AGTULTULOY NGA IPATEG DAGITI UMILI TI SALUN-ATDA

Cabugao, Ilocos  Sur – Agtultuloy nga ipateg dagiti umili ti salun-atda babaen iti naynay a panagbisitada iti Rural Health Unit (RHU)-Cabugao nangruna iti aldaw ti Lunes.

Kas iti sigud, maladaga, ubbing,  agtutubo, agkabannuag ken nataengan  ti mapan agpaagas ket naragsakda ta adda met kaibatoganna a pagagas a mayawidda.

“Adun ti nagluposan ti clinic ti ili. Adda payen pagpasngayan ti inna. Pagyamanantay’  ti adu gapu iti saldet dagiti liderestayo a nangpaadda kadagitoy.” imbatad ni Mr. Francisco Fuller ti Barangay Quezon, Cabugao, Ilocos Sur.

  
Ti pannakatagiben ti salun-at ket maysa kadagiti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agtultuloy  ti panagsalukag dagiti umili iti panangpasayaatda  ti panagbiagda a mangital-o met ti ekonomia ken kasasaad ti ili. # (Web In-Action)

INISIATIBO DAGITI AGTUTUBO TI CABUGAO, AGSERBI ITI MASA

Cabugao, Ilocos Sur – Nagturong ti grupo dagiti agtutubo nga idauluan ni Brgy. Bonifacio SK Chairman/SK Federated Vice President Arvin Jay Manauis idiay Candon City idi Marso 23, 2013 tapno atendaranda ti nailian a paseminar  a tarabayen iti Presidential Communications Operations Office, Malacanang, Manila kadagiti agtutubo iti panangidaulo ni Secretary Herminio “Sonny” Coloma.

Iti pannaki-amad ti Web In-Action, imbatad ni SK Chairman Arvin Jay Manauis a  naawis kadaytoy a tignay ti agtutubo iti panagadalna iti Univesity of Northern Philippines (UNP), Vigan City a nakailunsadan daytoy a krusada. Ni Manauis ti agdama a Presidente ti Student Government  ti College of Arts and Sciences (CAS) iti nasao a Unibersidad.

Insupusop ni Manauis a kayatna a maisaknap ti prinsipio daytoy a gandat kadagiti agtutubo tapno mainayon a manghulma kadakuada nga agbalin a responsable nga umili ken nationbuilder.

Dagiti dadduma a panggep ti tignayda ket dagiti sumaganad:
1. Mangipaagsep  iti kultura ti volunteerism ken bayanihan.
2. Pannakaitandudo dagiti tignay-sibiko kas iti clean-up drive, feeding  assistance ti ubbing ken  symposia.

Kadua ni Arvin Jay Manauis ditoy Cabugao da Shaira Shane Manauis, Willy Boy Arucan, Daryll Arucan ken Victor Bagotsay.

Innayon pay  ni Arvin a nakikoordinarda ken ni MSWD Officer Lydia S. Gazmen tapno makitinnulongda kadagiti Supplemental Feeding Program ti ubbing  iti barbarangay ken kasta met nga ipeksada ti panagyamanda ken ni Mayor Edgardo “Ediboy” S. Cobangbang, Jr. iti  suportana para kadagiti aktibidades ti agtutubo a mangpasayaat iti sektorda. # (Web In-Action)

REVIEW PARA ITI PRE-ASSESSMENT TI ELECTRICAL INSTALLATION, NAANGAY

Cabugao, Ilocos Sur – Naangay ti Review para iti Pre- Assessment dagiti  20 nga agad-dal  iti Electrical Installation and Maintenance babaen iti joint program  ti Technical Education and Skills  Development Authority (TESDA), DSWD ken LGU-Cabugao nga idauluan ni Mayor Edgardo “Ediboy” S. Cobangbang, Jr. Ti TESDA-Vigan City   ket  idauluan ni Provincial Director Joel Pilotin.

Naangay ti Pre-Assessment  Review  iti Municipal Conference Hall, Cabugao, Ilocos Sur idi Marso 22, 2013. Nakaeskediul pay  dagiti agad-adal nga agreport iti TESDA-Vigan City inton Marso 25, 2013 para iti Pre-Assessment iti pannakaited kadakuada ti Certificate of Completion. 

Impeksa ni Mr. Jupiter Azcueta, nangidaulo iti Review iti nasged a panagyamanda iti LGU-Cabugao nga idauluan ni Mayor Ediboy kasta met iti DSWD ken TESDA tapno maikkanda  iti narayray a namnama ken kadagiti agtutubo a makasapul iti iteggedda iti kasapulanda nga agbiag. # (Web In-Action)

ORGANIC AGRICULTURE TI MAIPAKPAKAT ITI TECHNO-DEMO

Cabugao, Ilocos Sur – Makumikom dagiti maseknan a  DA-LGU Personnel nga idauluan ni Municipal Agriculturist Zenaida S. Andrada a mangmantener ti Municipal Techno-Demo iti nadumaduma a Cash Crops iti Sagayaden Norte, Cabugao, Ilocos Sur. Assideg ti panagbisita da Mr. Edgar S. Balangatan, Project Coordinator ken ni Mr. Noel Rania, JO a katulongna  a nakabase iti DA-LGU tapno masustener iti pannakataripato dagiti naimula a mais, balatong, lasona, pepino, karabasa, ken lasona.

Segun ken ni Mr. Balangatan, conventional a banag dagiti kangrunaan nga us-usarenda tapno mayataday a para konsumo ti maproduktoda. 

Nupay nakiddit ti danum ditoy a deppaar, saan a daytoy ti tubeng tapno mamantener ti panagdakkel dagiti mula.

Daytoy a Demo-Farm ket naisangrat para iti Off-Season Cash Crop Production nga idemonstrar ti LGU-Cabugao tapno adda pagtuladan dagiti mannalon no dumteng ti kastoy a panawen ti summer months  tapno adda latta suplay ti nateng ket  maingato ti matgedanda babaen iti panagmulmulada. # (Web In-Action)

7 A BRGYS. TI NALPAS TI SOIL FERTILITY MAPPING PROJECT

Cabugao, Ilocos Sur – Nairingpas ti Team ti  Cabugao Soil Fertility Mapping Project  ti pito a barangays manipud idi Marso 13 agingga iti Marso 21, 2013.

Dagiti nadakamat a barangays ket iti Brgys. Bato, Nagsantaan, Cael-layan, Turod, Dardarat, Salomague ken Sabang. Maudi a papananda a barangay sakbay ti kalawasan ti “Semana Santa”  ket iti Brgy. Daclapan inton Marso 25, 2013. 

Iti 33 a barangays, ti laengen Brgys. Daclapan, Namruangan, Marga-ay, Bungro ken Salapasap ti saan pay a nakapanan ti Team. Dagitoy ket maituloyda  a maalaan ti soil samples inton Abril 3, 4, 5 ken 8, 2013.

Iti naregget a pannakaipatungpal  ti proyekto iti nagbinnulig a puersa ti LGU-Cabugao ken Bureau of Soils and Water Management (BSWM), manamnama a mairingpasda ti Soil Samples Gathering iti naud-udi a  barangays  iti bulan ti Abril 2013 ket itinto laengen pannakaamiris dagiti soil samples ken pannakaiparuar ti resultada ti mayur-uray iti masanguanan nga aldaw.

Dagiti mangbukel ti Cabugao Soil Fertility Mapping Project ket isuda: Ms. Eugenia A. Briones (BSWM), Team Leader; Dr. Merlvin G. Castro (DA-LGU), Mr. Robert S. Savella (DA-LGU), Mr. Nathaniel Galamgam (DA-LGU), Mr. Bonifacio Jogno (BSWM), Mr. Ernesto Almendral (BSWM), Mrs. Ester P. Aguimbag (DA-LGU), Ms. Arcelie Serrano (DA-LGU) ken Mrs. Marjorie Castillo (DA-LGU).

Tumartarabay met da SBM Benedicto M. Savellano, Committee Chair on Agriculture ken Municipal Agriculturist Zenaida S. Andrada. Daytoy a proyekto ket prayoridad a programa ti Gobierno Munisipal nga idauluan ni Mayor Edgardo “Ediboy”  S. Cobangbang, Jr. ken ti Cabugao ti kaunaan nga ili ti Ilocos Sur a pakaisayangkatan ti kastoy a programa para kadagiti mannalon babaen iti Departamento ti Agrikultura (DA). # (Web In-Action)

ELIMINATION ROUND TI BASKETBALL TOURNAMENT, MAITULTULOY

Cabugao, Ilocos Sur – Maitultuloy ti Elimination Round ti SK Basketball Tounament a maang-angay iti Cabugao Cultural and Sports Complex kada malem ti Biernes, Sabado ken Domingo.

Dua a Barangay ti  SK Team ti agay-ayam iti tunggal eskediul (2 Games)  ket manamnama nga inaldawton a mapasamak ti sinnalisal kalpasan ti kalawasan ti Semana Santa.

Iti pannaki-amad ti Web In-Action iti Marso 22, 2013, imbatad dagiti Coaches a 33  a barangay ti nakipartisipar iti nasao a torneo ti basketball ta nakikappon ti dadduma a barangay  team iti sabali a barangay. Tunggal Team ket mangnamnama a mairaman iti Top 12 Teams a maarisit iti Quarterfinals ti ay-ayam ken agtultuloy a mairamanda iti Semifinals agingga iti Championsip Games.

Daytoy a pasalip ti Basketball ket itandudo ti SK Federation ti Cabugao nga idauluan ni SK Federated President/Ex-Officio Sangguniang Bayan Member Benazir Sarmiento a tartarabayen ti LGU-Cabugao nga idauluan ni Mayor Edgardo “Ediboy” S. Cobangbang, Jr. # (Web In-Action)

TAX CAMPAIGN, NAGLEPPAS

Cabugao, Ilocos Sur – Nagleppas ti aktibidades ti Municipal Treasurer’s Office a pannakaiwayat ti Tax Campaign  for the Year 2013.

Dua a barangay ti naileppasda  iti inaldaw. Narugian daytoy nga aktibidad idi Pebrero 26, 2013 kadagiti 29 a barangays iti ruar ti Poblasion ket nagpatingga idi Marso 21, 2013 iti Brgy. Arnap, Cabugao, Ilocos Sur.

Buklen ti puersa dagiti LGU Personnel a nangisayangkat  kadaytoy a tinawen nga aksion ti Munisipio ket isuda: Eva Clemens Reintar, Emma Sonico, Lucila  Somera, Emma Sonido, Buena Gaerlan ken idauluan ni Municipal Treasurer Mrs. Lourdes A. Azcueta.

Dagitoy nga aktibidad   ket paset ti direktiba ni Mayor Edgardo “Ediboy” S. Cobangbang, Jr.  iti naregget a pannakaipakat   ti nasamay a wagas a mangpasayaat iti revenue collection  ti Munisipio. # (Web In-Action)