CULMINATING PROGRAM TI NUTRITION MONTH, NAANGAY

Cabugao, Ilocos Sur – Naisayangkat ti Culminating Program ti Nutrition Month Celebration 2012 nga addaan ti Tema: “Pagkain ng gulay ugaliin, Araw-araw itong ihain” idi Hulio 24, 2012 sadiay Cabugao Cultural and Sports Complex, Brgy. Rizal, Cabugao, Ilocos Sur a no sadino a ditoy ket nagpartisiparan ti nadumaduma nga school levels (Elementary ken High Schools) iti Munisipalidad.

Iti bigat ti Hulio 24, 2012, naaramid dagiti contested activities iti Nutri-Quiz, Poster/Slogan, Nutri Jingle ken Cooking Contest. Naaramid ti culminating program iti kamalmanna.

 

 

 

 

 

 

Nagsarita iti nasao a programa dagiti naawis nga opisiales kas kada Acting Municipal Mayor Josefina S. Vallejo ken SB Member Dr. Carlito S. Pano, Chairman, Committee on Health/Services.

Agpadpadada a nangted ti pammalagip iti  pateg ti agtultuloy a  pannangan ti nateng ken  mailungalong  iti panagmula iti arubayan.

Binagi ni Ms. Joenah G. Sevilleja, MNAO ti nangiyam-ammo kadagiti nagpartisipar  ken ti inaramidda iti selebrasion.

Kalpasanna, naited dagiti Cash Prizes ken sertipiko kadagiti nangabak iti tunggal pageskuelaan.

Kamaudiananna, naiwaras dagiti bukel ti nateng a maimula nga inted ti Gobierno Munisipal ken Probinsial  babaen iti opisina ti DA-LGU kadagiti amin a pageskuelaan a timmabuno iti daytoy a  nadakamat a programa. # (Web In-Action)

NAIRUSAT TI MUNICIPAL TECHNO-DEMO IDIAY BRGY. NAGSANTAAN

Cabugao, Ilocos Sur – Tapno mabalanse ti disso a pakaipakatan ti Hybrid Program iti Munisipalidad ti  Cabugao, nangirusat ti DA-LGU ti Municipal Techno-Demo sadiay Barangay Nagsantaan, Cabugao, Ilocos Sur kadaytoy Wet Season Crop 2012 (Hunio-Nobiembre) babaen ti panangipatungpal ti Farmer-Cooperator a ni Mr. Hermelino Sinco ken panangtarabay ni Mr. Obas Bill Y. Baclig, AT/DA-LGU a makasakup kadaytoy a barangay. Aglawa ti Demo-Farm iti .25 Ha. ken namulaan ti Bigante ti klasena a Hybrid Seed.

 

 

Daytoy a pannakaaramid  ti Demo-Farm itoy a deppaar ket paset iti plano ti opisina ti DA-LGU a mangipamaysa ti panangpatulad ken  panangsurot kadagiti mannalon iti kabaruanan a teknolohia ket in-inutendan  nga idisso   ti kadaanan a wagas ti panagtalon. # (Web In-Action)

TI PEDERASION TI DAY CARE ITI NUTRITION MONTH

Cabugao, Ilocos Sur – Nagprograma  ti Pederasion ti Day Care Centers iti Munisipalidad iti  Municipal Nutrition Month Celebration idi Hulio 24, 2012 idiay Day Care Center Building, NISTC Compound, Brgy. Baclig, Cabugao, Ilocos Sur a no sadino aditoy ket nagatendar dagiti Day Care Teachers ken Day Care Parents Group iti nadumaduma a barangay ti Munisipalidad.

Linuktan ni Ms. Liza Somera, Day Care Worker ti Brgy. Sabang ti programa babaen iti maysa nga Opening Prayer ken National Anthem ni Mr. Thaddeus Savella, DCW ti Brgy. Baclig.

Pinasangbay ni Mr. Rudy Ilar, Federated President, DCWA, dagiti padana a Day Care Teachers, nagannak, sangaili ken bisita. Innayonna a ti panangselebrar ti “Nutrition Month” ket maikintal iti isip ti pateg ti sustansia a lak-amen ti ubbing kas pamuonan a pundasion ti panagdakkelna. Diniskutirna ti kaipapanan ti Tema: “Pagkain ng gulay ugaliin, araw araw itong ihain”. Nagyaman pay isuna iti LGU a mangipapaay ti pagsayaatan dagiti ubbing ken agisursuro.

 

 

 

 

Naibaet ti intermission number ti Selected DCSPG, NISTC Day Care Center. Kalpasanna, impaay ni SB Member Dr. Carlito S. Pano, Chairman, Committee on Health/Social Services. Inallukoyna ti sapasap nga ipakita ti panagpatanor ken  pannangan ti nateng tapno mapatuladan dagiti ubbing. Natalek a nagsarita nga iti nateng ti gubuayan ti pigsa, salun-at  ken biag ti sangkatawa-an. Imbinsana met ti pammateg ti LGU iti pakaseknan ti Day Care. 

Kalpasanna, naiwayat ti Contest Proper iti Nutri-Quiz, Daniw ken Nutri-Jingle. Nagpaay a Hurado da: Mr. Daren Garcia, Mr. Hanziel Edgardo Seguritan ken Ms. Sylvia Balbas. Nagpaay nga emcee da Mr. Rudy Ilar ken Mr. Ferico Arcebal. # (Web In-Action)

Dagiti sumaganad ti nagballigi iti pakontes:

Nutri-Quiz
1st-Allysa Joy Ballete	NISTC DCC	Coach Rudy Ilar
2nd- Arianne Joy Palacay	Cael-layan DCC	Coach Gemalyn Pormalejo
3rd-Rheill Clarenz Bautista	Pug-os DCC	Coach Rizamarie Asunio
Nutri-Jingle
1st-Eithan Zachary Garcia	NISTC DCC	Coach Rudy Ilar
2nd- Ezaira Anne Sesuca	Salomague DCC	Coach Tina Saquiton
3rd- Cysie Sonido	Cuantacla DCC	Coach Margie Valencia
Daniw
1st- Charmaigne Kate Brodeth	Salomague DCC	Coach Tina Saquiton
2nd- Mark Ely Sunio	NISTC DCC	Coach Rudy Ilar
3rd- Scarlet Saribay	Cuantacla DCC	Coach Margie Valencia

NAG-MEETING-CANVASSING TI BNS-ILOCOS SU

Cabugao, Ilocos Sur – Naaramid ti panagmiting ken canvassing ti popularity contest ti Federation of Barangay Nutrition Scholars ti Probinsia ti Ilocos Sur nga idauluan ni Ms. Widna G. Galuardo, Federation President, BNS Galimuyod iti  Hulio 24, 2012 iti Multipurpose Pavement ti Barangay Bonifacio, Cabugao, Ilocos Sur.

 

Segun ken ni Ms. Galuardo, pinilida ti Brgy. Bonifacio a “venue”  ti mitingda ta kayatda a makita ti ili a Cabugao a paggapgapuan dagiti agab-abak ti nadumaduma a pasalip ti benneg-probinsial a pakairamanan ita  ni Ms. Macrina I. Saturno, napili nga Outstanding BNS ti Region 1 ti 2011.

Innayon ti FBNS President a kalpasan ti BNS Congress idiay Baluarte, Vigan City inton Hulio 30, 2012, agsublidanto ditoy Cabugao nga ag-Lakbay Aral ta kayatda a pasiaren dagiti Coastal Barangays ken tourist destinations   partikular ti Barangay Dardarat a nangabak ti Likas Yaman Awardee iti Region 1 itay kallabes.
    “Full force ti barangay officials a nangpasangbay ken nadanonmi. Napintas, nadalus, napasig ti umili ditoy. Agbagay ti naprogreso nga ili ken multi-awardee kas ken ni Macrina.” innayonna pay.

“Nalawa ti space ditoy ket mayat ti backyard gardening. Napintas gayam ti barangay ken ili  ni BNS Regional Winner,” imbatad met ni FBNS Chita Piniera ti ili ti Sta. Catalina.

“Agsublitayto ta explore-entayo ti agdindinamag a coastal area-da,” kuna met ni FBNS President  Virginia Quitevis ti ili a Caoayan. “Nalaing nga agidaulo ti Apo Mayor ken Brgy. Captain ditoy.”

“Balligi ni Macrina, balligi ti barangay  ken Municipal Nutrition Council nga idauluan ni Mayor Ediboy,” kastoy met ti inyebkas  ni Miss Edith Castillo, Assistant Provincial Agriculturist. Pinusganna ni BNS Regional Winner Macrina I. Saturno a nagsarita  no ania dagiti   inaramidna a nangabakanna.

“Agyamankami unay kakabsat ta mapadayawankami a mangsangaili kadakayo. Kakibinmi ti LGU ken barangay a kaduayo a mangpasayaat pay ti nutrision iti masakupantayo,” impeksa met ni Brgy. Captain Valentin S. Tuyor, Jr. ti Barangay Bonifacio kadagiti bisitada.

Iti pannakabilang ti nagyan ti  urna, inyalat manen ti Cabugao ti MS. BNS 2011 ket asideg a nakasalisalna ti FBNS ti San Vicente, Ilocos Sur.  Makoronaanto ti Reyna ti FBNS-Ilocos Sur  idiay Baluarte, Vigan City inton Hulio 30, 2012.

     Dagiti sumaganad ti FBNS ti kada ili a nagatendar:
 

• Macrina Saturno, Cabugao                            
• Marianne Valle, San Juan      
• Marilou Lumandas, Magsingal      
• Perla Tabalina, Sto. Domingo      
• Vilma Joson, San Vicente      
• Chita Piniera, Sta. Catalina      
• Amalia Rivera, Sta. Lucia      
• Virginia Quitevis, Caoayan      
• Emerenciana Cuaresma, Tagudin      
• Gemma Valdez, San Esteban      
• Natividad Arenas, Sta. Cruz      
• Merlinda Bitania,  Sta.Maria                         
• Dolores Lazarte, Narvacan
• Meriam Arola, Banayoyo

    Imbagian met da DA Assistant PA Edith  Castillo;  Ms. Bernadette A. Mauricio, Staff  ken  Ms. Alma S. Castillo, Staff  ti Provincial Nutrition Council ti Ilocos Sur ken ni Mrs. Joenah G. Sevilleja, MNAO-Designate ti ili a Cabugao, Ilocos Sur. Nagatendar met dagiti BNS ti nadumaduma a barangay ti Munisipalidad iti nasao a pasamak.  # (Web In-Action)

TI PAKAIDUMAAN TI REPPAAC-BATO ES

Cabugao, Ilocos Sur – Dimmagas ti Web In-Action iti pageskuelaan ti Reppaac-Bato Elementary School idi Hulio 23, 2012 a no sadino a ditoy ket naka-base ni Mr. Francis A. de la Cruz, Head Teacher ken mangay-aywan pay iti Nagsantaan Primary School.

Malaksid ta dua nga eskuela ti iggemna, kayat daytoy nga  agkabannuag nga Edukador   a mapatawidan ti napateg a banag  nga isu dayta ti adal kadagiti ubbing iti masakupanda.

Ti eskuelada ket recipient ti “Knowledge Channel Foundation” a programa iti sektor-edukasion  ti ABS-CBN ket nagun-odda daytoy idi Mayo 2011. 20 minutos a maipabuya iti mainaig   ti  kada subject ti elementaria ditoy a Cable  TV.

“Mayat ti impact-na ta maipasagepsep iti naganus nga isip ti ubing ti kinapudno ti bambanag  nangruna iti siensia,” imbatad ni Mr. de la Cruz. “Saan unay a maarus ti ubing iti aniaman a pangipakitaan  ti  pagsiriban.”

Naisaad ti eskuela iti naplanada a paset ti sang-atan  ket napintas dagiti pasdekna a trinenseraan  ti adu a pinuon ti kayo iti abagatan  a mangpasalibukag kadagiti agad-adal uray kapudot ti tiempona.

Pagyamanan met  ni Mr. de la Cruz ti tulong  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakapasayaat ti linong ti Marcos Type Building-da ket mangnamnama pay ti mainayon a maitulong iti pagadalanda. 

Innayon ni Mr. de la Cruz a mannakitinnulong met  iti eskuela ti PTA ken dagiti opisiales ti barangay kadagiti yusuatda nga aktibidades. 

Dagiti mangbukel ti Teaching Force ti 134 nga agad-adal iti  Reppaac-Bato Elementary School:  Francis A. de La Cruz, Oliva N. Avila, Rosaline C. Manuel, Helen C. Savella, Agnes N. Yacap, Blesilda A. Castillo ken Cheryll C. Sonico. # (Web In-Action)