TI NALUKTAN A DALAN ITI BRGY. BATO

Cabugao, Ilocos Sur – Mabenepisiaran  dagiti agdaliasat a mapan iti Brgy. Bato   iti  nabukatan  a dalan  a  panglinteganda manipud iti EEA Road.

Daytoy a dalan ket inlungalong ti pannakalukatna  babaen ti  Gobierno Munisipal nga idauluan ni Mayor Edgardo “Ediboy” S. Cobangbang, Jr. a kabuyog ti kalikagum  dagiti lumugar iti daytoy a barangay nga idauluan ni Brgy. Captain Santos Aquino, Jr.

“Nam-aymi daytoy ta manglintegkamin  no aggapukami idiay sagpat. Agyamankami ken ni Apo Mayor Ediboy,” kinuna ni Mr. Rolly Sarabia, agindeg iti asideg ti dalan.

Daytoy a programa a pannakaaramid ti dalan     ken pannakapasayaat  ti kalsada ket agtultuloy a programa ti Gobierno Munisipal ti Cabugao tapno manam-ayan dagiti  agdaliasat  ken  matulongan dagiti mannalon a mangiruar kadagiti ilakoda a  produktoda. # (Web In-Action)

PHILIPPINE NAVY, TUMULONGDA ITI COASTAL BARANGAYS

Cabugao, Ilocos Sur – Simmangbay dagiti Opisiales ti Philippine Navy (PN) ken Philippine Coast Guard (PCG)   iti Opisina ni Mayor Edgardo S. Cobangbang, Jr.  idi Mayo 24, 2012 tapno ipakaaammoda ti itutulongda kadagiti agindeg iti barangay iti igid ti baybay babaen iti pannakaigannuat ti panagsanay tapno maammuanda dagiti umisu nga aramidenda no dumteng  dagiti di mapakpakadaan a didigra/kalamidad.

Intunda ida  ni Brgy. Captain Eliseo R. Serrano ti Barangay Salomague iti Opisina ti Mayor.  Naaramid ti panagsasarita   da  Vice Mayor Danny Q. Gazmen a nangibagi ken ni Mayor Ediboy ken dagiti Opisiales nga isuda  PN Commander Canlas, LTJG Roberto M. Beltran, P01 Jerry M.  Gernale, Philippine Coast Guard, Salomague. # (Web In-Action)

HANDICRAFT TRAINEES, DINAYAW TI TRAINOR-DA

Cabugao, Ilocos Sur – Imbatad ni Mrs. Priscilla F. Abenoja, Corn Husk Handicraft Trainor ti DA-RFU 1 , iti pannakiuman ti Web In Action kenkuana  idi kalman, Mayo 24, 2012 a nalaka a nakasursuro dagiti madama nga agsansanay nga agtutubo iti  maipaaramid kadakuada  ket napintas  pay  a pangrugian iti maaramidto   a trainor’s training tapno isudan  ti tumulong  iti sumaruno  a training.

Innayon ni Mrs. Abenoja a panggep ti  panagsanay nga iraman pay  ti amin nga interesado nga agsursuro nangruna  ti barbarangay.     

Manamnama ti panagturpos ita nga aldaw, Mayo 25, 2012 dagiti agsansanay tapno inda awaten dagiti sertipikoda a pakakitaan ti panangturposda  iti lima nga aldaw, segun ken ni Mrs. Joenah G. Sevilleja, A.T. -4 H Coordinator. # (Web In-Action)

SIDE DITCHES TI KALSADA TI BRGY. BATO, PASAYAATENNA TI DALAN

Cabugao, Ilocos Sur – Impeksa dagiti agdaldaliasat iti dalan a panglintegan  iti nagbedngan ti Barangay Bato ken Barangay Reppa-ac ti panagyamanda iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ta naikkan ti pagtalimudokan ti agayus a danum iti nasemento a kalsada ti nasao a panglintegan a dalan iti sang-atan.

“Babaen ti side ditches, ma-confine ti danum nga aggapu iti rain-off water no pigsaanna ti tudo ket nasaysayud ti panagayus ti danum nga agpababa  ken  pannagna dagiti agdaliasat iti dalan,” imbatad ni Municipal Engineer Crescencio C. Formoso. # (Web In-Action)

COMMUNITY-BASED SEED BANKING, MAIYUSUAT

Cabugao, Ilocos Sur – Umabot ti 24 a  Farmer-recipients iti 22 a barangays iti Munisipalidad ti Cabugao iti nakaawat ti sag-20 kilos  iti Registered Seeds (PSB Rc 82 ken NSIC Rc 222) idi Mayo 23, 2012  nga imulada  ita a panagtalon (Wet Season Crop 2012)   iti maiyusuat  a  programa a pagbuligan nga ipatungpal ti DA-Regional Field Unit 1 ken LGU-Cabugao a napauluan ti COMMUNITY-BASED SEED BANKING (CSB).

Apaman a maapitdanto  dagitoy a bin-i, imbatad ni Mr. Obas Bill Y. Baclig, Municipal Technologist-Seed Inspector a maipaamiris dagiti binukel ti pagay  babaen ti Germination Test  ti National Seed  Quality Control Services (NSQCS) iti Bureau of Plant Industry (BPI), Batac City, Ilocos Norte.

No pumasa iti Germination Test, tunggal mannalon ti ili ti Cabugao ket maikkan ti gundaway a sumukat iti usarenna a bin-i (good seeds iti quality seeds) babaen iti mayetnag a pagannurotan  ti sinnukat para iti sumaruno a panagtalon.

“Daytoy a programa ket makatulong kadagiti mannalon a narigat a makagatang ti Registered ken Certified Seeds  tapno maingatoda ti bilang ti apitenda,” segun pay ken ni DA Technologist  Obas Bill Y. Baclig.

Ti Community-Based Seed Banking ket mayataday  iti agtultuloy a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  a  pannakatulong dagiti mannalon a mangsurot ti kabaruanan a teknolohia ti panagtalon tapno maingato ti bilang ti maapit a para iti pagsayaatan met laeng iti sapasap nga umili. # (Web In-Action)

RIC PRESIDENTS, INAWATDA TI PUNDODA

Cabugao, Ilocos Sur – Nagtitipon dagiti Rural Improvement Club (RIC) President iti kada barangay iti SB-ABC Hall ita nga aldaw, Mayo 23, 2012 tapno awatenda ti impaay ti Gobierno Munisipal a pundo ti asosasionda nga aggatad ti P20,000 ti tunggal asosasion.

 
Ti Ama ti Ili, Mayor Edgardo “Ediboy” S. Cobangbang, Jr. ti nangyawat ti nasao a gatad iti tunggal Presidente a binayabay da Mrs. Joenah G. Sevilleja, Municipal RIC Coordinator ken Ms. Grenalyn Amoroso, Cabugao Federated RIC President.

 
Umabot ti 17 nga RIC President ti nagatendar ket dagitoy ti barangays ti Alina-ay, Baclig, Bato, Bungro, Cacadiran, Cuancabal, Lipit, Maradodon, Nagsantaan, Nagsincaoan, Namruangan, Reppa-ac, Rizal, Sagayaden,  Sisim, Turod Patac ken Pug-os. Saan a nakaatendar dagiti Presidente ti RIC  ti dadduma a barangays.

 
“Aywananyo, padakkelenyo dayta a pundo. Tuladenyo ti mannalon a naisublida ti naited kadakuada ket awan ti rason a di manayonan pay  dayta a naited a  pundo kas met kadakayo  no maipakitayo a masaluadanyo para iti asosasionyo,” imbatad ni Mayor Ediboy kadagiti RIC Presidents. 

 
Impeksa dagiti opisiales ti RIC iti naan-anay a panagyamanda ken ni Mayor Ediboy ta addan pundo ti asosasionda. # (Web In-Action)

3RD DAY TI TRAINING, MAKAPNEK TI PERFORMANCE DAGITI NAGSANAY

Cabugao, Ilocos Sur – Namantener ti bilang dagiti nagsanay ken nadarasda a nasurotan ti impaaramid ni Trainor Priscilla F.  Abenoja, DA-Regional Office 1. Tunggal grupo ket nabukelda  dagiti naipakita a handicraft items.

“No damdamo, blangko ti isip ket nakurang ti regtada. Ngem no nakaaramidda ti maysa wenno dua nga items, excited-da ken confident-da ti ar-aramidenda. Nalakada a masursuruan ket mamatiak a napintas ti resulta ti evaluation para kadakuada iti maudi nga aldaw,” imbatad ni Trainor Abenoja.

“Thank you ken ni Mayor Ediboy ta makaadalkami ti pag-income-manmi nga agtutubo. Mayadayokami ti madi a bisio ken tambay,” impeksa ni Miss Landel Savellano ti Barangay Cuancabal.

“Practice makes perfect! Mangted ti adal, sursuro ken pagsayaatanmi nga agtutubo. Pagyamananmi kadagiti agisuro ken esponsor daytoy a training. Sapay koma ta ma-achieve-mi ti goalmi,” kinuna met ni Miss Amie Jane S. Tapangco, 4-H Club Officer ti Barangay Arnap.
Buklen dagiti agsanay iti nakabakasion nga agad-adal ti haiskul, kolehio, out-of-school youth, ken  agtutubo iti barangay. # (Web In-Action)