DAGITI NAGDUR-ASANEN TI BARANGAY SABANG

Cabugao, Ilocos Sur – Iti pannaki-amad ti Web  In-Action  iti  Abril 3, 2013, imbatad ni Brgy. Captain Edgardo S. Cobangbang, Sr. ti pannakaadda manen ti baro a pasdek ti pageskuelaanda a mangsupusop iti pagkasapulan dagiti agbasa nga ubbing a pagyananda  iti umay a panagseserrek ti klase iti Tawen 2013-2014.

Innayon ni Kapitan Edgardo Sr. a dumakdakkel metten dagiti naimulada a Manila Palm (Butsina) iti agsumbangir ti kalsadada ta nagaget dagiti 4 P’s Members a mangtaripato nangruna ita a kakiddit ti danum a pagsibogda. Malaksid iti panagdaldalus ken panagmula ti kayo, nainspiraranda  met dagiti ubbing nga idauluan ni Ms. Aileen S. Ballete, Chief Girl Scout Medal Scheme Candidate nga inesponsoran ti 7 a sektor iti Beautification Project-da  iti aglawlaw iti barangay partikular iti sango ti Kapilia.

Malaksid iti panagdur-as ti Turismo ditoy a barangay, makomkomplementaran iti agtultuloy a naregget a panagserbisio dagiti amin nga asosasion ken sektor nga idauluan ni Brgy. Captain Edgardo S. Cobangbang, Sr. # (Web In-Action)