GRAND PARADE TI ABRIL 24, NABALLIGI

Cabugao, Ilocos Sur – Naaramid ti Grand Parade ti 2013 Cabugao Ragsak Festival iti kabigatan ti Abril 24, 2013 a nagpartisiparan ti Local Government Unit (LGU)-Cabugao, 33 a barangays agraman dagiti Brgy-based  organizations  iti uneg ti barangay kas iti RIC, 4 P’s, SK, BPATS, BNS, BHW’s, Lupon, 4-H Club,   kompania/organisasion iti Sektor Pribado kas iti Rural Bank Bank of Cabugao, Inc., NGO’s ken Peoples Organizations (PO’s),  Cabugao DepEd District, PNP, BFP, Private Hospitals, Nuga Best, National Offices and Agencies  ken Philippine Taekwondo Cabugao Chapter, Alpha Phi Omega, ken dadduma pay a sektor ti kagimongan a nakipaset kadaytoy a  kadakkelan a taripnong iti kaaldawan ti  panagpiesta ti ili ti Cabugao.

CLICK HERE TO VIEW MORE PHOTOS

Nupay kasta, immuna  ti Police Mobile Patrol sa iti Grand Marshal, Festival Banner, Colors, Marching Band (Lead), Float ni St. Mark the Evangelist ken  sinaruno dagiti Municipal Officials nga idauluan ni Mayor Edgardo “Ediboy” S. Cobangbang, Jr.

Iti agsapa, nagrikus ti grupo ti Banda a nangaramid ti Diana iti aglikmut ti Poblasion kas pammasungad  ti selebrasion  iti bisperas  ti Piesta ti ili.

CLICK HERE TO VIEW MORE PHOTOS

Iti pannaki-amad ti Web In-Action mapagdamagan, umabot ti 83 a grupo ti nagparada a buklen ti Marching Band (leader)  ti University of Luzon  Drum & Bugle Corps, kasta met dagiti marching bands  kadagiti elementaria ken high schools ti ili. Tunggal barangay ket adda nakaippenganna a Cluster ket sinarunoda dagiti agkakangayed a Floats-da. Nangrugi ti Parada iti NISTC-Public Market ken nagtungpal iti Cabugao Institute Quadrangle.

CLICK HERE TO VIEW MORE PHOTOS

Nangipaay ti Mensahe ni Mayor Edgardo “Ediboy” S. Cobangbang, Jr. ket kimmablaaw ken nagyaman iti aglaplapusanan a kaadu ti  nakidanggay iti parada kasta met iti pannakikaysa ti  Pamilia-LGU Cabugao, pannakabagi ti nadumaduma nga Opisina/Ahensia  iti Nasional ken Pribado a Sektor, Balikbayans ken dadduma pay a sektor a nakikaysa iti Grand Parade.

Impeksa ni Mayor Ediboy ti ragsakna a nakaimatang itoy ket kiniddawna a mataginayon ti rikna ti pannakipagrambak iti amin nga umili inggana  a  malpas ti Piesta.

Kabayatan a naiwayat ti pannakagrado  dagiti Float babaen kadagiti napusgan a Hurado, nangipaay ti Exhibition dagiti Players ti University of Luzon Drum & Bugle Corps ken Majorettes a nakaragsakan/nakaray-awan  ti amin  a nagbuya.
Nagpaay nga Emcee/Facilitator ni SB Secretary Maxfel S. Suboc manipud iti rugi agingga a nalpas ti Grand Parade. # (Web In-Action)

PATEG TI KULTURA TI IBATAD TI DEP-ED NIGHT

Cabugao, Ilocos Sur – Naaramid ti DepEd Cultural Show  and Coronation Rites iti karabiyan ti Abril 23, 2013 iti Cabugao Central Park (CCP), Brgy. Bonifacio, Cabugao, Ilocos Sur a nagpartisiparan dagiti mangisursuro ken School Heads ti 26 nga Elementaria/Primaria a mangbukel  ti Cabugao DepEd District nga idauluan ni Public Schools District Supervisor Helen V. Siruno.

Nagpartisipar met dagiti agad-adal nga ubbing a nairaman iti panagpabuya dagiti mangisurusro.

CLICK HERE TO VIEW MORE PHOTOS

Kangrunaan pay ti pannakakorona ni Queen Mary Faith Angel S. Sonido. Nagasmang da Mayor Edgardo S. “Ediboy” S.  Cobangbang, Jr. ken ni Dr. Gemma Q. Tacuycuy, Assistant Schools Division Superintendent (Secondary) a nangisaaad ti Korona ti Reyna nga inimatangan ti sibubukel a naitallaong kadayta a rabii. Nagatendar met dagiti kameng ti Konseho Munisipal nga idauluan ni Vice Mayor Danilo Q. Gazmen, Mrs. Soledad B. Dumbrique, Administrative Officer V, DepEd-Ilocos Sur,  Hon. DJ Savellano, Ret. Judge Efren S. Ubungen, Mrs. Maria S. Rondon, Principal, Cabugao Institute, Balikbayans ken dagiti Retirado a mangisursuro.

Iti programa, nangipaay ti Invocation ni Rev. Fr. Felix Costales, Kura Paroko ti ili a Cabugao; Patriotic Song ti impaay ti  Cabugao Cultural Troupe Choir ken Welcome Address  ni Mrs. Helen V. Siruno, Public Schools District Supervisor. Inawisna ti amin a naitabuno a mangbuya ti panangwarwar ti DepEd ti kaipapanan ti Tema: Pannakapasantak ti Panagfiesta ti Away a nakaitampokan dagiti pabuya: sala, kanta, tokar ken panagbitla.

Kalpasan ti musical rendition ti Aweng ti Kawayan, nangted ti mensahe ni Dr. Gemma Q. Tacuycuy, Assistant Schools Division Superintendent, Dep-Ed Ilocos Sur. Imbinsana ti pateg ken akem ti mangisursuro a mangtagiben/mangipromot  ti kultura. Kinaritna dagiti Teachers a mangaramid ti akemda a sipipinget para iti pagsayaatan ti benneg ti Edukasion..

CLICK HERE TO VIEW MORE PHOTOS

Kalpasan ti Musical Rendition ti CNCS Rondalla, naaramid ti Cultural Show  ket nagakem da Mrs. Julia A. Cayso, Mr. Jose Singson, Jr. ken Mr. Donato R. Sambrana iti naipabuya.

Iti Entrance of the Royal Court, nairaman a nagmartsa ken naipanayag iti entablado da First Princess Daphnie Mae Kyla Pastor, 2^nd Princess Jessa Mae R. Reton, 3^rd Princess Lynne G. Saribay ken 4rth Princess Precious Ara B. Rondon.

Kalpasan a makoronaan ti Reyna, nangipaay ti Mensahe ni Mayor Ediboy. Kimmablaaw ken nagyaman iti nangayed a partisipasion ti DepEd iti panagpiesta ti ili. Rinaem ti Mayor iti pannakaibislin dagiti tagipatgen a galad ken kadawyan a kannawidan a mairiing iti rikna dagiti umili  iti panagselebrar ti Piesta nga imparang ti grupo ti DepEd. Innayonna a dagitoy a ramen ti Kultura ni Ilokano ket saan a pagkupasen ti panawen ket agpaayda latta a napateg a pakamulian  dagiti ubbing a mangakem ti pagrebbengan iti sumaruno a henerasion.

Impeksa ti Alkalde Munisipal iti naimpusuan ken naragsak a panagyamanna iti aglaplapusanan a pannakikaysa dagiti umili itoy a tawen a pannakarambak ti piesta ti ili.

Nangipaay met ti mensahe ni Mrs. Soledad B. Dumbrique, Administrative Officer V, DepEd Ilocos Sur kalpasan nga isaadda ti Kapa ti Reyna a kaduana ni  Vice Mayor Danny Q. Gazmen. Pinagyamananna da Mayor Ediboy ken SBM Vicky S. Serna, Committee Chair on Education kadagiti napateg a naitulong ti LGU-Cabugao a nangsupusop iti kasapulan ti DepEd para kadagiti agbasbasa ditoy Cabugao.

CLICK HERE TO VIEW MORE PHOTOS

Iti investiture, kinoronaan da Ret. Judge Efren S. Ubungen ken Mrs. Helen V. Siruno ti First Princess, da Mr. & Mrs. Antonio Pecho ti 2^nd Princess, da Mr. Roberto Dolores ken Mrs. Estrella V. Somera ti 3^rd Princess ken Mr. & Mrs. Rudy Val Azcueta ti 4rth Princess.

Naaramid ti Tribute: Cabugao Institute, Ilokano Medley; Zone II, Esperanza; Zone 1-Polka sa Nayon; Cabugao District Teachers Dance Troupe-Subli; Zone V-La Jota; Zone III-Jota Cagayana; ken Zone IV-Lawiswis Kawayan.

Kalpasan ti Acknowledgement of Performers, nag-Closing Remarks ni Mr. Engelberto S. Garma, Federated PTA Prasident. Pinagyamananna ti amin a nakigamulo tapno agballigi daytoy a pannakaselebrar ti kaaldawan ti DepEd Cabugao iti panagpiesta ti ili a Cabugao.

Nagpaay nga Emcee da Miss Jennifer D. Savellano ken Mr. Fahd B. Agbulos. # (Web In-Action)

NAIPATULOD DAGITI SOIL SAMPLES ITI BSWM-MANILA

Cabugao, Ilocos Sur – Iti pannaki-amad  ti Web In-Action iti Abril 24, 2013, imbatad ni Mr. Nathaniel Galamgam, Caretaker ti Soil Samples iti Cabugao Soil Fertility Mapping Project a naipatuloden babaen iti LBC ti maudi a naikarton a soil samples para iti  pannakaanalisarna iti Bureau of Soils and Water Management (BSWM-Manila).

Ikagkagumaan met ti DA-LGU nga idauluan ni Municipal Agriculturist Zenaida S. Andrada kasta met iti Opisina ni SBM Benedict M. Savellano, Committee Chair on Agriculture a mairingpas ti pannakaanalisar dagiti soil samples tapno maammuanen dagiti mannalon iti umisu a ganagan a mausar  kadagiti dagada.
Ti Cabugao Soil Fertility Mapping Project ket maysa kadagiti prayoridad a programa ti Agrikultura ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno matulongan dagiti mannalon a mangpaadu ti apitda ken mangingato ti matgedanda. # (Web In-Action)

SOCIAL SERVICES AND EDUCATION DAY TI ABRIL 23

Cabugao, Ilocos Sur – Naaramid ti Parada a tinampokan dagiti asosasion ti Federated Senior Citizens of Cabugao nga idauluan da Mr. Bonifacio Somera, Presidente  ken ni OSCA Head Remigio B. Sunico, ti Personnel and Staff ti MSWDO nga idauluan ni MSWD Officer Mrs. Lydia S. Gazmen ken  kasta met dagiti 4 P’s (Pantawid Pamilyang Pilipino Program) Beneficiaries kadagiti barangay, mangisursuro iti Cabugao DepEd District nga idauluan ni Public Schools District Supervisor Helen V. Siruno ken dagiti mangisursuro/dadaulo dagiti  uppat a Pagadalan-Sekundaria ti ili kas iti Cabugao Institute, Cabugao National High School, Lipit National High School ken Sisim National High School.
Naaramid ti Parada iti bigat ti Abril 23, 2013 a nangrugi iti Compound ti Cabugao South Central School (CSCS)  ken nagtungpal iti Cabugao Cultural and Sports Complex, Brgy. Rizal, Cabugao, Ilocos Sur. Nagtokar dagiti Marching Band dagiti Elementary Schools ken Secondary Schools iti ili a Cabugao iti dayta a panagparadada.

CLICK HERE TO VIEW MORE PHOTOS

Kalpasan ti Parada, nagtitipon dagiti kameng ti 4 P’s  iti uneg ti Complex ket miniting ida da Municipal Link Gary Vicerra, MSWDO Assistant Leonora G. Reintar, Miss Aida S. Cueto ken Mrs. Wilma S.   Cruz ket nagtutulaganda iti pannakipasetda iti Grand Parade inton Abril 24, 2013 kasta pay  a trinatarda dagiti  dadduma a pakaseknan dagiti miembros.

Iti biang ti Day Care, nakipaset met dagiti Day Care Workers nga idauluan ni Mr. Rudy Ilar, Federated President iti parada.

Naiparada met ti  Float  a nagluganan dagiti kandidata ti uppat a Sona ti Cabugao DepEd District a makoronaan/mapadayawan iti Education Celebration  iti karabiyan ti Abril 23, 2013 iti CCP Open Auditorium.

Ti Social Services and Education Day ket maikadua nga aldaw a panangrambak ti 2013 Cabugao Ragsak Festival (Abril 22-25). # (Web In-Action)

CLICK HERE TO VIEW MORE PHOTOS

CLICK HERE TO VIEW MORE PHOTOS

NIGHT CELEBRATION TI FARMER’S DAY, NABALLIGI

Cabugao, Ilocos Sur- Naaramid ti Night Celebration ti Agriculture and Fishery Day iti karabiyan ti Abril 22, 2013 iti Cabugao Central Park (CCP), Brgy. Bonifacio, Cabugao, Ilocos Sur.

Nagatendar ditoy dagiti Opisiales ken miembros ti nadumaduma nga asosasion dagiti mannalon, mangngalap, vegetable growers, livestock traders, RIC, 4-H Club, mango growers, cooperatives, umili ti Cabugao ken kameng ti nadumaduma pay a sektor ti kagimongan.

CLICK HERE TO VIEW MORE PHOTOS

Kalpasan ti naaramid a Doxology manipud kadagiti 4-H Club Members  ti Brgy. Bonifacio, linuktan ni SBM Benedict M. Savellano, Committee Chair on Agriculture ti programa ket kimmablaaw ken nagyaman iti nawadwad a partisipasion dagiti asosasion ti ili a Cabugao, Ilocos Sur. Imbatad ni SBM Savellano  a babaen iti natimpuyog  a  liderato ni Mayor Edgardo “Ediboy” S. Cobangbang, Jr., maiparikna kadagiti asosasion nga inyuna   dagiti mannalon ken mangngalap ti pannakaipaay dagiti maikanatad/naipanawen  a serbisio tapno sumayaat ti kasasaadda  a kas mayoridad nga umili ti Cabugao.

Naiballaet dagiti intermission numbers a naggapu iti 4-H Club iti nadumaduma a barangay.

Nangipaay met ti mensahe ni Mayor Ediboy ket impeksana  ti nabara a kablaawna iti amin nga umili   iti panakipagrambakda iti panagpiesta ti ili. Bininsana ti pateg ti  panagtutunos a kas nasamay a galad  a mangitunda  iti ad-adu a panagdur-as a mangital-o ti kasasaad ti sapasap nga umili ti Cabugao.

CLICK HERE TO VIEW MORE PHOTOS

Binigbigna pay  ti pateg ti partisipasion ti tunggal maysa ken iti pannakidanggay ti amin a Cabugaoenios ditoy ken iti ballasiw-taaw a makipagrambak iti tinawen a panagpiesta  ken mangimatang kadagiti naruayen a nagluposan  ti Cabugao.
Nangted met ti Mensahe iti Piesta ni Diputado Ryan Luis V. Singson a nagatendar a kaduana ti sibubukel a Party Slate ti Nacionalista Party-Ilocos Sur  ken iti kapisi ti pusona a ni Mrs. Patricia “Pats” Savellano-Singson.

Imbinsa ni Congressman Ryan dagiti darepdepna  a mainayon pay  a pagsayaatan iti ili a Cabugao  ken iti sangaprobinsiaan ket kunana a bitibiten koma ti kaaduan ti Team Ryan.

Kagiddan itoy, naaramid ti proklamasion ti Slate ti NPC-Bileg iti  Munisipal a benneg ken iti NP-Bileg iti Probinsial ken Kongresional babaen ti panangideklara  ni agdama a Diputado Ryan Luis V. Singson, Gubernatorial Candidate ti Ilocos Sur.

Nagpabuya met dagiti Team Ryan and Ronald V. Singson  Dancers ken nagitedda ti give-aways kalpasanna kadagiti agbuybuya.

Nagpabuya pay dagiti kameng ti Rural Improvement Club (RIC) iti nadumaduma a barangay iti pan angidaulo ni Mrs. Grenalyn P. Amoroso a Presidente-da kasta met dagiti pannakabagi ti dadduma nga asosasion.

Naiballaet ti Raffle Draw ket immuna  a bimmunot ti sagsangapuloda  a nagan da Vice Governor Deogracias Victor B. Savellano ken Congressman Ryan Luis V. Singson.

Kalpasanna, naited dagiti sertipiko/ premio  kadagiti mannalon/asosasion a nakagun-od ti pammadayaw kadagiti nadumaduma a kategoria a napagsasalipan iti Agriculture and Fishery Day.

Nakipaset iti nasao a selebrasion da Ex-Congressman Ronald V. Singson, Board Member Jerry V. Singson, Board Member Christian “Basi” Purisima, Board Member Atty. Ismael Baterina, Board Member Constante Oandasan, Sinait Ex-Mayor Edgar  I. Yabes, Cabugao Ex-Vice Mayor Atty. Rex Augustus S. Morales, Congressman Eric Owen G. Singson, 2nd District, Ilocos Sur ken ADA Party List Candidate, kasta met  ni  Cabugao Ex-Mayor Andrea Soller-Tan.

Nakikaysa met dagiti Opisiales ti 33 a barangays nga idauluan ni ABC President, Brgy. Captain Teddy U. Soller, MSWDO Officer Mrs. Lydia S. Gazmen, Ms. Eugene A. Briones, BSWM-Manila, Kamkameng ti Konseho Munisipal nga idauluan ni Vice Mayor Danny Q. Gazmen ken ni  Hon. Deogracias Jose “DJ” H. Savellano.

Nagpaay nga Emcee da Mr. Christian Allen Ubaldo ken ni Mrs. Grenalyn  P. Amoroso. # (Web In-Action)

ELIMINATION TI SK BASKETBALL TOURNAMENT, MALMALPAS

Cabugao, Ilocos Sur – Iti pannaki-amad ti Web In-Action idi Abril  22, 2013,  imbatad dagiti Coaches nga aglepleppasen ti Elimination Round ti 31 nga agsasalip nga SK Teams manipud iti 33 a barangays ti ili a pakaammuanen  dagiti umuna a    12  a maarisit para iti Quartersfinal. Mangrugi ti Quartersfinal ti pay-ayam inton Abril 26, 2013. Maisarunonto ti Semi-Final a pakapilian ti agsasalip para iti  Kampeonato daytoy a Torneo kadagiti masanguanan a Games.

Kas iti gagangay, innayon dagiti napagdamagan a naregget dagiti basketball sympathizers, lumugar kadayta a barangay agraman dagiti Opisiales dagiti barangayda a mangtartarabay kadagiti Players-da nga agensayo ken makidangadang iti basketball iti Cabugao Cultural and Sports Complex a pakaang-angayan dagiti naka-schedule a Games iti minalem.

Segun iti kaaduan a mapan agbuybuya,  imbatadda nga agtultuloy a naurnos ken natalna ti mapaspasamak a kompetision gapu iti naipakpakauna a pannakamantener/pannakaannurot  ti sportsmanship ken disiplina ti tunggal Player  para iti daytoy kangrunaan nga sports a mangpadaeg iti 2013 Cabugao Ragsak Festival (Abril 22-25). # (Web Situational Report) 

COVERED CANAL TI BRGY. ROADS TI BRGY. BONIFACIO., NAPINTAAN

Cabugao, Ilocos Sur – Napintaanen  dagiti Covered Canal ti Arcebal St., Sonico St., ken Apostol St.,  Brgy. Bonifacio, Cabugao, Ilocos Sur babaen ti kombinasion nga asul ken puraw a maris a mangpapintek ti langa dagiti shoulder a natakpan  kadagiti nadakamat a  kalsada.

Daytoy a gannuat ket insayangkat ti Sangguniang Barangay nga idauluan ni Brgy. Captain Valentin S.  Tuyor, Jr.  manipud iti 20% Development Fund ti Barangay Bonifacio.

Iti pannaki-amad ti Web In-Action idi Abril 22, 2013, dinakamat  ni Brgy. Captain Tuyor iti napintas a pannaki-badang  dagiti kakaduana iti Konseho ken dagiti kalugaranna iti pannakakiddaw ti covered canal iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ket pagyamyamananda unay  dagitoy a naipaay a pagsayaatan ti barangayda.

Ti Barangay Bonifacio ket maysa kadagiti dumurdur-as a barangay ti Poblasion ken kongreto ti kaaduan a kalsadana a napintas a pagnaanen   dagiti bumarangay ken agdaldaliasat  ditoy a barangay. # (Web In-Action)