FIREARMS CEREMONIAL MUZZLE TAPING, NAANGAY

Cabugao, Ilocos Sur - Naangay ti Turnover for Safekeeping of Firearms and Ceremonial Taping of Muzzle iti Cabugao Cultural and Sports Complex, Brgy. Rizal, Cabugao, Ilocos Sur idi Abril 17, 2013.

Daytoy nga aktibidad ket inatendaran dagiti Opisiales ti Philippine National Police (PNP)-Municipal, Provincial ken Regional Offices, Opisiales ti LGU nga idauluan ni Mayor Edgardo “Ediboy” S. Cobangbang, Jr. kasta met dagiti Opisiales ti  Barangay nga idauluan ni ABC President, Rizal Brgy. Captain Teddy U. Soller ken dagiti  Licensed Gun Holders.

Kalpasan ti ababa a kararag nga indauluan ni Rev. Fr. Felix Costales, Kura Paroko ti ili ti Cabugao, immuna a nagsarita ni P/Senior Supt. Dennis L. Basngi, Acting Provincial Director, Ilocos Sur PPO ket bininsana ti pateg daytoy a napagkaykaysaan a gannuat para iti natalna nga  Eleksion. Imbagana nga umuna a mapasamak ti kastoy iti Probinsia ti Ilocos Sur: boluntarioda a paidulin   iti PNP dagiti lisensiado nga armasda  kabayatan ti Eleksion ti Nasional ken Lokal iti Mayo 13, 2013.

Dinayaw met  ni P/Chief Supt.  Ricardo C. Marquez, Acting PNP Regional Director, Region 1  daytoy a “selfless act” dagiti licensed gun holders kas maysa nga addang a mangmantener ti linak ken talna kabayatan ti Eleksion.

Innayon ti Opisial nga umuna ti kastoy iti Munisipalidad iti   intero a Rehion Uno.
Napintas a panagtatakunaynay  a kas itoy a gannuat ti ipaawat ni Ms. Marivic A. Castaneda, COMELEC Officer ti Cabugao iti panagsaritana. Innayon ti COMELEC Officer a  kaibatogan iti  panangipateg ti kabukbukodan nga ili   iti panangaramid kadagiti wagas para  iti natalna a panagpipili.

Impeksa met ni Mr. Benjamin Castillo,  PPRCV Representative ti Cabugao iti panangapresiarna kadaytoy a tignay ket indariragna  a maliklikan   koma pay dagiti maisawang a  makapasakit iti pada  a tao.

Naisaganad ti Ceremonial Muzzle Taping  iti armas babaen  kada P/CSupt. Marquez, P/SSupt. Basngi ken Mayor Ediboy nga inimatangan ti kaaduan a nakitaripnong.

Nagatendar pay da Hon. DJ Savellano,  SB Member Vicky S. Serna, SBM Benedict M. Savellano ken SBM Carlos V. Sison ken Cabugao MPS Chief William N. Nerona.

Kalpasanna, nainterbiu ni P/Chief Superintendent Marquez   babaen kadagiti Reporters ti  uppat nga institusion ti Media iti nasao met laeng a taripnong. # (Web In-Action)