PANANGYASIDEG TI PROGRAMA, EPEKTIBO TI FDS

Cabugao, Ilocos Sur – Iti pannakisarita ti Web In-Action  kadagiti Staff ti Pantawid Pamilyang Pilipino Program (4 P’s) iti DSWD- Cabugao Municipal Link Office  ket nakunada a nakaileppasdan iti 12 a barangay a nakaaramidanen  ti  Family Development Session (FDS) tapno ad-adda pay a maadalan dagiti kameng ti (4 P’s) manipud  iti 33 a barangay ti ili.

Segun ken ni Miss Aida S. Cueto, Municipal Focal Person ti 4 P’s a kasapulan a maawatan a nasayaat  dagiti kamkameng ti 4 P’s iti husto a kaipapanan  ti programa kabayatan iti 5 a tawen a pannakaipatungpalna.     Kuna pay ti Social Worker nga agtultuloy a pannakaipasagepsep ti programa ti kayat ti Gobierno a gun-oden  tapno agbiag a nadur-as dagiti kameng ti 4 P’s uray malpaston ti programa.

Kabayatanna, dagiti dadduma pay nga ar-aramiden ti 4 P’s Staff a mangpasayaat ti panagbiag dagiti Beneficiaries:

1.Maaramid pay ti Individual ken Home Visit no kasapulan kadagiti kameng a kasapulanna iti pannakatarabay.

2.Manayonan ti panagtalekda iti bagbagida babaen iti pannakilangenda ken “empowerment” ti grupoda a makipagpanunot iti mangpasayaat pay iti kasasaadda.

3.Values Formation - maadalda dagiti mainugot a galad ken kababalin iti pannakipasetda iti grupoda ken iti komunidad-da.

Buklen ti dua a Team da Miss Aida S. Cueto; Miss  Jessie Anne O. Tabut, Miss Juliet Madriaga ken ni  Ms. Rosemarie Pespes.  

Daytoy nga inisiatiba ket agtultuloy a mangpasayaat ti kasasaad dagiti maseknan a kaamaan (Beneficiaries) babaen iti pannakaiyasideg kadakuada dagiti mainugot a serbisio  ti Social Services babaen iti agtultuloy a  panangtarabay ti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)

PANAGMULA TI NIOG, INSURO TI PCA

Cabugao, Ilocos Sur – Inangay ti pannakabagi ti Philippine Coconut Authority (PCA) a ni Ms. Cristy de Castro ti Briefing iti pangmula ti niog (OPV-tall Variety)  nga inted ti nasao nga  Ahensia iti LGU-Cabugao itay nabiit. Nangay ti Briefing iti Opisina ti DA-LGU idi Enero 13, 2013  ket dagiti Staff & Personnel nga idauluan ni Municipal  Agriculturist Zenaida S. Andrada  iti nasao a Departamento iti naikkan iti adal ken pamalpalatpatan no kasano nga imula ken patanoren ti coconut seedlings a naited a maiwarwaras kadagiti barangay ti Cabugao iti  agdama.

Iti panaglektiur ni Ms. De Castro, naisuro iti “distancing”  ti pangamula, inter-cropping iti baet dagiti niog ta isu pay a pagkakitaan dagiti mannalon, panangpaksiat iti peste ti niog, pannakaiyam-ammo ti Dwarf Coconut  variety ken iti marketing-na.

Kalpasan iti ababa a seminar, isuronto dagiti Agricultural Technologists dagiti naammuanda kadagiti barangay a nabenepisiaran iti coconut seedlings ken pagrebbengan ti Opisina ti DA-LGU ken ti MENRO  a monitoren iti pagdurdur-asan ti panagmula ken iti mayataday a pannakapatanorda.

Segun ken ni Ms. De Castro, libre daytoy a patubo nga it-ited ti PCA ken manamnama a maapit iti 4-5 a Tawen kalpasan ti pannakaimulana. # (Web In-Action)

GOOD SEEDS A NAIMULA, MALAG-ANAN DAGITI MANNALON

Cabugao, Ilocos Sur – Iti pannakisarita  ti Web In-Action iti pannakabagi ti  DA-LGU Cabugao  idi Enero 13,  2014, imbaga ni Municipal Rice Program Coordinator Mr. Nereo S. Daproza, AT  nga adda 7 ektarias ti natalon iti para iti Seed Production kadagiti Farmer-Cooperators ken 5 ektarias met ti namulaan  iti Good Seeds (naidoble a bukel manipud iti Certified Seeds) iti Munisipalidad iti Wet Season 2013-2014. 

Innayon ni Mr. Daproza a manamnama  a nasayaat ti maapit iti  Seed Production a paggatanganto dagiti mannalon iti bin-ida iti umay a panagtatalon iti Wet Season 2014.

Kabayatanna, imbaga pay  ni Mr. Daproza a gapu iti napintas a pannakataripato dagiti pinagayan iti Wet Season 2013 ket adda dagiti napili a disso/sinilong a naisibar a nagalaan ti bin-i dagiti mannalon nga imbunubonda  a daytoy ti masasao a “Good Seeds”. Iti kasta, nakamenosda  met iti gastos manipud iti komersial a hybrid seeds nupay bassit laeng ti pakaarusan ti Good Seeds ta agpannuray  iti panagestimaran  iti mula iti  makagapu iti pagaduan ti maapit, insupusop pay ni Mr. Daproza.

Kabayatanna, patinayon met iti panagmonitor ni Mr. Obas Bill Y. Baclig, AT, Municipal Seed Inspector iti pagdurdur-asan iti disso ti proyekto iti  Seed Production kadagiti Farmer-Cooperators.

Dagitoy nga inisiatiba ket resulta iti agtultuloy a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakaidur-as ti  benneg ti  Agrikultura  a nangruna iti pagay  a kangrunaan a  pagtaraon/pagbiagan  dagiti umili. # (Web In-Action)

NAKALIDAD A SERBISIO TI SALUN-AT, SIRMATA TI RHU

Cabugao, Ilocos Sur – Iti pannakiuman ti Web In-Action iti Enero 13, 2014, impakaammo ni Dr. Bernardino M. De Gracia, OIC Municipal Health Officer  iti MHO-RHU Cabugao nga agtultuloy a maipatpatungpal iti serbisio iti  benneg ti Medikal, Dental, Pre-Natal, BP Check-up, pabakuna ti ubbing manipud maladaga, ubbing, agtutubo, agkabannuag ken nataengan iti inaldaw.

Kabayatanna, agtultuloy latta met iti panagtignay dagiti kameng ti “Kalusugan Pangkalahatan” a programa  kadagiti barangay a buklen dagiti (Brgy. Health Workers (BHW’s), Committee Chair on Health Kagawad) a baybayabayen dagiti pannakabagi ti MHO-RHU tapno maaywanan ti salun-at dagiti agindeg ditoy babaen iti itutulong ti Munisipio.

Innayon ni Dr. De Gracia a kalikaguman a gun-oden ti Balay Pagagasan ti ili iti sirmata wenno Vision-da: “Quality health Services for a healthy citizenship towards a healthy Municipality”.

Dagitoy nga inisiatiba ket gubuay iti napintas a koordinasion dagiti mangimatmaton iti Sektor ti Salun-at ken iti babaen ti naregget a  programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a pannakaaywan  ti salun-at dagiti umili para iti nabuslon a panagdur-as ti ili. # (Web In-Action)

 

SARANAY TI CISTODAI, NAIDUMA TI PANAGTULONGNA

Cabugao, Ilocos Sur – Iti pananginterbiu ti Web In-Action kadagiti Opisiales ti Cabugao  Ilocos Sur Tricycle Operators and Drivers Association, Inc., impakaammo ni Mr. Mario Rojas nga agtultuloy a makatulong ti Saranay Association-da ti traysikelan iti Cabugao kas iti sumaganad a benepisio no agminatayda:

1.P5,000 ti maawat ti maseknan nga agminatay ken mairaman ti Asawa, Tatang, Nanang, anak nga awan ti asawana a mabenepisiaran uray agnaedda iti sabali a lugar/ili.

2.P20 ti mabayadan a Membership Fee ti baro nga agkameng ken P100 iti dati nga agpaspasada nga agkameng manen.

3.P10 ti bayadan ti maysa a kameng ti CISTODAI-Saranay  a kas Death Aid a kolektaen ti Treasurer no matayan.

Innayon ni Mr. Rojas nga addaandan iti 568 a kameng  iti Saranay Association. Adda metten  umabot nga P11,360 a pundo ti asosasion malaksid iti pundo ti sibubukel a CISTODAI.

Insupusop pay ni Mr. Rojas a manamnama  a  manayonan pay ti agkameng manipud iti 881 a nakaprangkisa a traysikelan tapno mapadasanda met iti maipapaay a napintas a benepisio iti panagtitinnulong nga itden ti Saranay. # (Web In-Action)

ONE STOP SHOP, EPEKTIBO ITI PANAGALA TI BUSINESS PERMIT

Cabugao, Ilocos Sur – Nangrugi iti Enero 6, 2014, nailukat ti sangsangkamaysa a pagsakadaan kadagiti mainugot a papeles sakbay a maala ti Business Permit  a gun-oden  dagiti nadumaduma nga agtagikua ti  establisimiento ti negosio ditoy  a Munisipalidad a pakairamanan  idiay NISTC Public Market.

Naawagan iti acronym a BOSS: Business One Stop Shop  daytoy a panagala ti Business Permit ita a Tawen 2014 ditoy LGU Cabugao.

Naiplastar  ti napagsisilpo a lamisaan iti asideg ti Municipal Treasury a pakakitaan kadagiti  pannakabagi ti nadumaduma a Departamento ti Opisina ti  LGU kasta met dagiti dadduma pay nga Ahensia iti salinong ti LGU Cabugao a pakaiprosesuan dagiti papeles sakbay a magun-od ti permit
ti negosio.

Daytoy nga addang ken wagas ket maar-aramid iti umuna a bulan ti kada Tawen tapno maipadaras ti panagsakada dagiti umili  a maseknan iti business permit.
Maibatay iti pakaammo iti Munisipio, agpatingga inton Enero 20, 2014 iti panangala ti Business Permit a kasapulan dagiti maseknan sakbay nga agoperarda  manen kadagiti negosioda. # (Web In-Action)

SEED PRODUCTION 2014, MAIPATPATUNGPAL

Cabugao, Ilocos Sur – Maibatay iti rekord ni Mr. Obas Bill Y. Baclig, AT,  Municipal Seed Inspector ti LGU-Cabugao,  a naikagumaanan ti panagtultuloy ti Seed Production babaen iti 3 a Seed Growers  ket maapit dagiti immulada a rice varieties iti Tawen 2014.

Innayon ni Mr. Baclig a patinayon a monitorenna ti disso dagitoy a naimula a pagay a  kaduana dagiti Farmer-Cooperators a pamataudanto  ti nayon a bin-i a mausar dagiti mannalon para iti panagmulada iti Wet Season 2014.

Dagiti sumaganad ti pakabuklan ti Seed Production, Dry Season 2013-2014:

Bonifacio Siababa	NSIC Rc 288, NSIC Rc 13, NSIC Rc 21	Registered & Foundation	3.5 Has.
Alfonso Seatriz	NSIC Rc 288	Registered	1 Hectare
Allan Serna	NSIC Rc 298	Registered	0.4 Ha.

Nupay kasta, umuna nga agapit ni Mr. Bonifacio Siababa iti mulana nga NSIC Rc 288 & 13  iti maudi a lawas ti Enero 2014  ken iti NSIC Rc 21 iti 1st Week ti Enero 2014. Maapit met ti mula ni Mr. Alfonso Seatriz nga NSIC Rc 288 iti 1st  Week, Pebrero 2014 ken maapit met ti mula ni Mr. Allan Serna nga NSIC Rc 298 iti 2nd Week ti Marso 2014.

Dagitoy nga inisiatiba ket resulta iti agtultuloy a programa ti Agrikultura iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maikkan ti atension dagiti Seed Growers a pagtataudan ti sustenable ken nayon a bin-i ti pagay. # (Web In-Action)