ti Track and Field Oval/Athletic Ground iti Cabugao South Central School, Bry. Bonifacio,  Cabugao, Ilocos Sur para iti kompetision-sangaprobinsiaan ti elementaria ken sekundaria a benneg iti Ilocos Sur.

Sakbay daytoy, naaramid ti General Assembly Meeting ti Parent-Teachers Association ti Cabugao South Central School para iti Clean-up Drive iti uneg ken aglawlaw ti masakupan ti eskuela ken ti  Cabugao Athletic Oval tapno naan-anay a maisagana ti nasao a pasilidad iti panangrugi ti kompetision.

Kanaig daytoy, nagtignay met dagiti kameng ti MDRRMC nga idauluan ni Engr. Nestor B. Somera iti pannaka-pruning dagiti sanga dagiti higante nga aruo iti sango ti pagadalan para iti naan-anay a seguridad dagiti ubbing ken Atleta.

Imbatad ni Mrs. Melvie S. Sajonia, Principal II ti CSCS nga naindaklan unay daytoy a pasamak ditoy ili ti Cabugao ta idi laeng 1965, segun kadagiti nataengan a napasamak ti Provincial Meet ditoy nga ili ket maikadua a gundaway iti agdama.

Innayonna a manamnama a mausar dagiti pasilidad ken pageskuelaan ti Cabugao Institute, Cabugao South ken North Central School, Cabugao National High School ken ti Pug-os National High School para iti Quarters dagiti Delegado nga aggapu iti nadumaduma nga ili.  Insupusopna pay a malaksid kadagiti Atleta ket kumuyog pay dagiti maseknan a mangisursuro kadagita a pagadalan nga agatendar kadaytoy a naindaklan a pagteng iti pakasaritaan ti salip ti sports iti Probinsia ti Ilocos Sur a mapasamak ditoy ili a Cabugao. # (Web In-Action)

DEC. 16, CHRISTMAS PROGRAM TI SENIOR CITIZENS

Cabugao, ilocos Sur – Nagmiting dagiti Opisiales ken Kameng ti Cabugao Federated Senior Citizens itay nabiit ket napagmimitinganda iti panangselebrarda ti Christmas Season 2014 inton Disiembre 16, 2014 idiay Cabugao Cultural and Sports Complex, Brgy. Rizal, Cabugao, Ilocos Sur.

Impakaammo ni Mr. Bonifacio Somera, Presidente nga agatendar ti amin a Senior Citizens ti ili iti dayta a naindaklan nga aldaw ket awisenda pay dagiti Opisiales ti ili a katinnarabayda nga agrambak iti Paskua 2014.

Malaksid iti napagtutulaganda a maisaganada iti dayta a petsa ket naprogramaan pay dagiti nagkasangay iti bulan ti Nobiembre ket naikkanda iti sagut manipud iti kakaduada. Nakitinnarabay met dagiti Staff ti MSWDO nga idauluan ni Mrs. Lydia S.  Gazmen, MSWD Officer ken ni Mrs. Leonora G. Reintar, MSWD Assistant kadayta a panagselebrar.

Innayon ni Mr. Somera a trinatarda pay a nasayaat iti maipapan iti napintas a koleksion ti Saranay-da tapno up-to-date iti pannakaited ti tulong kadagiti maseknan a mabenepisiaran. # (Web In-Action)