BALLIGI KEN PANAGYAMAN, PAKAIDAYAWAN ITI SAPASAP

Cabugao, Ilocos Sur – Kalpasan ti Flag Ceremony iti Pamilia LGU-Cabugao iti Abril 6, 2015 iti sango ti Municipal Hall, nagsarita  ni Mayor Edgardo “Ediboy” S. Cobangbang, Jr. iti imatang ti Pamilia-LGU   ket 

kimmablaaw ken pinagyamananna manen ti naballigi a pannakaipatungpal dagiti pagrebbengan ti nadumaduma a Departamento ti LGU-Cabugao kasta metten kadagiti nakasalinong nga Ahensia kabayatan ken kalpasan ti napaut a bakasion iti Nangina nga Aldaw (Semana Santa 2015). 

Innayon ni Mayor Ediboy a dinakamat iti panangipamatmat dagiti umili iti natunos a panagsaganada/pannakikammayetda kadagiti agrebbeng iti idadateng ti kalamidad partikular iti “Bagyo Chedeng” a nanipud pay idi aldaw ti Martes (Marso 31, 2015) nga naipadpadamag ti idadatengna. 

Kanaig daytoy, imbatad ni MDRRMC Officer Engr. Nesto B. Somera a nanipud pay idi Abril 1, 2015 a nakasagana ken nakadeploy ti MDRRMC Skeletal Force a buklen ti 33 a kameng  agraman ti 16 a kameng ti WASAR Trained  nangruna kadagiti barangay nga asideg ti kabaybayan (Brgy. Pug-os ken Sabang) tapno maprebentaran iti saan a nasayaat a mapasamak iti idadateng ti nasao a kalamidad iti pannakaselebrar ti napaut a Holiday Season (Semana Santa).

Pinadayawan pay ti Ama ti Ili iti Kapolisan ken dadduma pay a sektor wenno grupo a timmulong   iti naballigi a pannakaselebrar ti Semana Santa 2015 babaen iti SUMVAC 2015.

Indanon pay ti Alkalde Munisipal ti komendasion ni Governor Ryan Luis V. Singson iti agtultuloy a kinamanagsagana dagiti mangiturturong iti pannakasalaknib dagiti umili iti umay a kalamidad iti ili a Cabugao babaen iti pannakikammayetda iti PDRRMC.

Dinakamat pay ti Municipal Chief Executive iti makapasayaat-rikna a damag manipud kadagiti agbakbakasion ita a Balikbayan iti ili iti napintas a pannakapasangbayda ken pannakaasikasoda a kas kliente ditoy Munisipio ket inggunamgunam ni Mayor Ediboy a mataginayon koma latta dagitoy a tagipatgen a galad iti sapasap.  

Innayonna a dagitoy a nagun-od ket kolektibo iti nakaigapuananna ket maipaay ken agserbi a dayaw ti ili ken iti kaaduan iti nasao a gapuanan.

Insupusop ti Alkalde Munisipal a kasapulan latta a makomplementaran iti napintas a serbisio dagitoy a pagrebbengan tapno agtultuloy a maragpat dagiti nasasayaat ken napintas a pagbanaganna a mangitunda iti  pagsayaatan  ti sapasap. # (Web In-Action)

BIERNES SANTO, KANGRUNAAN NGA ALDAW TI PANAGNGILIN

Cabugao, Ilocos Sur – Kaaduan nga umili ti nagintek iti pagtaenganda ken iti  simbaanda  nangruna iti ala una ti malem (1:00-2:00 P.M.) idi Abril 3, 2015 a pannakaselebrar ti Biernes Santo iti   pannakaparigat ken pannakatay ti pisikal a bagi ti Mannubbot a ni JesuCristo.

Kaimportantean a paset nga inimdengan ti sapasap ket iti “Siete Palabras” a naipabuya/naipangngeg iti uneg ti Simbaan  kasta pay kadagiti radio ken telebision a  nakabuklan dagiti balikas  a napnuan kaipapanan iti biag ti Kristiano a naasut iti ngiwat ti Mannubbot sakbay a nagsatan iti Krus.

Kalpasanna, naaramid ti pannakailibut ti Rebulto ti naidasay a Mannubbot a kakaduana dagiti Sasantos  iti aglikmut ti Poblasion babaen iti Simbaan Romana Katolika ken ti Iglesia Filipina Independiente (IFI) a binayabay ti kaaduan nga umili. Dagiti saan a nakasurot iti libut ket nagtakder,  nagurayda iti igid ti kalsada ken highway  ken iti tawada a kabuyog ti nakapasged a kandela  ket binuyada   ken nakipagtamedda iti ar-aramiden dagiti nakiprosesion.

Iti sabali a bangir, adu met latta dagiti bakasionista kadagiti resort ken beaches ngem kaaduan ti napan nakipagpartisipar nga umili iti aktibidades iti  simbaanda. 

Manipud idi Mierkoles Santo agingga iti Domingo Sabet (Abril 5, 2015), imbatad ti Municipal Police Station babaen iti SUMVAC 2015  a  “Very  Normal” ti kasasaad ti linak ken talna iti intero a Munisipalidad iti pannakaselebrar ti Semana Santa 2015. # (Situational Report, Web In-Action)

RECIPIENTS, NAKAAWATDA ITI EXTENDED AICS

Cabugao, Ilocos Sur – Naipaayan manen   ti  Extended Aid to Individual in Crisis Situation (Ex-AICS) a programa ti DSWD-Region 1 a pakikammayetan dagiti  Opisina ni Congressman Ronald V. Singson  ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. para iti  19 a maseknan nga umili  nga agnanaed iti nadumaduma   a barangay ti ili a Cabugao, Ilocos Sur idi Abril 1, 2015. 

Naaramid ti turn-over dagitoy a tulong babaen kada MSWD Officer Mrs. Lydia S. Gazmen ken ni SBM Atty. Bryann Jett S. Pano, Committee Chair on Social Services kadagiti maseknan a recipients    iti nadakamat a petsa iti  pasdek ti SB-ABC Hall  karaman iti pannakabagi ti DSWD Region 1.

Dagitoy a naited a tulong   ket maaramatda iti nagduduma a pakasapulan a kas iti Burial, pang-Medical ken kanaigna a pakaseknan   ken nakaawatda a maigapu iti kinakurapay a maibasar iti National Household Targeting System nga inwayat ti DSWD iti kallabes a Tawen. # (Web In-Action)

2-DAY SEMINAR-WORKSHOP ITI CHT, NAANGAY

Cabugao, Ilocos Sur – Naangay ti 2-Day Seminar-Workshop: Orientation on Kalahatan Pangkalusugan (KP) kadagiti kameng ti  Barangay Nutrition Scholars (BNS’s); Barangay Health Workers (BHW’s); ken dagiti Parent-Leaders ti 4 P’s a naggapu iti 33 a barangay ti ili a Cabugao, Ilocos Sur idi  Marso 30-31, 2015 iti Municipal Conference Building, Cabugao, Ilocos Sur.

Naluktan ti seminar babaen iti panagsarita ni Ms. Beverly Ramos, DOH Representative ti ili a Cabugao. Nangited ti pamalpalatpatan ni Mrs.  Janet Sison, Public Health Nurse ti RHU-Cabugao maipapan 

iti agdama a kasasaad dagiti Community Health Team (CHT’s) kadagiti barangay a buklen dagiti nagseminar, Committee Chair on Health ti Konseho ti Barangay ken dagiti RN-Heals Nurses a mangtartarabay kadakuada.

Nakitinnulong met a naglektiur dagiti Staff ti Provincial Health Office. 

Nangibinglay met ti pammalagip ken adal ni Dr. Bernardino P. De Gracia III, Municipal Health Officer.

Kangrunaan a panggep ti seminar iti pannakaited dagiti baro nga adal ken pakaseknan dagiti akem  dagiti kameng ti CHT iti tapno adda pamalpalatpatanda kadagitoy a nayon ti pagrebbenganda iti panagserbisioda iti sapasap ken iti kabarangayanda.

Nakitinnarabay  met ni Mayor Edgardo “Ediboy” S. Cobangbang, Jr. iti maikadua nga aldaw ti seminar ket imbinsana dagiti pangkomplementar kadagiti gapuanan ken serbisio nga it-itden dagiti CHT’s kasta metten  kadagiti pannakabagi ti Provincial Health Office ken iti DOH.  # (Web In-Action)

1-DAY SEMINAR-WORKSHOP ITI GAD, NAANGAY

Cabugao, Ilocos Sur – Naangay ti 1-Day Seminar-Workshop: Gender and  Development Cum Team Building kadagiti kameng ti Rural Improvement Club (RIC);  Barangay Nutrition Scholars (BNS’s); Barangay Health Workers (BHW’s); Parent-Leaders ti 4 P’s a naggapu iti 33 a barangay ti ili a Cabugao, Ilocos Sur idi Marso 31, 2015 iti 2nd Floor, Municipal Hall, Cabugao, Ilocos Sur.

Naluktan ti seminar babaen iti panagsarita ni Ms. Constancia Lazo Quinola, LGOO V ken agdama nga MLG Officer ti ili a Cabugao. Nangited ti pammalagip ni MSWD Officer Mrs. Lydia S. Gazmen maipapan 
iti Gender and Development (GAD). 

Naglektiur met ni PO2 Bernadette R. Aquino maipapan kadagiti kalintegan ken karbengan dagiti babbai a sinaguday dagiti mainaig nga Akta Republika a linteg a napanday iti Kongreso.

Nangibinglay met ti pammalagip ken adal ni Dr. Bernardino P. De Gracia III, Municipal Health Officer.

Kangrunaan a panggep ti seminar iti pannakaited ti adal kadagiti kababaihan tapno adda pamalpalatpatanda kadagitoy a nayon ti pagrebbenganda iti panagserbisioda iti sapasap ken ti pamiliada . # (Web In-Action)

SELEBRASION TI SEMANA SANTA 2015, NARUGIAN

Cabugao, Ilocos Sur – Natalna ken nasolemnidad ti rugi ti selebrasion ti Semana Santa  kadagiti umili ti Cabugao, Ilocos Sur (Marso 29, 2015-Abril 5, 2015). Daytoy ti nangital-o ti karirikna dagiti umili ken  bakasionista iti  kangitingitan dagitoy a “Nangina nga Aldaw” tapno maipasnekda ti agselebrar iti sidong ti pamilia, gagayyem  ken kakabagianda.

Naaramid ti Estasion Heneral idi malem ti Martes Santo, Marso  31, 2015 ket naaramid ti libut babaen kadagiti Parishioners ti  Iglesia Romano Katolika ken  ti Iglesia Filipina Independiente (IFI). 

Iti unos dagiti aldaw a masakupan ti Semana Santa, agtultuloy a natalna ti kasasaad  dagiti umili ken naannayas ti turong ti  trapiko iti amin a direksion a pagaaduan ti tao: iti Simbaan, Kalsada Nasional, Beach/Resort ken idiay Tiendaan.

Kanaig daytoy, iti pannaki-amad ti Web In-Action, imbatad ti Cabugao Municipal Police Station  a naannayas ti pannakaipakat ti Summer Vacation (SUMVAC 2015) ken iti akem ti Tourist Assistance Center ti Kapolisan  iti Munisipalidad.

Innayon ni Engr. Nestor B. Somera, MDRRMC Officer a naki-koordinarda kadagiti law enforcing groups  iti pannakitinnulongda iti maipapan iti First Aid ken  Rescue Team  nangruna kadagiti Coastal Barangay a disso dagiti Tourist Destinations ken Beach Resort a papanan dagiti Turista ken B akasionista kadaytoy  a selebrasion ti Holy Week 2015. #  (Web Situational Report) 

SUPPLEMENTAL FEEDING PROGRAM TI LGU, DAKKEL TI NAITULONGNA

Cabugao, Ilocos Sur –Nagleppas ti Supplemental Feeding Program ti Munisipio itay bulan ti Marso 2015 nga impatungpal ti MSWDO nga idauluan ni MSWD Officer Mrs. Lydia S. Gazmen kadagiti Day  Care Pupils kadagiti barangay ti ili a Cabugao, Ilocos Sur iti unos ti innem a bulan iti panagbabasada iti Tawen 2014-2015 (Oktubre - Marso 2015).

Iti pannakiuman ti Web In-Action ken ni MSWD Officer Lydia S. Gazmen, kunana a naballigi ti implementasion ti Supplemental Feeding Program ket maulit manen iti sabali nga innem a bulan a panagbasa ti ubbing iti Tawen 2015. Innayonna a kinomplementaran met  dagiti Day Care Workers (DCW) iti napasnek a panagserbida a nangiwanwan kadagiti ubbing nga aywanda tapno naan-anay ti balligi ti panggep ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a panangmulida iti panagtan-ay dagiti ubbing para iti naraniag a masakbayanda. # (Web In-Action)