CERTIFICATE OF COMPLETION, NAITED KADAGITI RN-HEALS

Cabugao, Ilocos Sur – Naiyawat  dagiti Certificate of Completion kadagiti kameng ti RN-HEALS (Registered Nurses for Health Enhancement and Local Service Project)  babaen iti panangited  kadakuada iti LGU-Cabugao nga idauluan ni Mayor Edgardo “Ediboy” S. Cobangbang, Jr. Naaramid ti pannakaited dagiti Certificate  iti Opisina ti Mayor idi Mayo 19, 2014 kadagitoy a Nurses nga agserserbi iti Rural Health Unit (RHU) iti LGU-Cabugao nga idauluan ni Dr. Bernardino M. De Gracia, OIC Municipal Health Officer,  Cabugao, Ilocos Sur.

Ti RN-HEALS ket proyekto ti Department of Health (DOH), Regional Office No. 1 babaen ken ni Dr. Myrna C. Cabotaje, MD, MPH, CESO III, Regional Director, DOH ket maipatpatungpal kadagiti RHU a katinnulongna iti Provincial Health Office, Ilocos Sur ken ti LGU-Cabugao a mangipatungpal iti serbisio ti salun-at kadagiti umili.

Inimatangan dagiti kameng ti Sangguniang Bayan nga isuda SB Member Dr. Jemaima S. Tan-Yee, Committee Chair  on Health, SBM Benedict M. Savellano, SBM Jayhan Alcid-Tan ken ni SBM Atty. Bryan Jett S. Pano iti nasao a pannakaited dagiti nadakamat a  Sertipiko. # (Web In-Action)

BRIGADA ESKWELA “KICKS OFF” DITOY CABUGAO, NAILUNSAD

Cabugao, Ilocos Sur – Maisaysayangkat ti “Brigada Eskwela”  iti  26 a bilang ti  pageskuelaan iti Cabugao DepED Cabugao District mangrugi iti Mayo 19, 2014 agingga iti Mayo 24, 2014.

Iti pannaki-amad ti Web In-Action kadagiti nagpartisipar iti nasao a Brigada Eskwela  iti nadumaduma a pagadalan  iti Mayo 19, 2014, naibagada a tunggal kuarto ti pageskuelaan ket agdadanggay dagiti mangisursuro ken nagannak nga agurnos ken agdalus agraman iti ruar ti eskuela.

Innayon pay ti dadduma  a maar-aramid ita ti pannaka-repair  dagiti  alad, tugaw, ken dadduma pay a pasilidad ti pagadalan partikular iti pannakaital-o ti  hygiene and sanitasion dagiti ubbing.

Dagitoy a gannuat ket paset ti pannakaisagana ti pageskuelaan iti panagseserrek ti klase dagiti ubbing inton  Hunio 2, 2014. Maaramid ti enrolment dagiti agbasa iti umuna a lawas ti Hunio  2014 para iti School Year 2014-2015, segun pay kadagiti School Teachers.  #  (Web In-Action)

OPERASION TI POST-HARVEST FACILITIES TI BACALL MPA, AGTULTULOY

Cabugao, Ilocos Sur – Iti pannaki-amad ti Web In-Action iti Mayo 19, 2014, imbatad ni Mr. Dominador  Reynold Sabio, Presidente, BACALL MPA a  maitultuloy ti operasion dagiti Postharvest-Facilities ti Asosasionda kas iti Flatbed Dryer, Corn Sheller, Corn Mill,   Palay Shed, Multi-purpose Drying Pavement (MPDP) iti agdama.   No kasapulan iti  pannakaipamaga dagiti matiliar a mais (puraw ken amarilio) ta saan a makaanay dagiti Multipurpose Drying Pavement-da  (MPDP) ket mabalin nga aramatenda ti Flatbed Dryer-da para   iti lokalidad. Kanaig daytoy, kalikaguman dagiti Corn Farmers a maisambot iti napintas a presio daytoy a Cash Crop a mangnayon iti matgedanda iti panagtalonda.

Innayon ni Mr. Sabio a kaaduan ita ti awatenda a matrabaho ket ti panakatiliar dagiti ginumi a mais babaen iti panakausar ti Corn Sheller-da ket  napagnunumuanda a sangkagimongan a   P12  ti tangdan ti kada sako (45 kgs.) a mais a mapusi. 

Kanaig daytoy, ti asosasion ti BACALL MPA  ket maysa a lisensiado a Retailer and Wholesaler  ket sidadaan a makitinnulong kadagiti mannalon iti pannakaisagana dagiti produktoda nga agbalin a nakalidad a sumrek iti merkado ken mabalinda met ti aggatang apaman a maaddaanda iti naan-anay a puonan. 

Dagitoy nga inisiatibada ket resulta ti napintas a pannakikammayetda iti Gobierno Munisipal a mangital-o  iti kasasaad dagiti mannalon iti benneg ti Agrikultura partikular iti mais  iti Munisipalidad ti Cabugao. # (Web In-Action)

CADASTRAL LOT SURVEY, MAPAABROBARAN

Cabugao, Ilocos Sur – Iti pannaki-amad ti Web In-Action iti Mayo 19, 2014, imbatad ni Mrs. Lilia S. Flores, Municipal Assessor, LGU-Cabugao  nga   agtultuloy  iti    koordinasionda iti Project Control Survey  ti DENR Region 01 ken iti Pribado a Kompania a nangaramid iti Survey  iti pannakaipinal ken pannakapaaprobar ti naigannuat a  

Cadastral Lot Survey ti dagdaga ditoy ili ti Cabugao, Ilocos Sur. 

Segun met ken ni Engr. Conrado S. Segui, pannakabagi ti Municipal Assessor a kaaduanen a barangay ti ili a Cabugao ti naileppas iti pannaka-surveyda iti kadastral. # (Web In-Action)

NAGLEPPAS TI ONION AND GARLIC SEMINAR

Cabugao, Ilocos Sur -  Nagleppas  ti dua nga aldaw a Seminar (Mayo15-16, 2014) dagiti agmulmula ti Bawang ken Lasona iti Mayo 16, 2014 iti CABANA Beach Resort Conference Hall, Brgy. Pug-os, Cabugao, Ilocos Sur  babaen iti panangesponsor ti  Opisina ti High Value Crops Development Program (HVCDP), DA-RFO 1, San Fernando City, La Union nga idauluan ni Mr. Angel O. Padilla, HVCDP Regional Coordinator. Nagpartisipar   dagiti kameng ti  Asosasion ti Mannalon iti Umuna a Distrito ti Probinsia ti Ilocos Sur kas iti ili ti Sinait, Cabugao, San Juan, Sto. Domingo, ken Bantay.

Naregta dagiti agmulmula ti bawang ken lasona a nangimdeng kadagiti nayadal kadakuada iti dua nga aldaw a seminar ket nanayonan ti  kaammuanda  para iti masungad a panagmulada ti bawang ken lasona. 

Kangrunaan a natratar iti maikadua nga aldaw, Mayo 16, 2014  ket iti panagaramidan/panagusaran  ti Organic Fertilizer a kangrunaan a kasapulan iti Onion and Garlic Production ken tinarawidwidan ni Ms. Remedios Inovejas, HVCDP  Provincial Component Coordinator for Research and Development - OPAG Ilocos Sur. # (Web In-Action)

SCHOLARS TI MUNISIPIO, NAGTATARIPNONGDA

Cabugao, Ilocos Sur – Naaramid ti umuna a taripnong  dagiti Scholars ti LGU-Cabugao  iti Municipal Conference Hall, Cabugao, Ilocos Sur idi Mayo 15, 2014 a nagatendaran dagiti Estudiante iti High School ken Kolehio a nakaipasa iti naituyang a  pagrukodan  babaen iti implementasion ti Cabugao Education  Scholarship Program ti Munisipio.

Iti nasao a panagtitipon, imbinsa ni SB Member Dr. Jemaima S. Tan-Yee, Committee Chair on Education dagiti panggep ken alagaden dagiti nakapasa kadaytoy nga Scholarship Program. Timmarabay met ken timmulong a nangbagbaga ni SB Member Benedicto M. Savellano, Vice Chair, Committee on Education kadagiti ubbing ken estudiante ken nangited dagiti dua a Konsehal ti Ili iti pammalagip ken inspirasion  kadagiti nagannak a nangkuyog ken mangtarabay  kadagiti Scholars.

Nakipaset met iti nasao a miting da Mr. Dario Roy Siruno ken ni  Municipal Budget Officer Miss Marietta S. Cruz, agpada nga adda akemda iti pannakaipatungpal daytoy a programa ti Munisipio.

Ti Cabugao Education Scholarship Program a napanday ken naaprobaran iti Sangguniang Bayan idi Oktubre 2013 ket naipangruna a gapuanan  ti Konseho Munisipal ken ti  Ehekutibo ti Ili  iti dagup dagiti linteg a naaramid iti dayta a  tawen, segun ken ni SB Secretary Maxfel S. Suboc.

Ti Cabugao Education Scholarship Program ket idauluan ni Mayor Edgardo “Ediboy” S. Cobangbang, Jr.,  Chairman, ti Board a mangiturong iti nasao a Programa. # (Web In-Action)

ONION AND GARLIC SEMINAR, NAANGAY DITOY CABUGAO

Cabugao, Ilocos Sur -  Maang-angay ti dua nga aldaw a Seminar (Mayo15-16, 2014) dagiti agmulmula ti Bawang ken Lasona a nangrugi iti Mayo 15, 2014 iti CABANA Beach Resort Conference Hall, Brgy. Pug-os, Cabugao, Ilocos Sur  babaen iti panangesponsor ti  Opisina ti High Value Crops Development Program (HVCDP), DA-RFO 1, San Fernando City, La Union nga idauluan ni Mr. Angel Padilla, HVCDP Regional Coordinator ken  dagiti Asosasion ti Mannalon iti Umuna a Distrito ti Probinsia ti Ilocos Sur kas iti ili ti Sinait, Cabugao, San Juan, Sto. Domingo, ken Bantay.

Kalpasan ti Opening Prayer ken Philippine National Anthem, naiyam-ammo dagiti Participants babaen ken ni Ms. Elsa V. Rafanan, Provincial HVCDP Coordinator. Adda 56 a bilang dagiti  nagatendar iti panangrugi ti nasao a paseminar. Naipaay met ti Rationale ken nagmensahe ni Mr. Angel Padilla para iti daytoy dua nga aldaw a paseminar.

Pinaregta ni Mr. Padilla dagiti agmulmula ti bawang ken lasona a paregtaenda met  ti panagmulada kadagitoy a cash crops ta agtultuloy a napintas iti panagkasapulan iti merkado. Ti maadal  iti dua nga aldaw a seminar ket maited a nayon a kaammuan dagiti agmulmula para iti masungad a panagmulada ti bawang ken lasona. 

Naisaruno ti panagsarita ni Mr. Reginald Yadao, Municipal HVCDP Coordinator, Sinait, Ilocos Sur ket trinatarna ti Pest and Diseases Management of Onion and Garlic ken simmaruno a naglektiur ni Ms. Lovelita Agustin, Muicipal HVCDP Coordinator, Pasuquin, Ilocos Norte ket trinatarna met  ti Cultural Management & Pest & Diseases Management of Garlic.

Kangrunaan a matratar iti maikadua nga aldaw, Mayo 16, 2014  ket iti panagaramidan/panagusaran  ti Organic Fertilizer a kangrunaan a kasapulan iti Onion and Garlic Production ken tarawidwidan ni Ms. Remedios Inovejas, HVCDP  Provincial Component Coordinator for Research and Development - OPAG Ilocos Sur. # (Web In-Action)