DUA A BATCH TI SKILLS TRAINING, NAGLEPPAS

Cabugao, Ilocos Sur – Naaramid ti seremonia ti panagleppas ti 1st ken 2nd Batch ti Cosmetology Skills Training iti Setiembre 1, 2015 a ditoy nga inatendaran dagiti Opisiales ti Ili nga idauluan ni Mayor Edgardo  “Ediboy” S.  Cobangbang, Jr. ken dagiti Konsehales ti ili nga isuda SBM Danny Q. Gazmen; SBM Vicky S. Serna, SBM Dr. Jemaima S. Tan-Yee,  SBM Josefina S. Vallejo, SBM Jayhan Alcid-Tan, SBM Benedicto M. Savellano ken ni SBM Atty.  Bryan Jett S. Pano, Committee Chairman on Social Services. 

Naaramid ti 1ST Batch Cosmetology Skills Training (Manicure, Pedicure, Foot Spa ken Hands Spa)   kadagiti 4 P’s Beneficiaries ti Brgy. Namruangan ken Barangay Sabang, Cabugao, Ilocos ket naaramid  daytoy idi Agosto 10, 2015 agingga iti Agosto 15, 2015 iti Municipal Conference Building, Cabugao, Ilocos Sur.

Naangay   met ti 2nd Batch Cosmetology Skills Training iti lima nga aldaw  para kadagiti 4 P’s Trainees  kadagiti  Brgy. ti Dardarat,  Daclapan, Turod ken Salapasap,  Cabugao, Ilocos Sur idi Agosto 24-28, 2015 iti Municipal Conference Building met laeng.

Nangipaay ti Mensahena ni Mayor Edgardo “Ediboy” S. Cobangbang, Jr. Pinagyamanan ni Mayor Ediboy ta immuna manen ti ili a Cabugao a nakaaramidan daytoy a pa-Training ti DSWD ket dakkel a tulong ti intedna kadagiti nagsanay ta malaksid nga iti DSWD  ti kangrunaan a naggastos ket nasukatan pay ti pinagplete dagiti immay nag-training.

Imbatad ti Ama ti Ili a sabsabali a talaga dagiti nagsanay/kakailianna  no ikomperar iti sabsabali nga ili ta natallugodda a makisinnabat iti programa ti DSWD ket dakkel a pakaidaydayawanna ken  kasta metten  dagiti kailianna kadagitoy a maited a pagimbagan dagiti kailianna.

Iti Programa, nagsarita ti tunggal maysa dagiti nagatendar a Konsehales ket kimmablaaw ken nagyamanda ta maimatanganda met daytoy a panagleppas ti 67 a Trainees ita a Setiembre 1, 2015. Anag ti mensaheda iti panangituloy, agtultuloy a pan agsursuroda latta,   panangipateg dagiti nagsanay kadagiti inadalda a maibilangen a pagsapulanda a mangnayon iti matgedanda a para kadakuada ken iti pamiliada.

Sakbayna, nai-award dagiti tool kits ti 1st Batch dagitoy a nagsanay idi Agosto 10, 2015 iti Municipal Conference Building babaen iti panangimatang dagiti Opisiales ti ili nga idauluan ni Mayor Edgardo “Ediboy” S. Cobangbang, Jr. idinto ta naited kadagiti 2nd Batch ti tool kits-da iti Setiembre 1, 2015.

Umabot ti 67  a 4 P’s ti nangileppas kadaytoy a kurso nga inggannuat ti Sustainable Livelihood Program ti DSWD ken nakikammayetan ti LGU-Cabugao para kadagiti makasapul ti panggedanda a marigrigat nga umili  kadagiti Coastal Barangay ti ili.

Iti nasao a ceremonial activity, nakikaysa met  da MSWD Officer Mrs. Lydia S. Gazmen; Mrs. Wilma S. Cruz, Focal Person ti SLP Cabugao ken ni Mr. Dennis P. Aguimbag, SLP-PDO ti SLP-DSWD kasta metten dagiti Staff ti MSWDO-Cabugao ken ti 4 P’s  Municipal Link-Cabugao. # (Web In-Action)

FARM MACHINERIES, NAGUN-OD TI ASOSASION TI DUA A KOOPERATIBA

Cabugao, Ilocos Sur – Naaramid ti pannakaidagas dagiti Farm Machineries kas iti Hand Tractor with Complete Accessories ken Rice/Corn Thresher  a nagun-od ti Arnap Sunrise MPCI, Inc. idinto ta 1 Unit Rice/Corn  Thresher met ti naala dagiti Opisiales/Kameng ti New Maradodon MPCI, Inc. iti sango ti Munisipio (Presidencia) nga inimatangan dagiti Opisiales ti ili nga idauluan ni Mayor Edgardo “Ediboy” S. Cobangbang, Jr.  ken dagiti kameng ti DA-LGU a  nangbayabay  iti  Ama ti Ili idi malem ti Agosto 28, 2015.

Kinuna ni Mayor Ediboy a katinnarabay ti LGU-Cabugao dagiti Asosasion a mangmanehar ken mangmantener kadagiti naited a makinaria ket no mapadakkel ti nairanta  a pakausaran dagitoy a maited a ramit ket apalanto ti sumarsaruno a henerasion ket papananna  nga agturong ti sektor dagiti asosasion a naballigi dagiti irusatda a programa ken proyekto a pagsayaatanda.

Impeksa da Ms. Emily Solis, Manager ti Arnap Sunrise MPCI  ken ni Mr. Ceferino R. Suboc, pannakabagi ti New Maradodon MPCI iti panagyamanda iti pannarabay ti LGU-Cabugao ken iti Department of Agrarian Reform (DAR) a nangipaay kadagitoy a makinaria ket agyamanda iti panagtalek a naited kadakuada ket isublida a sipupudno babaen iti napintas a panangtaripatoda kadagitoy a makinaria.

Nakikaysa met ni ABC President Thaddeus U. Soller iti nadakamat a panangimatang kadagiti naisangpet a makinaria.

Kabayatanna, ni  Mayor Ediboy ti Chairperson iti Municipal Cooperative Council a mangtartarabay kadagiti kooperatiba iti ili a Cabugao ken ni met Mr. Nereo S. Daproza ti agpapaay a Municipal Cooperative Coordinator. # (Web In-Action) 

MAIKATLO A SABADO TI MATH CLASS, RUMEGREGGETDA

Cabugao, Ilocos Sur – Naangay ti Math Class iti  dua a dadakkel  a pageskuelaan ti Cabugao DepED District iti intero a Munisipalidad ti Cabugao idi Agosto 29, 2015. Dagiti dua  a pageskuelaan ket   iti Cabugao South ken North Central School a pannakasentro ti Math Class kadagiti pageskuelaan  ti ili a Cabugao, Ilocos Sur.

Iti pannakiuman ti Web In-Action idi Agosto 29, 2015, imbatad dagiti kaaduan a nagannak/guardians kadagiti napili nga ubbing a naanus a nagbantay iti ruar ti klase a maragragsakanda ta maipamaysa a masanay dagiti annakda iti Subject a Math.

Kadagiti met ubbing a nairaman kadaytoy a panagsanay ket kayatda met a takuatan ti kabaelanda ken maibilang a parte ti pannakadisiplinada daytoy nga aktibidad nga iwayat ti DepED.

NASANTUAN A MISA, NAARAMID ITI BULAN TI SETIEMBRE 1, 2015

Cabugao, Ilocos Sur – Naaramid ti Nasantuan a Misa para iti bulan ti Setiembre 2015  babaen iti panangannong ni Rev. Fr. Felix Costales, Parish Priest, St. Mark the Evangelist, Cabugao, Ilocos Sur itay nabiit nga inatendaran dagiti kameng ti Pamilia LGU-Cabugao nga idauluan ni Mayor Edgardo “Ediboy” S. Cobangbang, Jr. iti SB-ABC Hall iti amianan ti pasdek ti Munisipio.

Ti pannakaangay ti Nasantuan a Misa ket binulan a maar-aramid ditoy Munisipio a kas pangitandudo ti Pamilia-LGU iti Espiritual a paset ti panagserbisioda  ken panangipaayda  iti panagyaman iti naruay a parabur nga it-ited ti  Apo a Namarsua iti sapasap ken mabalanse iti material ken espiritual a kasasaad ti tunggal maysa.  # (Web In-Action)

115th ANNIVERSARY TI SERBISIO SIBIL, MAKIPAGSELEBRAR TI LGU-CABUGAO

Cabugao, Ilocos Sur – Kalpasan ti Flag Ceremony idi Setiembre 1, 2015, impakaammo ni Miss Teresita Maximina “Mimi”  S. Sison, Human Resource Management Officer  ti LGU-Cabugao a makipagselebrar ti Local Government Unit (LGU) – Cabugao iti panangidaulo ni Mayor Edgardo “Ediboy” S. Cobangbang, Jr. iti panangbigbigna  ti pateg ti Philippine Civil Service Commission (CSC) iti September Month-long Celebration nga idauluan ti CSC nga Ahensia ti Gobierno.

Daytoy a panagselebrar ket naibatay iti Tema: "Kayang Kaya Mo, Lingkod Bayani!”. Naipalaon daytoy babaen iti Memorandum Circular No. 09, Series 2015 ti CSC iti  Direktiba  ni Acting Chairperson Robert S. Martinez.

Ti CSC ket naipasdek babaen iti Public Law No. 5,  “An Act for the Establishment and Maintenance of Our Efficient and Honest Civil Service in the Philippine Island”  idi Setiembre 19, 1900. # (Web In-Action)

IMMUNIZATION PROGRAM KADAGITI AGAD-ADAL, NARUGIAN

Cabugao, Ilocos Sur – Nailunsad ti  “Bakuna para sa Kabataan, Proteksiyon sa Kinabukasan”,  libre nga  immunization program babaen iti panagkammayet ti DOH,  DepED ken iti LGU’s a maited kadagiti Grade 1 agingga iti Grade 7 iti intero a pageskuelaan ti pagilian. 

Ditoy ili a Cabugao, narugian ti ipapan panagbakuna dagiti Medical Personnel iti Cabugao Rural Health Unit (RHU)-Municipal Health Office (MHO)  a buklen dagiti Nurses ti RN-Heals. Narugian iti Cabugao National High School, Brgy. Turod, Cabugao, Ilocos Sur idi Agosto 27, 2015 ket sumarsaruno a papananda dagiti dadduma a pagadalan a naka-eskediul.

Nakikaysa ni SBM Atty. Bryan Jett S. Pano, Committee Chairman on  Health ti Sangguniang Bayan  kadagiti maisaysayangkat nga eskediul ti immunization activities kadagiti pagadalan ti ili. 

Segun iti DOH, daytoy nga   School-Based Immunization Program ket maibakuna ti Anti-Tetanus-Diphtheria (TD). Dagitoy a medisina ket mangipaay iti tungpal-biag a proteksion kontra iti tetanus ken diphtheria ken  mangibaba ti insidente ti nakaro a sakit ken ipapatay ken mairaman metten  iti pannakaparmek ti kamuras (rubella). Daytoy a bakuna ket inaprobaran ti World Health Organization (WHO)  ket pinasingkedan ti DOH a natalged, epektibo ken maus-usar iti sangalubongan dagitoy a pagagas. # (Web In-Action)

CONGRATULATION, WINNERS! BUWAN NG WIKA CELEBRATION

Cabugao, Ilocos Sur – Naammuan dagiti nagabak ti  kalkalpas a “Buwan ng Wika Celebration”  iti Cabugao DepED District nga isuda dagiti sumaganad:

Pandistritong Pagdiriwang ng Buwan ng Wika
Pagbigkas ng Tugma - Nathalia Zette Fontanilla, 3rd Place
Coach - Perla Sajonia
Pagbigkas ng Tula- Markie Sean Wayne Serrano, First Place
Coach - Nestor Cobangbang
Solong Pag awit - Cedrick Anor - 2nd Place
Coach- Editha Savellano
Pagsulat ng Balita - Finnela Daphne Jularbal , 3rd Place
Coach- Jennifer Savellano
Intermission - Deus Somera, Nicole Del Rosario
CSCS Dance Troupe 

Kabayatanna, nagun-od met ni MARKIE SEAN WAYNE SAJOR-SERRANO, Gr. 1- GT  ti SPED Center iti nasao a pagadalan iti Maikapat a Pammadayaw iti 26 a nagsasalip iti PANDIBISYONG PAGDIRIWANG SA BUWAN NG WIKA - Pagbigkas ng Tula.

Timmarabay da Mrs. Melvi Siababa Sajonia, Principal II, Cabugao South CS; Mr. Joselito & Ms. Nydimar Sajor Serrano  iti nangabak  nga u bing. # (Web In-Action)