NIGHT FLOAT PARADE, NADAEG!

Cabugao, Ilocos Sur - Naaramid ti Night Float Parade iti Cabugao Ragsak Festival 2018  idi karabiyan ti Abril 25, 2018 (maikapat  nga rabii ti Piesta)  a nagpartisiparan dagiti Kameng/Opisiales  ti  Local Government Unit (LGU)-Cabugao, Opisiales ti 33 a barangay agraman dagiti Asosasion a masarakan iti uneg dagiti barangay.

CLICK HERE TO VIEW MORE PHOTOS

Apagsipnget pay laeng iti dayta a petsa ngem napunnon dagiti umili iti agsumbangir a parte ti National Highway a manamnama a pagnaan iti Night Float Parade. Magagaran unayen dagiti agbuya a makaimatang ken mang-picture kadagiti agkakarungbo a Float a nangirepresentar/nakabingayan  dagiti 6 a Cluster iti 33 a Barangay ti Munisipalidad ti Cabugao apaman a lumabasda.

Immuna iti Parada   ti Police Mobile Patrol sa iti Imahen ni San Markos Ebanghelista a Patron ti ili a binayabay dagiti kameng ti Parish Pastoral Council/Parishioners  iti Simbaan Romano Katolika.

Makumkumpasan iti tugtog dagiti Players ti Sisim National High School Drum Beaters kabayatan a maar-aramid ti parada iti kalsada.

CLICK HERE TO VIEW MORE PHOTOS

Simmaruno dagiti Municipal Officials nga idauluanni   Mayor Josh Edward S. Cobangbang agraman dagiti Department Heads/Employees  iti LGU-Cabugao.

Nangrugi ti Parada iti sango ti NISTC Public Market, Cabugao, Ilocos Sur  ket nagpatingga idiay Cabugao Central Park (CCP) Multipurpose Pavement Auditorium.

Buklen ti Parada iti innem nga agkakangayed a Float a nakabuklan iti grupo ti 33 a barangay ti ili nga immatonan dagiti Kapitanes-da ken idauluan ida ni ABC President Thaddeus U. Soller.

Kalpasan ti pannakagrado dagiti Float, naammuan a nangabak dagiti Float iti Cluster 5 – First Place; Cluster 2 – 2nd Place ken iti Cluster 6 - 3rd Place ken Consolation Prize  kadagiti tallo a nabatbati a Cluster. 

Daytoy a pakontes ket mangnayon iti maipabuya ken mangray-aw kadagiti umili/bisita  kabayatan iti kaaldawan ti Piesta iti Abril 25, 2018. # (Web In-Action)

SPES, MADAMADAN NGA AGTRABAHO

Cabugao, Ilocos Sur – Maipatungpal manen ti Special Program for the Employment of Students (SPES) a pagbuligan nga igannuat ti Department of Labor and Employment (DOLE)-Vigan City  ken iti LGU-Cabugao para kadagiti agkasapulan ti trabaho nga agad-adal ita a bakasion ti 2018.

Maibasar iti rekord ti Human Resource Management Office (HRMO) nga idauluan ni Miss Teresita Maximina “Mimie”  S. Sison, Human Resource Management Officer ti nadakamat nga Opisina  iti LGU-Cabugao ket  umabot iti  40     nga estudiante iti maikkan  ti pribilehio nga agtrabaho ita a Summer Vacation 2018   babaen iti panagtrabahoda kadagiti Opisina ti  nadumaduma a Departamento ti LGU-Cabugao  a pakaidesignaranda. Pagrebbengan ti DOLE nga ited ti 40 % iti magunggonada (insentibo)   nga agtrabaho idinto ta 60 % met iti aggapu iti LGU-Cabugao. 

Iti pannakiuman ti Web In-Action kadagiti estudiante ti SPES, ipeksada ti naan-anay a panagyamanda iti LGU-Cabugao nga idauluan ni  Mayor Josh Edward S. Cobangbang  ken iti Ahensia ti DOLE ta maikkanda iti gundaway nga agtrabaho para iti pagsayaatanda nga agad-adal.  

Ti SPES ket programa a napataud babaen iti Republic Act 7323, Series of 1999, naamendaran babaen iti Republic Act 9547   a kangrunaan a panggepna iti mangpaadda  ti pagsapulan dagiti agtutubo  kadaytoy a panagbakasion ti agbasa babaen iti programa ti Department of Labor and Employment (DOLE). # (Web In-Action)

CABUGAO MOUNTAIN BIKE RACE, NAANGAY

Cabugao, Ilocos Sur – Kas maysa a naisangayan a  pakontes a mangparagsak iti maikatlo nga aldaw (Abril 24, 2018)   iti  panagpiesta ti ili a Cabugao, Ilocos Sur, naaramid ti lumba ti bisikleta (mountain bike) wenno maaw-awagan iti “Laspagan 2018”  a nakisalipan iti 187 a Bikers ket  nabingay ti kategoria: Open Category ken Executive Category ken naipakaammo dagiti pagannurotan ken kualipikasion dagiti makisalip iti LGU-Cabugao Facebook sakbayna. 

CLICK HERE TO VIEW MORE PHOTOS

Nangrugi ti lumba iti  Barangay Bonifacio, Cabugao, Ilocos Sur ket dinaliasatda ti rota  iti kalsada ti 12 a barangays iti  daya nga amiananen ti ili.

Dagiti Premio dagiti nangabak ket dagiti sumaganad: Champion – 3,000; 2nd Place – 2,000; 3rd Place – 1,000; 4rth Place – 750 ken ti 5th Place – 500.

Naaramid ti Awarding dagiti nangabak iti Cabugao Central Park, Brgy. Bonifacio, Cabugao, Ilocos Sur iti dayta met la a petsa babaen iti panangiyawat ni  Mayor Josh Edward S. Cobangbang dagiti premio  ken binayabay ni Kagawad Gabby G. Sunio iti Barangay Rizal.

Ti “Laspagan 2018, Cabugao Mountain Bike Race”   ket inisiatiba ni Mayor Josh Edward S. Cobangbang  a kapartner iti Cabugao Cycling Club (CCC) ken iti LGU-Cabugao ita a Tawen a panagpiesta ti ili. # (Web In-Action)

CLICK HERE TO VIEW MORE PHOTOS

BINIBINING CABUGAO 2018 CORONATION NIGHT, NADAEG!

Cabugao. Ilocos Sur -  Naaramid ti Coronation Night ti Binibining Cabugao 2018  idi rabii ti Abril 24, 2018 a naangay iti Cabugao Central Park (CCP)  Auditorium Multipurpose Pavement, Barangay Bonifacio, Cabugao, Ilocos Sur    a no sadino a ditoy ket dandani  awan iti itiitan iti kaadu   ti  umili ken sangaili a nangokupar ken  magagaran a nagbuya iti pasalip ti kinnapintasan.

Daytoy a pasalip ti Talento ken kinapintas ket  naipangruna a pakontes iti LGU-Cabugao nga idauluan ni Mayor Josh Edward S. Cobangbang a nangpangayed iti rabii sakbay iti kaaldawan ti Panagpiesta ti Ili iti Abril 25.

CLICK HERE TO VIEW MORE PHOTOS

Iti panagrugi ti kompetision, naiyam-ammo dagiti nangbukel iti 5 a Hurado iti pasalip babaen kadagiti natudingan a Hosts  kadayta a rabii. 

Naipakaammo pay dagiti pagibasaran iti panagpilida kadagiti mangabak a kandidata.

Kalpasan ti panagpabuya dagiti maibaet a grupo, saggaysa a nagpresenta/inyam-ammoda  ti bagida  dagiti kandidata iti entablado. Nagsaruno ti panagsuotda iti Swimsuit ken Gown nga impamatmatda iti publiko ken kadagiti Hurado.

Dagiti natudingan a Hurado ti  agsaludsod kadagiti Kandidata iti Question and Answer Portion ti programa. Napasamak daytoy kalpasan ti presentasion ti Gown ken pannakapili iti Top 5 Finalists kadagiti Kandidata.

Kalpasan   a naited dagiti special awards nga ited dagiti naayat nga sponsor kadagiti mapili a Kandidata ket nangted ti Mensahena ni Mayor Josh Edward S. Cobangbang. Kimmablaaw ken nagyaman ta naragsakan unay dagiti umili ken amin nga immay nakipiesta iti amin a maiparang a mabuya  ket kunana ta sapay ta mataginayon dagitoy a kinaurnos ken kinaadu iti makipagrambak iti Piesta ken maitultuloy a kastoy kadagiti masanguanan a panawen. Pinagyamanan pay ti Ama ti ili dagiti amin a naayat a nagesponsor; dagiti amin nga adda akemna iti pannakaigannuat kadagiti aktibidad ken pabuya iti nadumaduma a sektor iti panagballigi iti uppat nga aldaw iti piesta ti ili.

Iti Awarding, tunggal presentasion ket naipakaammo ti nagballigi a kandidata. Ditoy met a napan nagisaad dagiti natudingan a personalidad  iti pannakaikabil ti banda; boquet; cash ken gift certificates  ken dadduma pay a maited a maisagut kadagiti nagballigi a kandidata.

Napili a Binibining Cabugao 2018 ni Miss Lee Ann  Sinampaga ket 

kinoronaan da Mayor Josh Edward S. Cobangbang ken ni  Mrs. Juliet A. Seguban ti baro a Reyna iti Kinapintas idinto ta natudingan met dagiti Opisiales ti Ili a nangkorona kada Binibining Kalikasan 2018 ken ni Binibining Turismo 2018. 

Sakbayna, nagdalan daytoy a pasalip iti naiget a panagarisit kadagiti nalilibnos a dayag a naggapu kadagiti barangay ti Munisipalidad ti Cabugao kadagiti napili a disso iti Turismo ditoy ili a parte iti pannakaigannuat iti beauty pageant.

CLICK HERE TO VIEW MORE PHOTOS

Daytoy a pasalip ket inangay    ti Munisipalidad ti Cabugao iti panangidaulo  dagiti Opisiales ti Gobierno Lokal, indibidual, grupo  ken establisimiento dagiti negosio.

Nangabak ken napili  ni Candidate No. 7 Miss Lee Ann  Sinampaga a Binibining Cabugao 2018 manipud iti naarisit a Top 5   Finalists iti nasao a Beauty Contest Competition. 

Dadduma a nangabak ket isuda: 2nd Runner-up – Candidate No. 5 – Shiela Marie Aguilar; 1st Runner-up – Candidate No. 1 – Joanna  Saplor; Bb. Kalikasan 2018 – Candidate No. 3 – Floriefel Versoza; ken ni Bb. Turismo - Candidate No. 12 – Irma Chabelita Senica.

Kangrunaan pay a nangpadaeg iti nadakamat a rabii dagiti nalilibnos a Kandidata ket iti panagpabuya dagiti Celebrity Guests  nga isuda  Actor Gerald Anderson; Eumee Capili; Iya Mina ken ni Jewel Johnson. Ti panagpabuyada ket nangted naiduma a ray-aw  ken liwliwa kadagiti reprep a nagbuya a naibaet kadagiti presentasion dagiti Kandidata. 

Kabayatanna, naurnos ken natalna met dagiti nagbuya  agraman iti Trapiko iti Kalsada Nasional babaen iti naannayas a panagipatungpal dagiti Pannakabagi ti Linteg iti ili. # (Web In-Action)

EDUCATION NIGHT 2018, NARAGSAK A NAGBUYA DAGITI UMILI!

Cabugao, Ilocos Sur – Naaramid ti Education Night iti karabiyan ti Abril 23, 2018 iti Cabugao Central Park (CCP), Brgy. Bonifacio, Cabugao, Ilocos Sur a nagpartisiparan dagiti Mangisursuro ken School Heads iti Cabugao DepEd District  ken dagiti lima a Secondary High Schools ti ili ken kasta metten dagiti Opisiales ti ili ken dagiti adu a nagbuya iti maikadua a rabii ti Ragsak Cabugao Festival 2018.

CLICK HERE TO VIEW MORE PHOTOS

Naaramid ti showdown:  Uppat a Zona iti benneg ti Elementaria (pakabuklan ti intero a Cabugao DepED)  a ditoy ket nagpartisipar dagiti Teachers idinto ta Estudiante ti nagpartisipar iti uppat a Public High schools ken maysa a private high school iti benneg ti Sekundaria.

Ni Mr. Dharen Jake R. Repollo ti nagpaay a Facilitator ket imbasana dagiti pagalagadan ti salip ken inyam-ammona dagiti tallo a nag-Hurado ti Salip.

Kalpasan a nagleppas ti panagpabuya ti Zone 1 to 4 iti Elementaria ket nagpabuya ni Celebrity Guest Jeremy Glinoga a nangnayon iti ragsak ken ray-aw dagiti nagbuya.

Simmaganad ti showdown iti secondary level ket naisaruno a nagpabuya ni Celebrity Guest Jason Dy kalpasan iti panagpabuya ti 5 a Contingent.

Naipakaammo dagiti nangabak iti dua a kategoria: iti Elementary Level, nagkampeon ti Zone 2 ken  Kampeon met iti Sisim National High School iti High School Level.

Naudi a nagpabuya ni Celebrity Guest Zeus Collins. Naragsakan ken napnek dagiti nagbuya kadagiti presentasion dagiti naipabuya iti dayta a rabii. 

Indauluan ni Mayor Josh Edward S. Cobangbang dagiti Opisiales ti Ili nga isuda  SBM Danny Q. Gazmen; SBM Dr. Jemaima S. Tan-Yee; SBM Vicky S. Serna ken ni SBM Josefina S. Vallejo iti nagiyawat ti Premio kadagiti nangabak iti Streetdancing Competition. 

Naipaayan met iti Certificate of Appreciation dagiti Nag-Hurado iti pasalip. # (Web In-Action)

CLICK HERE TO VIEW MORE PHOTOS

DUPUDOP TI TAO A NAGBUYA ITI “SALA SA KASADA!”

Cabugao, Ilocos Sur – Dupudop ti tao a nagpadaan ken nagbuya iti naaramid a “Sala sa Kalsada”  a nagpartisiparan ti siam (9) a Contingent: 4 a Zona ti Cabugao DepED District (Elementary) ken lima a Secondary Schools:  uppat a public ken maysa a private high school ti ili.

Kimmablaaw ken nagyaman ni Mayor Josh Edward S. Cobangbang iti sapasap ken kadagiti nangorganisar kadaytoy a naisalumina a maipabuya iti maikadua  nga aldaw ti panagpiesta ti ili (Abril 23, 2018). “Happy Fiesta and Good Luck!” imbaga ni Mayor Josh Edward.

Nangrugi ti “Sala sa  Kalsada iti Cabugao Cultural and Sports Complex sa inunorda ti Kalsada Nasional nga agtungpal iti Cabugao Central Park (CCP)  dagiti siam a nagsasaruno a contingent ket kinumpasanda ti tokar a salaenda iti imatang dagiti agbuya nga adu nga umili iti agsumbangir nga igid ti National Highway ken dagiti nangpasungad iti sala iti CCP.

Naisalumina daytoy ita a parang ti Streetdancing ta maisarming ditoy iti aruat ken kagagalad mainaig iti pannakaipakita iti pateg ti pakasaritaan dagiti Sakada a nakigasanggasat iti panggedan idiay Hawaii.

Kabayatanna, naannayas met ti pannakaiwanwan ti Trapiko kabayatan iti panagsala dagiti nagsasalip iti National Highway iti panangidaulo  ti Kapolisan; dagiti Public Safety Personnel; Cabugao Elite Riders; RHU Medics; Cabugao Rescue ken dagiti BPATS. # (Web In-Action)

CLICK HERE TO VIEW MORE PHOTOS

JOB FAIR, INWAYAT TI LGU-CABUGAO KEN TI DOLE

Cabugao,  Ilocos Sur – Iti aldaw ti  Abril 23, 2018 iti naituding a pannakisinnarang dagiti agbirbirok ti panggedan kadagiti pannakabagi ti opisina (Employment Firms)  nga inimbitaran ti Department of Labor and Employment (DOLE) ken iti Gobierno Munisipal nga idauluan ni Mayor Josh Edward S. Cobangbang.

Nasapa a dimteng  dagiti pannakabagi ti DOLE-Vigan City a kinadua dagiti pannakabagi ti LGU-Cabugao a ni  Miss Teresita Maximina “Mimie” S. Sison,  PESO Manager ken Human Resources Management Officer ti HRMO.

Dagus a nagrehistro  a nagsasaruno dagiti aplikante a naggapu iti nadumaduma a barangay ti Munisipalidad ken adda latta met agsangsangpet a kumamakam sa naipasa kadagiti maseknan a pannakabagi ti agawat ti trabaho nga opisina a naisibaran iti  lamisaan ken tugaw  a pagyananda nga aginterbiu iti uneg ti Cabugao Cultural and Sports Complex, Brgy. Rizal, Cabugao, Ilocos Sur.

Daytoy a gannuat ket inisiatiba ti LGU ken iti DOLE a maipanawen iti panagpiesta ti ili tapno matulongan dagiti umili nga agsapsapul iti panggedanda ken maiyasidegda  kadagiti opisina ken kompania iti pribado a sektor.

Daytoy a proyekto ket tinawen nga ilunsad ti Gobierno Munisipal babaen iti pannakinnammayetna iti  DOLE  Ilocos Sur Provincial Field Office tapno maaksionan   ti  pakaseknan dagiti umili nga agbirbirok iti pagsapulanda a mangpasayaat pay  iti kasasaad ti panagbiagda. # (Web In-Action)