MARINE CULTURE PROJECT TI BFAR, MALUKTAN DITOY ILI TI CABUGAO

Cabugao, Ilocos Sur – Naangay ti Consultative Meeting/Dialogue on Mariculture Zone iti pannakailunsad ti Marine Culture Project para iti dua a Coastal Barangays ti ili a Cabugao, Brgys. Sabang ken Dardarat idi Agosto 10, 2011 babaen iti napagtipon a grupo ti opisiales ti Bureau of Fisheries and Aquatic Resources (BFAR), Opisiales ti Barangay Sabang ken Barangay Dardarat, Sangguniang Bayan, Opisina ti Mayor, ken DA-LGU iti SB-ABC Hall, Cabugao, Ilocos Sur.

 Kangrunaan a panggep ti pannakaaramid ti naisalumina a disso a pagpatanoran kadagiti masasao a High Value Fin Fishes a pakaibilangan ti bangus ken kapiged tapno mapreserba ken mapasayaat pay ti wagas ti pangikanan kadagiti disso a mainugot ti kaadalemna a paset ti baybay a masakupan dagitoy a dua a barangays ti ili.

Paset ti konsultasion ti maisayangkat a panagsanay kadagiti maseknan a mangaywan kadaytoy a proyekto ti BFAR ken ti pannakaestablisar ti beddeng ken kalawa ti proyekto ken iti mapagtutulagan iti nagbaetan ti BFAR ken dagiti agipuonan (investor). Manamnama a mangparnuay pay ti pagsapulan dagiti lumugar iti nadakamat a barangays iti pannakaigannuat ti proyekto. 

 

Iti Barangay Sabang, mapattapatta a maaddaan ti 40 ektaria a kalawa ti paset ti baybay a maituding para iti proyekto ti mariculture idinto ta 4 ektaria met ti Barangay Dardarat nga umabot ti 55-95 feet ti kaadalemna a pagpatanoran ti nangato ti kalidadna nga ikan.

Apaman a mabukel ken maipatungpal ti proyekto, mapagtitinnulongan met laeng ti pannakamonitorna babaen kadagiti nadakamat nga Ahensia ken opisina babaen iti pannakabukel ti Project Executive Management Council a mangtarawidwid iti nadakamat a proyekto.

Nagatendar iti nasao a konsultasion da BFAR Provincial Coordinator Rogelio Ragonjan, Regional Fishery Coordinator Belmor Bugaoan, Mayor Ediboy S. Cobangbang, Jr., Vice Mayor Danny Q. Gazmen, SB Members Vicky S. Serna ken Dr. Carlito S. Pano, Mary-ann Solomon, Division Chief, Anti-Illegal Fishing ti BFAR, Brgy. Captain Edgardo S. Cobangbang, Sr. ti Brgy. Sabang ken Brgy. Captain Danny Garcia ti Brgy. Dardarat kasta met iti DA-LGU nga idauluan ni Mrs. Zenaida S. Andrada, Municipal Agriculturist, ken Mrs. Milagros Ramirez-Paz, Municipal Fishery Coordinator ti Cabugao.

Dinayaw ken inawat ni Mayor Ediboy daytoy a maiyusuat a proyekto ti BFAR kadagitoy dua a coastal barangays iti ili ken segun iti opisina ti BFAR, maikapito a disso a napili ti kabaybayan ti ili a Cabugao a pakailunsadanen daytoy a proyekto iti Rehion Uno.# (Joed Sajonia)

MOA SIGNING, NAARAMID ITI OPISINA NI MAYOR EDIBOY

     Cabugao, Ilocos Sur – Naaramid ti panagpinnirma ti agsumbangir a partido: LGU Cabugao iti panangidaulo  ni Mayor Ediboy S. Cobangbang, Jr. ken Mr. Leomel Carino Bugaoan, Senior Agriculturist, Coordinator ti High Value Crops Development Program  (HVCDP) ti Departamento ti Agrikultura, Regional Field Unit  1, San Fernando City, La Union a nangibagi ken ni OIC DA Regional Executive Director Renato A. Maguigad ti Rehion Uno iti Memorandum of Agreement (MOA) a mangpasingked  ti napintas a panagdanggay dagiti dua nga opisina a mangtarawidwid  iti pannakausar  ken pannakamantener dagiti naited a proyekto babaen iti DA-RFU 1.

    Naitiempo  iti agdama a programa ti Gobierno Lokal ti ili iti umisu a pannakataripato dagiti maparusing a nadumaduma a bukbukel ken seedlings   a maiyallatiw a maimula kalpasanna. Babaen ti sientipiko a wagas a buyogan ti kabaruanan a teknolohia, mapadakkel dagiti agmulmula ti nateng ti matgedanda iti panagmulada babaen iti nadur-as ken nakalidad nga apit.

    Naitampok iti pinnirma ti P351,000.00 a balor ti nalpas a Greenhouse Project  ken P500,000.00  a pakaigatangan ti makinaria  a mausar dagiti mannalon partikular dagiti agmulmula ti nateng iti ili ti Cabugao.  Dagitoy a pundo ket naggapu iti High Value Crops Development Program (HVCDP) ti DA-RFU 1. 

    Naangay ti pinnirma iti opisina ni Mayor Ediboy  iti oras ti alas 10:00 A.M. ti bigat ti Agosto 4, 2011. # (Joed Sajonia)    

(L-R) Mayor Ediboy ken da SBM Vicky Serna, Carlito Pano ken Mun. Agriculturist Zenaida Andrada

Bayat ti panagpirmada Mayor Ediboy ken Prov.Agriculturist Edith Castillo

  Ni Vice-Mayor Danilo Gazmen (L) ken ABC Pres. Thaddeus Soller (R)

TUMULONG A DODOKTOR, MAKIKAYSADA ITI PROGRAMA TI RHU-CABUGAO

Ni Dra. Mimi Pira-Sy ken ti maysa a kliyentena

Cabugao, Ilocos Sur - Apaman a nagtugaw nga Ama ti Ili ti Cabugao ni Mayor Ediboy S. Cobangbang, Jr., maysa kadagiti pakaseknan ti naiyuna nga inikkanna ti pannakataming ket iti benneg ti salun-at dagiti umili.

 Nadesignaran nga agagas da Dr. Mimi Pira-Sy ken Dr. Ivy Castro-Bello, agpada nga Obstetrician-Gynecologist a mangipangruna iti pakaseknan dagiti masikog ken sakit ti babbai. Mamindua iti makalawas nga agagasda iti Rural Health Unit ti Cabugao, aldaw ti Martes ken Huebes.

Imbatad ni Dr. Castro-Bello a kasapulan koma a makitinnulong dagiti inna a masikog ken adda an-annayenna a babbai iti 33 a barangays iti ili tapno makipasetda iti programa ti DOH-LGU-RHU tapno naan-anay a maasikasoda dagitoy ken ma-update ti pakaseknanda babaen iti pannakikoordinarda a patinayon iti Rural Health Unit ti ili. 

 

Iti sabali a bangir, natallugod met ti kaaduan nga umili nga addaan ti sakit ti ngipen aglalo dagiti di makapan iti pribado a Dentista a mapan agpakita iti an-annayenda ken ni Dr. Magno Sol, pannakabagi ti Provincial Health Office ti DOH a mangkitkita ti salun-at ti ngipen dagiti umili ti Cabugao.

Dinakamat met ti agkabannuag a Dentista a maipasagepsep koma iti publiko ti kinapateg ti panangtaripato ti ngipen ta saan a maisina daytoy a napateg a banag a kupikopan ti salun-at.

Nupay nakaempleoda dagitoy a dodoktor iti pagagasan ti Gobierno Probinsial ken Pribado nga Ospital, maragsakanda met a mangiburay ti serbisioda nangruna kadagiti nakurkurang ti gasatda a kailianda. Ibilangda a pakatenneban ti kabaelanda nga agagas ti pannakaited ti orasda nga agserbi iti Rural Health Unit (RHU) ti ili. 

 

Manamnama a maited pay ti prayoridad a pannakataming dagiti dadduma pay a serbisio a maited pakaseknan ti pannakamantener ti salun-at dagiti umili babaen iti Gobierno Lokal ti ili iti panangidaulo ni Mayor Ediboy. # (Joed Sajonia) 

Municipal Health Office ti Cabugao

 

PANAGMULA TI KAYO, IPURSIGE TI LGU KEN DADDUMA NGA AHENSIA

Cabugao, Ilocos Sur – Maar-aramid ita ti Tree Planting Activities a pagpartisiparan dagiti empleado ti Gobierno Lokal nga idauluan ni Mayor Ediboy S. Cobangbang, Jr. kasta met iti pannakikaysa ti nadumaduma a sektor, ahensia ken opisina kas iti pannakabagi ti DepEd, Farmers’ Associations, PNP, BFP ken NGO’s, Barangay Councils iti 33 a barangays a nangrugi iti bulan ti Hunio 2011 agingga iti Agosto 2011 ket naituding a mamulaan ti amin a potensial a disso iti intero a Cabugao babaen ti panangiwardas ni Mr. Edgar Balangatan, Municipal Coordinator ken Municipal Environment Natural Resources Officer, (MENRO-Designate) a paset ti katulagan ti LGU-Cabugao ken ti Tanim Kalikasan, Inc., kangrunaan a mangmangted ti seedlings tapno maipatungpal ti National Greening Program ti DENR ken Gobierno Nasional.

Akemen ti LGU ti transportasion, monitoring, site identification , community organizing ken technical assistance idinto ta seedlings (libre), ganagan, insentibo, technical assistance, transportasion, monitoring facility, seedling propagation ti Tanim Kalikasan, Inc. ket bagi met dagiti mannalon/indibidual a maseknan nga agmula ti pannakaestablisar ti disso a pagmulaan ken pannakapadakkel ti maimula.

Segun ken ni Balangatan, agepekto ti katulagan ti LGU ken Tanim Kalikasan, Inc. agingga iti Tawen 2012.

Idi bulan ti Hunio, naibunong ti 80,260 a tree seedlings (Mahogany, gmelina, narra, bittaog, Acling Parang (endemic), etc.) ket inted iti Tanim Kalikasan, Inc. ti dagup ti 76,260 a seedlings idinto ta 4,000 ti naggapu iti LGU babaen ti panangtarabay da Mayor Ediboy ken ni SBM Jemaima Tan-Yee, Chairman, Committee on Environment and Natural Resources kasta met ken ni Mr. Gil de la Cruz, pannakabagi ti Tanim Kalikasan, Inc.

Naibunong ken naimula dagitoy a seedlings kadagiti disso ti Magarang Spring/Barangay Cacadiran, Kinalian Spring/Barangay Catucdaan, Roma Spring/ Barangay Maradodon, Sisim, Bungro, Pila, Sagayaden, Baclig, Quezon, Margaay, Aragan, Carusipan, Cuantacla, Sabang, Cuancabal, Poblacion ken Cael-layan. 

 

Innayon ni MENRO Balangatan a nangrugi ti programa idi Abril a panagorganisarda ti agmula kadagiti potensial a barangays, agtultuloy nga advocacy campaign, panagiwaras ti seedlings iti bulan ti Hunio-Hulio 2011, panagmula iti bulan ti Hunio-Agosto, panagmonitor iti bulan ti Hulio ken panangited ti insentibo ken pagabuno iti bulan ti Agosto-Setiembre 2011. # (Joed Sajonia)

NAIMULA A KAYO, NAREGGET TI LGU A MANGMONMONITOR TI PANNAKATARIPATODA

Cabugao, Ilocos Sur – Maparegta dagiti maseknan nga umili ken pannakabagi ti nadumaduma nga Ahensia ken opisina  a nakigamulo iti panagmula ti kayo nga indauluan ni Mayor Ediboy S. Cobangbang, Jr.  iti aglawlaw ti Magarang Springs ti Barangay Cacadiran, Cabugao, Ilocos Sur idi Hulio 2, 2011.
    

Segun ken ni Mr. Edgar S. Balangatan, MENRO-Designate, addan sangapulo ket siam (19) a dadaulo ti grupo ti nagmula ken nakiraman ti grupo ti 4-H Club ken Barangay Nutrition Scholars a nangawat kadagiti seedlings nga naggapu iti Gobierno Munisipal malaksid iti inted ti Tanim Kalikasan, Inc.
   

Innayonna pay   nga addan  7,307 aminen ti seedlings a naiwaras ken naimula babaen ti LGU ket dagitoy ti Narra, Mahogany, Papaya ken Tecoma ken kaaduan a nakaibunonganna iti sangapulo ket dua (12) a barangays a no sadino a dagitoy   ket   disso ti potensial a pagmulaan ken nagmula kadagiti naited a seedlings.
   

Mangnamnama ni MENRO a babaen iti agtultuloy a pannakamonitor ken pannakaiwardas ti panangbiag ken panangpatan-ay kadagitoy a seedlings, addanto met dakkel a maikontribusionna iti pannakapalangto iti kabakiran ken aglawlaw iti masakbayan nga aldaw.
   

Iti sabali a bangir, aktibo met dagiti pannakabagi  ti Ahensia ti DENR, DAR, ken DA. Irepresentaran dagitoy da Forester Sonido ti DENR, Engr. Constante Raras ti DAR ken MENRO Edgar S. Balangatan ti DA. Panagiwaras ti seedlings kadagiti Nakikammayet nga agmula iti masakupan dagiti watersdheds ken pribado nga agkalkalaegan a lote ti kangrunaan nga aktibidadesda.
   

Iti bulan ti Hulio ken Agosto 2011, nakaitedda ti 3,000 a Mahogany Seedlings ken 2,850 a mango seedlings iti Barangay Carusipan, 722 a mango seedlings iti Barangay Cacadiran, 6,000 a  Mahogany Seedlings ken 4,142 a mango seedlings iti Barangay Maradodon ken 5,337 a mango seedlings iti Barangay Catucdaan.
    

“Maiduma a talaga no mismo a  ti Gobierno Munisipal ken Ahensia a maseknan  ti agdadanggay a  mangilungalong  ti panagmula ti kayo: agballigi!”  innayon pay ni MENRO Edgar S.  Balangatan ti LGU-Cabugao. # (Insurat, Joed Sajonia)

CASH FOR WORK

Cabugao, Ilocos Sur - Nagtitipon dagiti nagparitisipar iti Rice Subsidy Program thru Cash for Training/ Work (CFT/W) a buklen dagiti mannalon ken mangngalap kadagiti barangays ti ili ti Cabugao idi Hunio 30, 2011 tapno awatenda ti bayad ti panagobrada iti proyekto a trinabahoda kadagiti barangayda babaen iti ababa a panawen a pannakayempleoda.

Daytoy a programa ket mayataday unay iti nakaintek a panggep ti Gobierno Lokal nga idadauluan ni Mayor Ediboy S. Cobangbang, Jr. a pannakapasayaat pay ti kasasaad ti panagbiag dagiti mannalon ken mangngalap agsipud ta maipaayanda iti nayon ti masapulanda babaen ti pannakikaysada itoy.

Timmulong dagiti opisiales ti Barangay iti pannakamobilisar dagiti nagtrabaho tapno naannayas ti pannakairingpas dagiti proyekto a pinilida a maaramid.

Iti report ti LGU-MSWD Office iti panangidaulo ni Mrs. Lydia S. Gazmen, Municipal Social Welfare Development Officer ket adda 1,016 ti bilang ti nakipaset a nagtrabaho iti naituding nga ti aldaw a naiprograma.

Indanon met dagiti nabenepisiaran ti panagyamanda iti Ahensia ti DSWD ken ti Gobierno Lokal ti ili ti Cabugao.# (Joed Sajonia) 

DUA NGA AWARD KEN PUNDO TI GUNGLO DAGITI MANNALON, INYAWAT NI MAYOR EDIBOY

Cabugao, Ilocos Sur – Inyawat ni Mayor Ediboy S. Cobangbang, Jr. ti dua a sertipiko ti pammigbig a naggapu iti Departamento ti Agrikultura (DA), umuna ti LGU iti pannakaipatakder ti Greenhouse nga aggatad ti P351,000.00  babaen iti pundo ti Departamento ti Agrikultura  kasta met iti P500,000 nga aggapu  iti DA met laeng a maited iti Cabugao Vegetable Growers Association babaen ti programa a High Value Crops Development Program kalpasan ti flag ceremony ti taga-LGU iti dayta nga aldaw ti Lunes, Hulio 25, 2011.

  

Naigiddan nga inyawat ni Mayor Ediboy dagiti tseke nga aggatad ti P23,000.00 a maipabulod (soft loan) iti gunglo dagiti mannalon kadagiti 13 a  barangays  kas  iti Nagsantaan, Bungro, Cacadiran, Quezon, Pila, Daclapan, Arnap, Bato, Baclig, Sagayaden, Salapasap, Sabang ken Rizal a rehistrado iti Department of Labor and Employment (DOLE).

Mayor Ediboy with the SB Members (L-R) Vicky Serna, Josefina Vallejo Benedict Savellano, and the FA Pres. of Sabang Rogelio Somera 

DAGITI PRESIDENTE TI TUNGGAL ASSOCIATION

IRENEO FRANDO -DACLAPAN FARMER'S ASSOCIATION

GILMAR SOLMERIN -SALAPASAP FARMER'S ASSOCIATION

ROGELIO SOMERA -SABANG FARMER'S ASSOCIATION

EDY SEVILLEJA -BUNGRO FARMER'S ASSOCIATION

DARWIN INGEL -SAN PABLO FISHING ASSOCIATION

ELMER BROMEO -PUG-OS FARMER'S ASSOCIATION

ROBERTO SABLAY -NAGSANTAAN FARMER'S ASSOCIATION

ARTHORO SOLIS -ARNAP FARMER'S ASSOCIATION

DOMINADOR REYNOLD SABIO -CATTLE FARMER'S MULTI PURPOSE COOP.

JIMMY SEGUBAN -NEW CACADIRAN REBBA FARMER'S ASSOCIATION

REYNALDO SUMIBCAY -QUEZON FARMER'S ASSOCIATION

ROGELIO BARLOLONG -SAGAYADEN FARMER'S ASSOCIATION

MARCELINO NAVAL -BATO FARMER'S ASSOCIATION

JOVENCIO LOPEZ -RIZALINA FARMER'S ASSOCIATION

   

Nagmiting ti MAFC ken Federated  Farmers’ Association kalpasan daytoy. Inggunamgunam  ti Mayor a pakauna laeng daytoy ti pannakaited ti maipabulod a gatad wenno soft loan kadagiti natibker, rehistrado  ken kompleto ti rekordna a gunglo dagiti mannalon iti nababa nga interes a mainayon  iti pundo ti organisasion. Innayon ti Mayor nga maobligarto dagiti gunglo a mangiparang ti rekordda  kas paset ti pannakamonitor daytoy nangruna iti panagbayadan.

Imbaga  ti Ama ti Ili a dandanin maisubli aminen  ti naipabulod a paset ti  7.5 million a pundo (RA 7171)  para iti mannalon itay napalabas a panagtatalon ket maisagsagana manen a mausar itoy a madama a  Wet  Cropping  Season 2011 (Hunio-Nobiembre).

Kalikaguman pay ti Mayor a  kayatna a maipakita  iti sabali nga ili ti pannakaiprayoridad dagiti mannalon iti ilina  nga ad-adu a mangbukel ti umili nga umuna a pakaisangratan ti pundo nga aggapu iti RA 7171 nupay maiserbi met laeng ti pundo iti sapasap nga umili kadagiti barangays nga agmulmula ti tabako.

Iti  nasao a miting, imbaga ni Mrs. Lourdes Azcueta, Municipal Treasurer ti kasasaad dayta a soft loan ken ti pannakausar dagiti mainugot a libro de benta tapno sistematiko ti panagirekord ken panag-audit dagiti agrebbeng.

Tinarawidwidan da MAFC Chairman Rogelio Barlolong ken Federated Farmers’ President Elmer Bromeo ti naaramid a miting. #