VERMICULTURE, AGTULTULOY NGA AGPATAUD TI ORGANIKO NGA ABUNO

Cabugao, Ilocos Sur – Iti pannaki-amad ti Web In-Action idi Hunio 20, 2013, agtultuloy nga asikasuen ni Mr. Nathaniel Galamgam,   Organic Production Focal Person, iti pannakapakan dagiti “Night Crawler” nga alinta a pupokna iti Vermicompost  Bin iti compound  ti Municipal Plant and Nursery, Brgy. Baclig, Cabugao, Ilocos Sur tapno gumagetda nga agiparuar ti natural nga abuno para iti mula a pagay ken nateng.

Innayon ni Mr. Galamgam a regular ti panag-harvestda  iti naurnong a lugit dagiti alinta ket manamnama a masuplayan dagiti nagorder ken aggatang  a mannalon/indibidual  iti produksionda (takki ti alinta)  nga  usarenda a pagabuno  iti pagtatalonan ken pagnatenganda.

Ti Vermiculture/Vermicomposting Project ti DA-LGU ket panggepna a patuladan/tignayen  ken ipakita iti epekto ti organiko a ganagan  iti mula a pagay ken nateng ken kas pangannurot pay iti sinaguday  ti  Akta Republika a linteg a mangipatungpal iti Organic Agriculture  ket agbalin a kapartner ti DA iti LGU iti implementasion ti nadakamat a linteg.

Iti agdama,   ti nadakamat a Vermicompost  Production  ti DA-LGU ket agpaay a modelo a  mangkomplementar    iti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  a mangitandudo iti Organic  Agriculture iti Sektor dagiti mannalon    a pakabenepisiaranda  nangruna ditoy a deppaar. # (Web In-Action)

MANGRUGIDA MANEN NGA AGPATUBO TI SEEDLINGS

Cabugao, Ilocos Sur – Iti pannaki-amad ti Web In-Action idi Hunio 20, 2013, imbatad ni Municipal Plant & Nursery Coordinator Robert S. Savella a nagpatingga a pagsugot laengen ti nabatbati a seedlings ditoy Municipal Nursery gapu iti pannakaiwaras  dagiti seedlings kadagiti barangay iti nasaknap a Tree Planting activities  idi Hunio 12, 2013 a pannakaselebrar ti Independence Day ken Arbor Day.

Innayon ni Mr. Savella a rinugianda manen ti agpatubo ken agurnong iti seedlings kas iti giant ipil-ipil seeds, napatubo a bukel ti  mahogany ken gmelina ken inaldaw nga asikasuenda tapno saan a maibusan ti nagyan ti Nursery ket adda latta madadaan a suplay ti seedlings no kasapulanda nangruna kadagiti kangrunaan nga aktibidad iti Clean and Green nga igannuat ti Munisipio.

Itay nabiit, nagkiddaw ti grupo ni MENRO Edgar  S. Balangatan, AT  iti seedlings a maimula kadagiti ma-landscape a a disso iti Public Places kas iti sango ti Food Court ken kadagiti aglawlaw dagiti baro a pasdek ti Munisipio.

Ingunamgunam pay ni Mr. Savella kadagiti maseknan iti barangay ken indibidual nga agkidkiddaw ti seedlings a tumulongda met nga agpaadda ti  sukatda babaen ti panagurnongda ti patubuenda a bukel kas iti mahogany ken gmelina ken dadduma pay a fruit trees tapno saan a makadkadan  iti reserba a seedlings iti Municipal Plant &  Nursery.

Dagitoy nga aksion ken gannuet ket gubuay ti naipanawen a programa ti Clean and Green ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno mamaksimisa ti tiempo a pannakaimula dagiti seedlings ket agtan-ayda a nasayaat  iti kabuslon ita  ti  dam-eg kadagiti pagmulmulaan dagiti umili. # (Web In-Action)

DOTS SERVICES TI RHU-CABUGAO, INALDAW A MAIPATUNGPAL

Cabugao, Ilocos Sur – Iti pannakiuman ti Web In-Action idi  Hunio 19, 2013, imbatad ni Mrs. Mylene Garcia, mangimaton iti DOTS/Laboratory ti Rural Health Unit, Cabugao a  siwayawaya ti tunggal indibidual nga agpaamiris ti tuprana iti masakupanda para iti pannakaamiris iti sintoma ti Tuberculosis a sakit  tapno maisapsapa a  matakuatan ken  maagasan no adda man babaen iti  masasao a Directly Observed Treatment Services (DOTS)  nga ipaayda a nagsanay itoy a benneg ti salun-at.

Innayon ni Mrs. Garcia a malaksid iti pannakausig ti tupra nangruna kadagiti nataengan, maaramid pay ti chest x-ray  referral iti mainugot a pagagasan ken ppd skin testing kadagiti ubbing a maatap a sineknan daytoy a sakit tapno masigud a maagasan. Maaramid pay ti pannakaamiris dagiti maladaga a mapapati a naakaran ti kastoy a sakit  tapno sigurado a di kumaro.

Kanaig daytoy, inaldaw met  a maipatungpal ti Immunization kadagiti maladaga kas ipasimudaag dagiti pakaammo iti diding ti RHU ken inaldaw a mairekord nga agpabakuna. Kangrunaan a panggep ti panagbakuna iti pannakaited ti salaknib dagiti ubbing iti sakit ta  saan a matungday ti   panagtan-ayda ken napintas ti  pundasion ti panagdakkelda.

Dagitoy nga aksion ken inisiatiba ket gubuay  iti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maprotektaran dagiti maladaga ken ubbing kadagiti saksakit ket maikkan iti napintas a masakbayanda. # (Web In-Action)

GREENHOUSE, NAMULAAN TI RUAR KEN UNEGNA

Cabugao, Ilocos Sur – Namulaanen ti agduduma ti klasena a bukel ti nateng kas iti utong, paria ken tarong iti ruar ken uneg ti dua a Greenhouse a naited a proyekto babaen ti High Value Commercial Development Program ti Department of Agriculture Regional Field Unit Region 1 (DA-RFU 1) iti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno adda pagpatanoran ti seedlings ti nateng a maiwaras ken pagtuladan dagiti mannalon iti Munisipalidad.

Kadua ni Mr. Obas Bill Y. Baclig, AT, Caretaker ti Greenhouse a mangas-asikaso iti pannakadalus ken pannakamula daytoy a demonstration area dagiti JO's  Personnel  babaen ti pannakamula dagiti naipanawen a  dadduma pay a nateng a kas iti kamatis, tarong ken sili tapno maparegget dagiti mannalon nga agmula no adda makitada a mangtignay kadakuada.

Iti kallabes a Cropping Season, namulaan met laeng iti kas kadagiti nadakamat a hybrid a bukel ti nateng ket naballigi ti pannakaidemonstrarna babaen met laeng iti panagtinnulong da Mr. Obas Bill Y. Baclig, AT ken Mr. Jerry Tapuro, katulongan nga agasikaso kadagiti naimula.

Dagitoy nga aksion ken inisiatiba ket gubuay ti napintek a programa ti Gobierno Munisipal a mangipakat kadagiti wagas ken teknolohia nga ipagteng ti DA-RFU 1 tapno saan a maudi dagiti mannalon itoy a Munisipalidad no maipapan iti panagpatanor ti cash crops ken nateng. # (Web Situational Report)

FIBER GLASS TI COVERED COURT, MAUS-USAREN ITI BRGY. BONIFACIO

Cabugao, Ilocos Sur – Iti pannaki-amad ti Web In-Action idi Hunio 19, 2013, imbatad ni Brgy. Captain Valentin S. Tuyor ti Brgy. Bonifacio a maus-usaren ti Fiber Glass Undergoal   iti  Covered Court a nabiit pay a naipatakder iti solar ti barangay babaen iti pannakagastos ti 10 % SK Fund ti Barangay Bonifacio, Cabugao, Ilocos Sur.

Innayon ni Brgy. Captain Tuyor a babaen iti konsensus dagiti Opisiales ti SK nga idauluan ni SK Chairman Arvin Jay Manauis ket naigatangan ti Fiber Glass  Basketball Court  babaen iti pundoda tapno adda nalinong a pagay-ayaman dagiti agtutubo ken estudiante  ket mayadayoda iti panagwalwalay ken madi a bisio.

Insupusop ni Brgy. Captain Tuyor a  mapalubosan dagiti agtutubo nga agay-ayam ket makipagaywanda met kadagiti pasilidades ti barangay tapno manayon ti usar dagitoy. # (Web In-Action)

GABAY SA PHILHEALTH, NAIPAAGSEP KADAGITI 4 P’s MEMBERS

Cabugao, Ilocos Sur – Naangay ti Family Development Session (FDS)  dagiti miembros ti Pantawid Pamilyang Pilipino Program (4 P’s) iti Barangay Rizal ken Barangay Baclig, Cabugao, Ilocos Sur a no sadino a ditoy ket nayadal iti Philhealth Primer babaen ken ni Ms. Nicole Fernandez, RN-Heal iti RHU-Cabugao, Ilocos Sur.

Paset daytoy iti pannakayenrol dagiti kameng  ti Philhealth ket maammuanda ti pateg daytoy a programa a mangsungbat  iti aspeto ti health care ti 4 P’s Program a mangipasingked ti salun-at dagiti benepisiario nga ubbing agraman ti pamiliada kasta metten  iti education aspect ti programa.

Trinatar met ni Miss Aida Cueto, Municipal Link ken 4 P’s Focal Person iti sinaguday ti programa ti Conditional Cash Transfer ken updates dagiti pakaseknan dagiti miembros kasta met dagiti kabuybuyog  a  pagrebbenganda iti pannakaipakat ti programa.

Nagatendar met iti nasao a sesion ni Mrs. Wilma S. Cruz, pannakabagi ti MSWDO. # (Web In-Action)

KABARBARO A PAGPAKNIAN ITI NISTC-CABUGAO, NAARAMID

Cabugao, Ilocos Sur – Kakibkibin ti panagrang-ay  ti Northern Ilocos Sur Trade Center (NISTC)-Public Market, Cabugao, Ilocos Sur  iti pannakaidur-as ti sanitasion ken salun-at iti aglawlaw ti Tiendaan babaen iti naurnos a pannakaiplastar dagiti pasilidad ken  pagibellengan ti rugit tapno ad-adda pay a maay-ayo dagiti mapan makitienda ken parupa ti ili iti amin a Marketgoers ditoy nga ili.

Iti pannakiuman ti Web In-Action idi Hunio 16, 2013, imbatad ni Mrs. Norma Z.  Bertumen, kabarbaro a Market Supervisor a maysa kadagiti nasken pay  a tamtamingen ti Market Management iti pannakaigunamgunam iti panagdaldalus kadagiti makausar  ken panangidalimanek kadagiti amin a material a maiserrek ken maipan iti uneg ti  Tiendaan.

Iti agdama, naaramid ti Comfort  Room Building para iti babai ken lalaki  iti abagatan-a-laud ti Tiendaan tapno adda madadaan a mausar dagiti makasapul  a makitienda iti dumna ti naaramid a pagserkan iti daytoy a disso.

Dagitoy nga aksion ken inisiatiba ket gubuay ti napintek a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  a panagsisinnurot  nga agrang-ay ti amin ng aspeto ti Tiendaan a kangrunaan a paggatangan ti taraon ken pagbiag dagiti  umili ken dagiti taga-kabangibang a lugar. # (Web Situational Report)