UPDATE ITI CISTODAI, NAAMMUAN

Cabugao, Ilocos Sur – Segun ken ni CISTODAI-Saranay Treasurer Mario Roxas, agak-akem a pannakangiwat daytoy a Transport Group,  a mapagmimitinganda iti mabiit ti kasasaad ken pannakausar ti Tricycle nga inted ti Guanzon Motors kadakuada. Innayonna a manamnama a dakkel ti maitulong daytoy a lugan iti pannakaitrabaho dagiti pakaseknan, proyekto ken programa iti Association.

Inulit nga imbaga ni Mr. Roxas a babaen iti napintas a koordinasion ken pannakidinnanggayda iti LGU-Cabugao partikular kadagiti mangipatpatungpal iti Linteg-Trapiko ken iti Linteg-Transportasion ket simmiken ti disiplina dagiti tricycle drivers/operators iti akemda a mangtulong kadagiti umili iti inaldaw a panagbiagda babaen kadagiti turturongenda a lugar a pakasapulanda iti lugan iti inaldaw.

Babaen iti nagkammayet a panagtrabaho ti CISTODAI ken dagiti Traffic Enforcers ket dagiti sumaganad ti nagdur-asan ti Traysikelan iti Cabugao:

1.Naesmarte dagiti agpaspasada ta maiparit ti naka-pawad.

2.Naurnos ti pagparkingan ket manmanon ti agip-ipan iti Traysikel kadagiti kanto.

3.Naipasagepsep ti disiplina kadagiti agpaspasada nangruna kadagiti uggorenda a pasaheroda iti side-carda.

Kabayatanna, insupusop ni Mr. Roxas a makatulong unay ti asosasionda iti Saranay ta maikkanda iti tulong-pinansial dagiti adda emerhensia a napasamak dagiti miembrosda.

Allukoyenna dagiti baro ken nagipabaro  ti prangkisa iti Munisipio ta agkamengda iti Saranay-CISTODAI. P100 ti bayadan ti baro a kameng iti kada tawen  ken P70 iti sumagsaganad a bayadanna iti Asosaison, segun pay ken ni Mr. Roxas. # (Web In-Action)

SERBISIO ITI AGGATANG ITI NISTC PUBLIC MARKET

Cabugao, Ilocos Sur – Segun ken ni Mrs. Norma S. Bertumen, Market Supervisor ti NISTC Public Market, a kitkitaenda met iti napintas a pannakaipaay ti serbisio kadagiti aggatang babaen iti pannaka-calibrate dagiti pagkiluan dagiti aglaklako iti nadumaduma a pagbiag iti uneg ti Tiendaan ti Cabugao. 

Innayon ni Mrs. Bertumen nga adda regular a koordinasion kadakuada  ken panagmonitor ti Department of Trade and Industry (DTI)-Vigan City iti pakaseknan iti presio ken pagkiluan iti Tiendaan. 

Innayon ni Mrs. Bertumen a makikokoordinar met kadagiti pannakabagi ti Clean and Green Program ti Munisipio iti pakaseknan ti pannakamantener ti kinalinis ti agsumbangir iti National Highway manipud iti Osmena Bridge agingga iti mabatogan ti  Tiendaan.

Malaksid iti pannakamonitor iti presio, pagkiluan, pasilidades ti tiendaan ket maipampamaysa iti pannakamantener ti kinadalus  ti uneg ken aglikmut ti tiendaan. # (Web Situational Report)

UPDATE TI CABUGAO RICE PROGRAM TI 2014, NAAMMUAN

Cabugao, Ilocos Sur – Segun ken ni Municipal Rice Program Coordinator Nereo S. Daproza, AT, ti DA-LGU Cabugao nga ikagumaananda a mapamulaan ti amin a matalon ita a Wet Season 2014 (Hunio-Nobiembre) babaen iti napintas a programa ti Agrikultura iti ili kadagiti sumaganad nga indicators:

1.Naestablisar dagiti Demo-Farm iti Brgy. Sagayaden, Nagsantaan, Maradodon, Catucdaan, Cael-layan, Rizal, Quezon ken Baclig.

2.Babaen iti programa ti LGU-Cabugao iti pannakanayon  ti kaamuan dagiti mannalon, naaddaanen  ti Opisina ti DA-LGU iti dua a nasanay a Local Farm Technician nga isuda Henry Saliganan ken Bert Vicente a kadua ita ni Mr. Obas Bill Y. Baclig, AT, a mangasikaso kadagiti programa a maipakpakat iti Destinona a barangay a kas iti Brgy. Nagsantaan a pakaar-aramidan ti Farmers’ Field School-Palay Check Classes kadagiti mannalon.

3.Pannakatarabay dagiti mannalon a mangpataud kadagiti hybrid a bukel nga imulada  tapno matun-oyan ti 5-10 Tonelada nga apit iti maysa nga ektaria.

4.Pannakapatibker ti gimong dagiti mannalon babaen iti pannakadengngeg kadagiti pakaseknan ken problemada  iti maang-angay a regular a miting iti Asosasionda ken iti Pederasion.

5.Regular Monitoring ken panangtarabay kadagiti mannalon iti disso ti pagtatalonanda.

6.Agtultuloy a pannakikammayet ti DA-LGU  kadagiti line-agencies a mangprobitsar kadagiti serbisioda  a kangrunaan iti DA ken Agricultural Companies tapno masungbatan ti pagkasapulan dagiti mannalon.

Innayon ni Mr. Daproza a mangnamnama a  mamantener ti kalawa ti mamulaan nga 2,437 ektarias a suksukayen ti 4,370 a bilang ti mannalon  babaen iti inisiatiba dagiti agmula ken pabor ti paniempo  iti kaadda iti makaanay a suplay a padanum a kangrunaan a kasapulan iti panagtan-ay dagiti naimula. # (Web Situational Report)

PAKASEKNAN TI MANGNGALAP, NAPAGMIMITINGAN

Cabugao, Ilocos Sur -  Naangay ti panagmiting dagiti dadaulo ti Fishermen Association a buklen iti Brgy. Dardarat, Salomague, Namruangan, Daclapan, Salapasap, Sabang ken Pug-os iti Hunio 19, 2014 iti 2nd Floor, Municipal Building, Cabugao, Ilocos Sur.

Nag-Preside ni Mrs. Milagros R. Paz, AT,  ket dagiti sumaganad ti natratar ken  napagnanaminganda:

1.Kalikagum ni Governor Ryan Luis V. Singson a mapatgan dagiti kalikagum dagiti  mangngalap iti Probinsia.

2.Nagisingasing dagiti Presidente iti kayatda a maited kadakuada a proyekto. Tunggal Asosasion ket insuratda iti kalikagumda ket inton maurnos dagitoy ket maidatag ken ni Gov. Ryan para iti pannakaaprobarna.

3.Kaaduan a livelihood projects/assistance ti kiniddawda.
Nalpas ti miting ket mangnamnamada iti pannakaited dagitoy a kalikagum iti kabiitan a panawen.

Dagitoy nga aksion ken inisiatiba ket resulta ti napintas a koordinasion dagiti Asosasion, LGU-Cabugao  ken iti Gobierno Probinsial kadagiti pagsayaatan a maited kadagiti mangngalap. # (Web In-Action)

TECHNOGUIDE IN CASSAVA, NAISEMINAR

Cabugao, Ilocos Sur – Maar-aramid ita ti maysa nga aldaw a pannakaiyadal ti teknolohia ti panagmula ken panagpatanor ti Cassava (Balinghoy” wenno “Kahoy” iti Ilokano kadagiti umili ti Cabugao, Ilocos Sur partikular kadagiti kameng ti Rural Improvement Club (RIC); Asosasion ti Mannalon; ken interesado a mangisaknap kadaytoy a programa ti DA-RFO 1 nga idauluan ni Mr. Cesar Escobar, Regional Coordinator on Corn and Cassava.

Naangay ti seminar iti 2nd Floor, Municipal Building, Cabugao, Ilocos Sur iti Hunio 18, 2014  a no sadino a ditoy ket detaliado a maiyadal iti panagpatanor ti cassava, maammuan dagiti usar ken by-products a pataudenna ken iti panangnayon iti masapulanda babaen kadaytoy a cash crop.

Paset ti maadal iti maysa nga aldaw a seminar ket dagiti sumaganad:

1.Site Selection
2.Land Preparation
3.Fertilizer Application
4.Pest Management
5.Harvesting
6.Cost and Return

Manamnama nga iti pannakaiyam-ammo daytoy a maimula iti lokalidad ket mainayon a pagkakitaan dagiti mannalon tapno maingatoda ti matgedanda iti benneg ti Agrikultura. # (Web In-Action)

MAMULAAN ITA A 2014 DAGITI GREENHOUSE

Cabugao, Ilocos Sur –Mamulaan ita a  Tawen 2014 (Wet Season) iti agduduma ti klasena a nateng iti ruar ken uneg ti dua a Greenhouse a naited a proyekto babaen iti High Value Crops Development Program ti Department of Agriculture,  Regional Field Office, Region 1 (DA-RFO 1) babaen iti pannakikammayetna  iti LGU-Cabugao nga idauluan ni Mayor Edgardo “Ediboy” S. Cobangbang, Jr. 
Segun ken ni Mr. Obas Bill Y. Baclig, AT, Municipal Greenhouse Caretaker, a nagtenganen ti panagtutudo a bulbulan ket rugianda manen ti agmula ken agibunubon ti nagduduma ti klasena a nateng tapno maikkan dagiti agkasapulan a mannalon ken mapatuladanda iti publiko iti pateg ti panagmulmula a daytoy ket mangnayon iti pagbiagan  dagiti mayoridad a mannalon nga umili ti Cabugao babaen iti pannakaimula dagiti hybrid a nateng a nadaras a pagkakitaan.

Kadua ni Baclig ti Greenhouse a mangas-asikaso iti pannakadalus ken pannakamula daytoy a demonstration area dagiti JO's  Personnel ken  Government Internship Program (GIP) Employees manipud iti  DOLE-LGU Program iti Munisipio    babaen iti pannakamula dagiti naitiempo  a nateng tapno maparegta dagiti mannalon nga agmula no adda makitada a mangtignay kadakuada.

Iti kallabes a Cropping Season, namulaan met laeng iti kas kadagiti nadakamat a hybrid a bukel ti nateng ket naballigi ti pannakaidemonstrarna babaen met laeng iti panagtinnulong da Mr. Obas Bill Y. Baclig, AT ken dagiti kakaduana nga agas-asikaso kadagiti naimula.

Dagitoy nga aksion ken inisiatiba ket gubuay ti napintek a programa ti Gobierno Munisipal a mangipakat kadagiti wagas ken teknolohia nga ipagteng ti DA-RFO  1 babaen iti HVCDP-Cabugao nga imatonan ni Mrs. Ester P. Aguimbag, AT,  nangruna iti panagpatanoran ti nateng  tapno saan a maudi dagiti mannalon ditoy a Munisipalidad no maipapan iti pagtaraon a nateng ti pagbasaran. # (Web Situational Report)

MULTI-SERVICES A KOOPERATIBA, AGLUKAT DITOY CABUGAO

Cabugao, Ilocos Sur – Maluktan ti sanga ti  Opisina ti Suyo Multi-purpose Cooperative iti igid ti National Highway a masakupan ti Barangay Bonifacio, Cabugao, Ilocos Sur idi Hunio 18, 2014. 

Naaramid ti Cutting of Ribbon babaen ken ni Mayor Edgardo “Ediboy” S. Cobangbang, Jr. iti imatang dagiti kameng ti Board of Directors, Opisiales, dagiti empleado ken dagiti kliente ti Kooperatiba.

Daytoy ket naaramid  kalpasan iti panangbendision ni Rev. Fr. Moises S. Andrada II ti baro a pagopisinaan ti nasao a Kooperatiba.

Iti Mensahe ni Mayor Ediboy, kimmablaaw ken nagyaman kadagiti amin a timmabuno kasta met iti Hunta Direktiba iti nasao a Kooperatiba nga idauluan ni Mrs. Norma Sonido-Cipriano,  Chairman of the Board a kaduana ni Mr. Rizaldo S. Bencila, Cooperative Manager ta napili ti ili ti Cabugao a maysa kadagiti pangipaayanda   ti serbisioda. 

Innayon ti Ama ti Ili a babaen iti daytoy a mainayon nga institusion ti ili ket maital-o ti socio-economic status dagiti umili ken tumulong a mangidur-as iti kabaelanda a mangpasayaat ti kasasaadda kasta met  iti komunidad a pagnanaedanda. 

Kalpasan ti nasao a Branch Launching ti kooperatiba, naaramid ti Motorcade ti nasao a Kooperatiba iti aglikmut ti Poblasion.

Ti Suyo Multipurpose Cooperative ket naorganisar ken naipasdek  idi Tawen 1972 ket nangrugi  iti 15 nga Stockholders ken P375 a Shareholder. Babaen iti Maka-Diyos ken nadisiplina a prinsipiona iti pannakaimanehar  ti operasionna ket in-inut a dimmakkel ken nagballigi daytoy a Kooperatiba iti panaglabas ti tawen,  segun ken ni Mr. Romeo Ayunon, kameng ti  Board Of Directors. Innayon ti BOD Member  nga  immadu ti klienteda ket nagsaknap iti Region 1 ken iti  Cordillera Administrative Region (CAR) iti operasionna.

Iti agdama, adda 3,286 a Regular a kamengna ken 263 nga Organisasion a tartarabayenda. # (Web In-Action)