DAGITI UMILI KET MASEKNANDA ITA TI SALUN-ATDA

Cabugao, Ilocos Sur – Naruay ti umili a mapan agpa-check up nangruna iti aldaw ti Lunes ti lawas iti RHU-Cabugao. Kas iti sigud, maladaga, ubbing, agkabannuag ken nataengan ti mapmapan agpaagas. Naurnos ti panagasikaso, nadaras a serbisio  ken adda madadaan nga agas iti masagrap dagiti pasiente ken pambaranda metten a pasiaren dagiti kabarbaro a pasdek-pagagasan kas iti napabaro nga RHU Building, pannakabangon ti Rodolfo S. Sonido  Lying-in Center, nainayon a ramit ken Personnel nga agserserbi nga agasikaso ti agpaagas nga umili.

Dagitoy a nagdur-asan/nagbaliwan  ti benneg ti salun-at ket bunga ti agtultuloy a panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy met a  pannakapasayaat, pannakabangon ti baro a pasdek, ken pannakatagiben ti salun-at dagiti umili a kabulig  ti ad-adu pay a  panagdur-as. # (Web In-Action)

COVERED COURT TI BRGY. NAMRUANGAN, NAIRINGPAS

Cabugao, Ilocos Sur – Naileppas ken mabalinen a pagsalinongan/usaren  ti Covered Court iti Barangay Namruangan, Cabugao, Ilocos Sur.

Iti pannaki-amad ti Web In-Action, imbatad ni Brgy. Captain Robertson “Bongbong” Gorospe a napateg a kasapulan  daytoy a pannakapaadda ti pasilidad a maipaay a pagimbagan ti sapasap a bumarangay ken makausar itoy.

Pinagyamanan ni Kapitan Gorospe ti Gobierno Munisipal iti liderato ni Mayor Edgardo “Ediboy” S. Cobangbang, Jr. a timmulong iti Konseho ti Barangay a nangilungalong ti pannakapatakder ti Covered Court kasta met ken ni Diputado Ryan Luis V. Singson a naggapuan  ti pundo iti  pannakapatakder daytoy.

Ti Covered Court ket napatakder babaen ti Congressional Fund ni Diputado Ryan Luis V. Singson, First Legislative District, Ilocos Sur ken naitrabaho babaen ti DPWH, segun ken ni Municipal Engineer Crescencio C. Formoso. # (Web In-Action)

ID SYSTEM TI MANGNGALAP, DANDANIN MALPAS TI REHISTRASION-DA

Cabugao, Ilocos Sur – Narugian ti panagirehistro dagiti kualipikado a mangngalap kadagiti pito (7) a coastal barangays ti ili a Cabugao babaen kadagiti pannakabagi ti DA-LGU nangrugi idi Nobiembre 20, 2012 ket manamnama nga agpatingga inton Nobiembre 26, 2012.

Immuna a nayeskediul ti panagparehistro kadagiti barangay ti Sabang, Daclapan, Namruangan, Pug-os ken Salapasap iti napalabas a dua nga aldaw (Nobiembre 20-21, 2012).

Ti Fishermen ID System ket paset ti direktiba ni Mayor Edgardo “Ediboy” S. Cobangbang, Jr. a mangikalikagum ti pannakapasayaat ti kasasaad dagiti mangngalap babaen ti pannakaited ti pakabigbiganda a mayannurot iti sapasap a pannakasagrapda kadagiti pagimbagan a maited iti sektor-mangngalap babaen kadagiti maseknan nga Ahensia ken ti Gobierno Lokal.

Iti Nobiembre 26, 2012, naangay ti rehistrasion idiay Barangay Namruangan iti bigat idinto ta idiay Brgy. Dardarat iti kamalmanna. Nagkuyog da Mrs. Milagros R. Paz, AT/DA-LGU ken Miss Arcelie Serrano a nangiwardas ti panagparehistro.  # (Web Situational Report)

REGULAR SHOOTING TI VIGAN ELITE GUN CLUB, NAANGAY IDIAY BRGY. BUNGRO

Cabugao, Ilocos Sur – Naangay ti regular schedule ti shooting ti Vigan Elite Gun Club nga idauluan ni Mr. Michael Chan ken Mr. Wally Figuerres  ken nagpartisiparan dagiti lawmen ken  individual civilians  iti Brgy. Bungro, Cabugao, Ilocos Sur idi Nobiembre 25, 2012.

Nakipaset ni Mayor Edgardo “Ediboy” S. Cobangbang, Jr. iti nasao a panagsanay kas maysa a kameng.

Iti pannaki-amad ti Web In-Action, imbatad ni Mr. John Lord Rosuman a kaaduan a Tri-Gun Pistol Competition ken Rifle Match Exercise ti maaramid. Kangrunaan a panggep daytoy nga aktibidad ket ti pannakataming  ti gun safeholding, accuracy ken panagayat daytoy a kas maysa a klase ti sports. Innayonna a bale 3 nga Stages ti pagsanayan  ti shooter iti teknikal ken pisikal nga aspeto ti panagusar ti igam.

“Kasapulan ti disiplina ken kanayon a naka-safe moodkami a kameng tapno maliklikan ti desgrasia nangruna ta adda dagiti agbuya ken dadduma pay nga spectators,” insupusop ni Dr. Jun Tugas, maysa a Surgeon.

 Kaaduan a mamitlo a daras a maangay ti Shooting Competition iti makatawen. # (Web Situational Report) 

BLOOD-LETTING, INGANNUAT TI DVBS KEN PRC-VIGAN CITY DITOY CABUGAO

Cabugao, Ilocos Sur – Naangay ti  boluntario a panagidonar  ti dara dagiti indibidual a mayat  a tumulong iti pannakasaranay dagiti agkasapulan   nangruna iti emerhensia. Paset daytoy ti programa ti DVBS (Dara nga ited  Voluntaryo Biag Salbarentayo) a kanaig ti serbisio a maipaay iti sapasap kas pangselebrar nga aktibidad iti panagkasangay ni Vice Governor Deogracias Victor “DV” B. Savellano ti Ilocos Sur.

Nasapa a dimteng dagiti pannakabagi ti Philippine National  Red Cross, Ilocos Sur Chapter, Vigan City nga idauluan ni OIC Mr. Raymund Mario T. Chan. Timmulong met dagiti Nurses ken  Midwives  ti RHU-Cabugao kasta metten dagiti kameng ti NGO (CIS ken Kabsat DV) iti pannakaiwanwan dagiti nagboluntario a maalaan ti darana.

Simmarungkar met  ni Mayor Edgardo “Ediboy” S. Cobangbang, Jr. iti RHU Building  kabayatan ti blood-letting activity. Maikadua a nagboluntario a  naalaan ti darana ni SB Member Carlos V. Sison, Coordinator ti DVBS  ken nagsungbat kadagiti  dinamag dagiti pannakabagi ti Media a nangatendar iti aktibidad  kas iti  NBN TV ken GMA Channel 7-Ilocos Sur.

Dagiti kameng ti PRC-Ilocos Sur Chapter, Vigan City a nangibagnos ti pannakaala dagiti nagidonar ti  dara ket dagiti sumaganad: Mr. Raymund Mario T. Chan, OIC; Mr. Leo T. Jurado,  CSR-BP (MedTech); Ms. Anna C. Anaban, CSR-FR/143; Ms. Elma May Sabado, Volunteer Nurse; Ms. Haydee Palaca, Volunteer Nurse; ken Dan C. Cabello, Volunteer Technician/Driver.

Indauluan met ni Ms. Lydia Gazmen dagiti pannakabagi ti RHU-Cabugao a timmulong. # (Web In-Action)