Cabugao, Ilocos Sur – Miniting dagiti Election Officers ti Commission on Election (COMELEC) dagiti Kandidato para iti May 13, 2013 National and Local Elections iti Gobierno Lokal ti ili a Cabugao, Ilocos Sur nga idauluan ni Re-electionist Mayor Edgardo “Ediboy” S. Cobangbang, Jr.
Kangrunaan a nagintekan ti saritaan ket ti pakaseknan dagiti sumagmamano a kandidato maipapan kadagiti Posters-da.
Imbatad ni Ms. Veronica Agcanas, dati a Comelec Election Officer II ti ili a Cabugao a napakaammuan sakbayna dagiti kandidato kadagiti pagannurotan iti pagipanan ti Poster. Innayon ni Ms. Agcanas a nailanad iti intedda a notices dagiti Common Poster Area ket no pribado a disso ti pagipanan, masapul a maipakada iti akinkukua iti disso ken kasapulan nga iti las-ud ti solar ti pakaipasdekan ti Poster.
Inlawlawag pay ti COMELEC Officer a mabukel ti “Operation Baklas” a mangikkat kadagiti naipan iti di umisu a lugar a Posters ken idauluan ti COMELEC Officer a kaduana ti Hepe ti Polisia ken MLGOO kasta metten dagiti na-Deputize a kakaduada nga agikkat ti Poster a madi ti nakaikabilanda.
Kimmablaaw ken nagsarita met ni Ms. Marivic Castaneda, baro a Comelec Officer ti ili a Cabugao, Ilocos Sur. Nakipaset met ni Cabugao Chief of Police William N. Nerona iti nasao a miting. # (Web In-Action)
No comments:
Post a Comment