REGIONAL SEMINAR, NAGATENDAR TI 4-H CABUGAO

Cabugao, Ilocos Sur – Nagatendar dagiti Opisiales ti Cabugao Federated 4-H Club Association nga idauluan ni Ms. May-ann Callejo, Presidente,  iti Regional Seminar ti 4-H Club Associations ti Region 1 a maang-angay sadiay Batac City, Ilocos Norte mangrugi idi Oktubre 29, 2013.

Kadua ni Callejo dagiti Opisiales ti asosasionda ken agraman ni Mr. Obas Bill Y. Baclig, AT/Municipal 4-H Club Coordinator a nagatendar iti nasao a taripnong.

Kangrunaan a panggep ti nasao a seminar iti pannakatratar  kadagiti pakaseknan iti ikub ti 4-H Club  ken no kasano a maipaayanda ti solusion dagitoy. Mairaman pay ditoy ti panagplano kadagiti mayannatup a proyekto ken aktibidad a maipakat iti tunggal masakupan dagiti asosasion. # (Web In-Action)

CORN NATIONAL CONGRESS, NAANGAY

Cabugao, Ilocos Sur- Naangay iti 9th Philippine National Corn Congress babaen iti Tema: “Magmamais Ating Alagaan sa Ikauunlad ng Sambayanan” idi Oktubre 22-25, 2013 sadiay Taal Vista Hotel, Tagaytay City.

Nairaman ni Mr. Dominador Reynold S. Sabio, Presidente ti BACALL MPA kadagiti pannakabagi ti Region 1 Federation of Corn Cluster Association a nagatendar iti daytoy a nasao a Corn Congress.

Kangrunaan  a panggep daytoy a taripnong ket iti pannakapili dagiti LGU’s a ka-partner ti Department of Agriculture (DA) iti intero a pagilian a maikkan ti Corn Quality Awards. Dadduma pay a panggepna ket dagiti sumaganad:  1. Share information and update of best farm practices; 2. Showcase modern farm equipment and technologies; 3. ken forge market linkages ti mais. 

Kangrunaan pay a maummong dagiti Stakeholders ti industria ti mais tapno marekognisar/mapadayawan dagiti Top Performing LGU’s nga adda napintas a kontribusionna iti pannakaidur-as ti corn industry.

Tinarabay ti LGU-Cabugao ken ti OPAG-Ilocos Sur ni Mr. Sabio a nagatendar kadaytoy a panagtitipon/Congress. # (Web In-Action)

NABUTOSAN A KAPITANES TI 33 A BARANGAY, NAAMMUANEN

Cabugao, Ilocos Sur – Maibatay iti Proklamasion ti Commission on Elections-COMELEC Cabugao, sangapulo ket dua (12) nga agdama a Punong Barangay iti 33 a barangay ken maysa a kabarbaro a simmango a Kapitan  ti Munisipalidad ti Cabugao ti awan ti kinasangona iti naangay a Barangay Election idi Oktubre 28, 2013 iti ili ti Cabugao, Ilocos Sur.

Dagiti sumaganad a Kapitan nga awan ti kinabalubalna ket da Brgy. Captain Thaddeus U. Soller,  Rizal; Kapitan Edgardo S. Cobangbang, Sr., Sabang; Kapitan Bernardo A. Salom, Lipit; Kapitan Ruben S. Siruno, Sisim; Kapitan Geogie R. Benavidez, Maradodon; Kapitan Mario C. Peralta, Nagsantaan, Kapitan Arnold V. Yangat, Pug-os; Kapitan Fermin  S. Sarinas, Bungro; Kapitan Ronel M. Zamora, Salapasap; Kapitan Edgardo  G. Sonido, Turod Patac;  Kapitan Charito S. Siruno, Cacadiran; Kapitan Dencio S. Sonido, Cuantacla ken ni Kapitan Virgilio S. Piros ti Sagayaden.

Dagiti kabarbaro a Kapitanes a nabutosan ket da Charles F. Garcia, Dardarat; Silvano N. Jacob, Bato; Rolando S. Savellano, Cuancabal; Patricio Satumba, Pila; Modesto C. Bringas, Nagsincaoan,; Carlos V. Sison, Baclig; Cesar S. Cabasug, Daclapan; Jimmy V. Pablico, Carusipan; Dencio S. Sonido, Cuantacla; ken Nida S. Braceros, Quezon.

Nailayon met iti maikadua a Termino dagiti Kapitanes ti Brgy. Catucdaan, Bonifacio, Salomague, Turod, Arnap, Cael-layan, Reppa-ac, Marga-ay, Aragan, Alina-ay ken Namruangan.

Manamnama nga agtakemda dagiti nabutosan a  33 a Kapitanes  iti  umay a Termino a panagserbida kadagiti kabarangayanda. # (Web In-Action)

GAPUANAN TI KAPATGAN TI CABUGAO DAYO

Cabugao, Ilocos Sur – Iti pannaki-amad ti Web in-Action idi Oktubre 26, 2013, imbatad ni Mr. Rudy Quileza, Treasurer, Cabugao Livestock Traders Association nga umuna ti sakripisio a maipakitada a puminpintas ti Cabugao Dayo sakbay dagiti kiddawenda.

Innayon ni Mr. Quileza nga iti ag-dua a tawenen ti Cabugao Dayo ket naipakitada a masustenerda  ti Sinabado nga aktibidadda a kaaldawan ti Dayo ken adda latta animales a maipan ditoy Dayo babaen kadagiti Koridor ken opisiales ti asosasion.

Isupusop pay ni Mr. Quileza nga agtultuloy a nabubun-as dagiti mai-dayo a kaaduanna ti magatang a maparti iti NISTC Public Market wenno iti kabangibang nga ili ket kankanayon met a nakaantabay da Municipal Livestock Coordinator Dr. Melvin G. Gastro, DVM ken ni Mr. Dante Naval, Municipal Meat Inspector kadagiti sumrek/mairuar nga animales uray met iti karne ti nuang, baka ken baboy iti Municipal Slaughterhouse.

Dagitoy nga aksion ken inisiatiba ket resulta ti sistematiko a pannakaimanehar dagitoy a pasilidad ti LGU-Cabugao babaen ti panangidaulo ni Mayor Edgardo “Ediboy” S. Cobangbang, Jr. tapno agtultuloy a mapasayaat ti serbisio a maipaay kadagiti umili a maserbian ti livestock industry. # (Web In-Action)

PANAGDALUS ITI MNR, TIMMULONG TI LGU PERSONNEL

Cabugao, Ilocos Sur – Sagudayen ti pammatigmaan ni Mayor Edgardo “Ediboy” S. Cobangbang, Jr., timmulong dagiti empleado ti Local Government Unit (LGU)-Cabugao, Ilocos Sur a nanglinis ti agsumbangir nga abaga ti Kalsada Nasional (Main National Road) manipud iti Barangay Sagayaden agingga iti Barangay Pug-os, Cabugao, Ilocos Sur idi Oktubre 25, 2013 kas paset iti pannakaparegget ti Clean Drive Program  ti Munisipio kas pagtuladan ti amin nga asosasion iti barangay, Poblasion ken iti nadumaduma a sektor iti Munisipalidad.

Nangrugi ti panaggaik iti Main National Road (MNR) iti oras ti alas tres (3Pm) ken nagpatingga iti oras ti alas singko ti malem (5Pm) babaen iti panagkaykaysa dagiti empleado iti amin a Departamento ti LGU-Cabugao.

Manamnama a babaen iti kastoy a wagas a panangipasimudaag ti pateg ti panagdaldalus ket agtultuloy a  komplementaran dagiti umili agsipud ta isuda met laeng ti maidayaw ken mabenepisiaran iti pannakaitandudo iti epektibo a sanitasion ti aglawlaw, segun ken ni MENRO Edgar S. Balangatan, AT. # (Web In-Action)

PANAGDALUS TI SEMENTERIO, NAARAMID

Cabugao, Ilocos Sur -  Naigannuat ti panagdalus iti sementerio babaen ti grupo ti Clean and Green Program ti Munisipio nga idauluan da MENRO Edgar S. Balangatan ken ni Mr. Richard Pula partikular iti Municipal Cemetery iti Sitio Benneg, Brgy. Cuancabal, Cabugao, Ilocos Sur iti kalawasan sakbay ti pannakaselebrar ti Todos Los Santos inton Nobiembre 1, 2013.

Iti pannakiuman ti Web In-Action itay nabiit, imbatad ni MENRO Balangatan a tinawen nga ar-aramidenda daytoy tapno maragsakan met dagiti adda minatayna a sumarungkar kadagiti naitanem kadaytoy a kamposanto ti publiko.

Kabayatanna, makumikom met a napan nagdalus, nagpinta ken nag-repair dagiti umili nga adda minatayna kadagiti dadduma a sementerio kas iti Catholic Cemetery ken Iglesia Filipina Independiente Cemetery  kasta pay kadagiti pribado a sementerio.

Innayon ni MENRO Balangatan a naigameren iti tradision ken kultura ti sapasap a Filipino daytoy a panagselebrar kas pannangted ti respeto ken importansia kadagiti pimmanawen a patpatgen ti biag.

Insupusop pay ni Balangatan a parte daytoy a panagdalusda iti pannakaitandudo ti panagdaldalus tapno konbeniente met dagiti tao nagruna dagiti sumarungkar kadagiti nitso ken tanem dagiti patpatgenda iti biag sakbay ken iti kaaldawan ti Todos Los Santos. # (Web In-Action)

RN-HEALS, PARUPA TI SALUN-AT ITI 4 P’S

Cabugao, Ilocos Sur – Naaramid ti panaglektiur dagiti  kameng ti RN-Heals (Nurses a pinusgan ti DOH-MHO a mangited ti maikanatad nga impormasion) kadagiti kameng ti Pantawid Pamilyang Pilipino Program Members ti ili a Cabugao, Ilocos Sur.

Sakbayna, mapmapan dagitoy a Medical Personnel ti kada barangay ngem gapu ta adu latta ti di makaatendar maigapu iti nainkalintegan a rason ket pagtitiponenda dagiti saan a nakaatendar ti lektiur iti maysa nga eskediul  ket sangsangkamaysada nga maadalan ditoy Munisipio.

Naaramid ti Lecture ti salun-at idi Oktubre 24, 2013 iti Municipal Conference Building a no sadino a ditoy ket nagatendaran dagiti saan a nakaatendar iti barangay a nagrikusan dagiti RN-Heals. Kangrunaan a nayadal kadakuada ti Gabay sa Philhealth, pananglapped ti water-borne diseases kas iti diarrhea, gastroenteritis ken kanaigna a saksakit. Kangrunaanna ti panangyunay-unayda nga atendaranda dagiti medical session a kas itoy ket ipakitada dagiti annakda a mabenepisiaran ti 4 P’s tapno maipakita nga agtungtungpalda  iti sinaguday ti programa.

Manamnama nga iti agtultuloy a pannakaedukar dagiti pamilia a mabenepisiaran ti 4 P’s iti pakaseknan ti Nutrision ken salun-at ket maliklikan ti panagsaksakitda  ken tumulong a mangtiped iti Malnutrision iti ubbing iti Munisipalidad. # (Web In-Action)

COASTAL CLEAN-UP, AGTULTULOY A PROGRAMA TI LGU KEN BRGY.

Cabugao, Ilocos Sur – Naangay ti Coastal Clean-Up iti Barangay Salapasap, Cabugao, Ilocos Sur idi Oktubre 24, 2013 a no sadino a ditoy ket nagpartisipar dagiti bumarangay a pakabuklan ti nadumaduma a sektor kas iti 4 P,s, RIC, BNS/BHW’s, nga indauluan ni Brgy. Captain Ronel m. Zamora.

Imbagian met ni MENRO Edgar S. Balangatan, AT ti LGU-Cabugao ken adda pannakabagi ti Environment Natural Resources Management Office, Provincial Capitol, Vigan City, Ilocos Sur a nangimatang ti panagdalus dagiti lumugar iti igid ti baybay.

Kabayatanna, iti pannakiuman ti Web In-Action kadayta a petsa, imbatad ni MENRO Balangatan a saan laeng nga iti Brgy. Salapasap ti agdaldalus ti igid ti kabaybayanna a regular no di pay ket iti pito a Coastal barangays kas iti Brgy. Dardarat, Salomague, Sabang, Daclapan, Namruangan ken Pug-os. Idadauluan dagitoy dagiti opisiales ti barangayda a manguggor kadagiti kalugaranda a mapan agdalus ken agipakni ti balanet nangruna no lepleppas ti bagyo iti igid ti baybay. Daytoy nga obrada ket nairamanen  iti inaldaw a pagrebbenganda agsipud ta agnanaedda iti igid ti baybay. Adda eskediul ti tunggal asosasion/sektor nga agdalus ken adda pay dagiti tangtangdananda nga agdalus tapno mamantener ken agtultuloy a nadalus ti kabaybayanda, segun ken ni Kapitan Ronel M. Zamora.

Dagitoy nga aksion ken inisiatiba ket resulta ti napintas a pannakaiwardas ti panangpasayaat ti kabaybayan a katulongan iti panagbiag ken pagnanaedan metten ti dadduma nga umili ti Cabugao. Komkomplementaran met ti Munisipio dagitoy a rusuat babaen iti panangidaulo ni Mayor Edgardo “Ediboy” S.  Cobangbang, Jr. tapno agballigi ti programa a panangsaluad iti aglawlaw ken kabaybayan iti Munisipalidad. # (Web In-Action) 

BIOMASS GASIFICATION, NAINUT A PAGPUGON

Cabugao, Ilocos Sur – Inyawis ti National Tobacco Administration (NTA)-Vigan City a kaduana ti NTA-Sinait, Cabugao ken San Juan ti pannakaidemonstrar ti operasion ti Biomass Gasification, modelo ti kabaruanan nga urno ti tabako a pagoperaren ti koriente ken mapuoran a taep.

Daytoy nga imbension ket ididiaya ti Bluflame Technology, Angeles City, Pampanga kadagiti mannalon ti Tabako a Birhinia iti Ilocos Sur partikular iti Umuna a Distrito ti Ilocos Sur babaen ti panangiwanwan ti NTA.

Iti panagsarita ni Mr. Tomasito Taloza ti Cabugao NTA Area,  kayatda a maadaptar daytoy nga usaren dagiti mannalon ta nadiskubre sakbayna babaen iti naiwayat a panagadal ken aktual a pannakaipadasna nga epektibo a para kadagiti Tobacco Growers nangruna kadagiti lugar nga agkirkirangen ti pagsungrodda iti pugonda.

Innayon ni Mr. Taloza a malaksid a makatulong iti pannakaprotektar ti aglawlaw ta bumassit ti agusar ti kayo, maikabassit met ti magastos ti mannalon ken maingato ti matgedanna iti panagproduksionna iti dekalidad a bulong ti birhinia. Nagatendar dagiti mannalon ti tabako manipud iti  ili ti Sinait agingga iti Sto. Domingo, Ilocos Sur iti Demonstration Area idi Oktubre 24, 2013 iti solar ni Mr. Rolly Tabula iti Brgy. Arnap. Cabugao, Ilocos Sur a nakaipatakderan iti modelo nga urno.

Manmnama nga iti sumaruno a panagdemonstrarda ket makapagdesisionen  dagiti mannalon ti tabako no kayatda a padasen daytoy a wagas ti panagluto ti bulong ti birhinia ket maipaspasakbay iti umay a panagmumula ti tabako ta adda pay panawen a mainstolar daytoy a paglutuan.

Posible a makontak ni Mr. Tomasito Taloza, Cabugao NTA Office para iti dadduma a detalye ken pakabuklan ti proyekto nga inyendorso ti NTA-Vigan City. # (Web In-Action)

BARANGAY ELECTION 2013, PAIDASIG DAGITI AGTAKEM

Cabugao, Ilocos Sur – Maangay ti Barangay Election iti intero a pagilian  inton Oktubre 28, 2013 tapno mapili manen dagiti mangidaulo kadagiti barangay iti sumaruno a Termino  a katulongan ti Gobierno Lokal a mangakem iti pannakaipaay  dagiti serbisio kadagiti umili .

Mabutosan para iti puesto ti Punong Barangay ken pito a Barangay Kagawad a mangbukel ti Sangguniang Barangay iti maysa a barangay.

Iti ili a Cabugao, Ilocos Sur , segun iti Commission on Elections-COMELEC-Cabugao, addaan ti 33 a barangay a pakabuklan ti 79 a Numero ti  Presinto a pagbutosan ken dagup ti 23, 199 a registered voters.

Segun iti COMELEC, nangrugi ti campaign period dagiti kandidato idi Oktubre 18, 2013 ken agpatingga inton tengnga ti rabii ti Oktubre 26, 2013. # (Web Election Update) 

KAMPEON TI ZONE II ITI CABUGAO 2013 DISTRICT MEET

Cabugao, Ilocos Sur – Naballigi a naipatungpal ti 2013 Cabugao District Athletic  Meet  a nagsasalipan dagiti napili nga Atleta  iti uppat a Zona a pakabuklan ti 26 a pageskuelaan ti ili a Cabugao, Ilocos Sur idi Oktubre 21-22, 2013 idiay Namruangan E/S Athletic Ground, Brgy. Namruangan, Cabugao, Ilocos Sur.

Segun ken ni Mr. Ronel M. Ubaldo, PESS District Coordinator ti Cabugao DepED, dagiti sumaganad ti nangabak iti nasao a pakontes: Zone II (pakabuklan ti pageskuelaan ti Turod, Namruangan, Daclapan, Salomague, Dardarat ken Sabang)-Champion;  Zone 1-First Runner-up; Zone III - 2nd Runner-up ken Zone IV-3rd Runner-up.

14 iti 16 nga events ti napagsasalipan. # (Web In-Action)

NAGTURPOS ITI TRAINING, BINISITADA NI MAYOR EDIBOY

Cabugao, Ilocos Sur – Sakbay a nagatendar dagiti 29 a Taga-Cabugao a mapan agatendar ti panagturposda iti Paoay, Ilocos Norte, dimmagasda iti Opisina ni Mayor Edgardo “Ediboy” S. Cobangbang, Jr. tapno ipadamagda iti naballigi a  panangawatda iti Certificate of Training in Mushroom Production (Produce Vegetables-Mushroom Culture)  nga ipaay ti Technical Education and  Skills in Development Authority (TESDA)Region 01.

Buklen dagiti Graduates ti Training iti 4-H Club Members, RIC, Farmer ken dua nga Agricultural Technologist ti delegasion ti Cabugao a napan nagatendar iti graduasion. Impaayan ti LGU-Cabugao iti tulong ti naglugananda a napan iti Paoay, Ilocos Norte idi Oktubre 22, 2013.

Ti Mass Graduation a napasamak idiay Paoay, Ilocos Norte ket inatendaran ti lima a batches ti nag-training iti Mushroom Production manipud Enero-Abril 2013 a naggapu iti Ilocos Sur ken Ilocos Norte.

Daytoy a Training ket isayangkat ti DA-RFU 1, San Fernando City ken ti  TESDA-Region 01 babaen met laeng ti pannakikammayet ti LGU-Cabugao nga idauluan ni Mayor Ediboy.

Manamnama nga iti pannakagun-odda ti adal maipapan iti umisu a panagpatanor ti hybrid nga uong ket agsaknap ti inadalda ken makatulong kadakuada  ket maysa nga aspeto manen a makaital-o  iti panagbiag dagiti umili, segun ken ni Mrs. Joenah G. Sevilleja, AT, pannakabagi ti DA-LGU Cabugao a nangidaulo ti delegasion.

Nagatendar met da Kagawad Benigno Piros ti Brgy. Rizal, Mrs. Ester P. Aguimbag ti DA-LGU Cabugao ken ni Mrs. Susan Cabasug, Presidente ti RIC ti Brgy. Baclig. # (Web In-Action)

CSO ASSEMBLY, NAANGAY

Cabugao, Ilocos Sur – Naangay ti 2-Day Civil Society Assembly a tinarawidwidan ni MLG Officer Connie L. Quinola kas sagudayen ti pammilin ti Department of the Interior and Local Government (DILG).

Daytoy a panagtitipon ket inatendaran  dagiti nadumaduma a sektor ti kagimongan nga adda iti kategoria ken salinong ti CSO a sagudayen ti Local Poverty Reduction Action Team (LPRAT) a nabukel iti Munisipalidad. Daytoy a gannuat ti DILG ket naituding a maaramid iti bulan ti Oktubre 2013 sagudayen ti Bottom-Up Budgeting (BUB) a pakabuklan ti programa. Naangay ti CSO Assembly idi Oktubre 17-18, 2013 iti Municipal Conference Building.

Iti dua nga aldaw a seminar, nagrikus ti saritaan iti Orientation, Election of LPRAT, Reporting of the Approved Lists of  2013 BUB ti ili, Projects and Their Status of Implementation, Poverty Situation  Analysis, Workshop on the Objective/Solution Tree ken Reporting for the Workshop Groups.

Nakikaysa met ni Mayor Edgardo “Ediboy” S. Cobangbbang, Jr. kadaytoy a panagtitipon  ket binigbigna daytoy a maysa nga addang a mangpalag-an ti kasasaad dagiti marigrigat a benneg ti kagimongan maigapu iti sabali nga aspeto ti programa ti Gobierno Nasional a tumulong kadagiti  marigrigat a sektor.

Innayon ni Mayor Ediboy a dagiti natakuatan a mainayon a pagkasapulan dagiti umili ket kasapulan met iti napigsa a partisipasion dagiti maseknan  a makikammayet iti naregget a  pannakaipatungpal daytoy a programa tapno agballigi iti masanguanan. # (Web In –Action) 

BFAR, PINADAYAWANNA TI LGU-CABUGAO

Cabugao, Ilocos Sur – Mismo a ni Mayor Edgardo S. Cobangbang, Jr. ti nangiyawat ti Plake ti Pammadayaw ken ni Mrs. Milagros R. Paz, Municipal Fisheries Coordinator babaen iti partena a nakitinnulong iti naballigi a pannakaisaknap ti proyekto ken programa ti Bureau of Fisheries and Aquatic Resources (BFAR)  para iti pagsayaatan dagiti mangngalap iti ili a Cabugao, Ilocos Sur.

Naited ti pammadayaw kalpasan ti Flag Raising Ceremony iti imatang ti Pamilia-LGU idi Oktubre 21, 2013 iti sango ti Munisipio. Binayabay dagiti Municipal Officials ni Mayor Ediboy iti panangyawatda iti nadakamat a pammadayaw.

Napetsaan ti Tanda ti pammadayaw iti Oktubre 18, 2013 iti naaramid a selebrasion ti “Linggo ng Pangisdaan” iti maika-50 a Tawen ti BFAR a kas maysa kadagiti sanga ti Departamento ti Agrikultura (DA). Indauluan ni BFAR Regional Director Nestor Domenden, CESO V dayta nga okasion idiay San Fernando City, La Union.

Kabayatanna, iti dayta met la a pannakapadayaw ni Mrs. Paz, inawat met ti LGU-Cabugao ti maysa pay a Plake ti Pammadayaw iti nakaysa a pannakigamulona kadagiti programa ken proyekto ti BFAR a maipaay iti pagsayaatan dagiti mangngalap iti ili a Cabugao, Ilocos Sur. Inawat ni Mayor Ediboy ti Tanda ti pammadayaw  iti imatang ti Pamilia-LGU ken binayabay met laeng dagiti kameng ti Sangguniang Bayan nga idauluan ni Vice Mayor Deogracias Jose H. Savellano nga adda iti dayta a gundaway.

Dagitoy a pammadayaw ket gubuay iti agtultuloy a pannakikammayet ti LGU-Cabugao iti BFAR tapno masungbatan ken maited dagiti kasapulan ken pakaseknan iti amin a mangngalap iti Cabugao, Ilocos Sur. # (Web In-Action)

KAYATANDA NGA IMULA TI NSIC RC 240

Cabugao, Ilocos Sur – Iti pannaki-amad ti Web In-Action ken ni Mr. Obas Bill Y. Baclig, Municipal Seed Inspector itay nabiit, imbatadna a ti NSIC Rc 240 ti kadakkelan ti produksion iti amin a klase ti high yielding varieties a naimula iti Wet Season 2013 (Hunio-Nobiembre) kadagiti mannalon a nagmula ti Hybrid Rice iti Munisipalidad ti Cabugao.

Innayon ni Mr. Baclig nga immapit ti NSIC Rc 240 iti 7.2 Tonelada iti maysa nga ektaria idinto ta simmarsaruno ti NSIC Rc 222-6.8 Ton/Ha.; PSB Rc 82-5.4 Ton /Ha.; NSIC Rc 192, St. row- 5 Ton/Ha. ken ti NSIC Rc 192, Waray-4.6. Ton/Ha.

Kabayatanna, ti NSIC Rc 240 ti napili ita dagiti kaaduan nga agraraep iti 2nd Crop (Nobiembre 2013-Marso 2014) ta nagdidinnamagan iti napintas a takderna ken adu a dawa ti impaayna kadagiti mannalon. Daytoy  a variety ket isu ti agdama a mairaraep kadagiti pagtatalonan iti Barangay Turod a ditoy ti kaunaan nga agmulmula ti pagay ken kasapaan nga agapit iti tunggal Cropping Season, segun iti Municipal Seed Inspector. # (Web In-Action)

2013 DISTRICT ATHLETIC MEET, NAANGAY

Cabugao, Ilocos Sur – Manamnama a maileppas iti dua nga aldaw ti 2013 Cabugao District Athletic Meet (Oktubre 21-22, 2013) a maang-angay iti Namruangan Elementary School, Cabugao, Ilocos Sur.

Iti pannakiuman ti Web In-Action ken ni Mr. Ronel M. Ubaldo idi Oktubre 21, 2013, Head Teacher III, Salomague Elementary School, ken agdama a  DepED District PESS Coordinator idi Oktubre 21, 2013, impakaammona nga  uppat a sona dagiti agsasalip a buklen dagiti sumaganad:

Zone 1- dagiti pageskuelaan ti Pug-os, Reppa-ac, Nagsantaan, Salapasap, Bungro, Margaay ken ti Cabugao North CS;  Zone 2- dagiti pageskuelaan ti Turod, Namruangan, Daclapan, Salomague, Dardarat ken Sabang;  Zone 3- Cabugao South CS, Sagayaden, Pila, Nagsincaoan ken Lipit;  Zone 4 – dagiti pageskuelaan ti Maradodon, Catucdaan, Sisim, Cael-layan, Cuantacla, Aragan, Arnap ken Carusipan.

Innayon ni Mr. Ubaldo a buklen met  dagiti Honorable Officials a naikammayet iti nasao a pasalip ket da da Mayor Edgardo S. Cobangbang, Jr.; Vice Mayor Deogracias  Jose H. Savellano; SBM Dr. Jemaima S. Tan-Yee, Committee Chair on Education ken ni Mr. Maxfel S. Suboc, Cabugao Federated PTA President. 

Buklen met dagiti mangisursuro dagiti Officials of the Meet babaen kadagiti nadumaduma a pagrebbengan iti pannakaipatungpal ti dua nga aldaw a pay-ayam nga idauluan ni Mrs. Estrellita M. Siruno, Principal, Cabugao North  Central School ken OIC District Supervisor. # (Web In-Action)

FIELD DAY, INANGAY TI DUA NGA FFS AREA

Cabugao, Ilocos Sur – Naangay ti Field Day and Graduation ti Season-Long  Farmers Field School (FFS)  ti Brgy. Dardarat, Cabugao, Ilocos Sur  idi Oktubre 18, 2013 a no sadino a ditoy ket nagturpos ti 21 a kameng ti Dardarat Farmer’s Association nga idauluan ni Mr. Fermin Sesuca, Presidente. Sakbay ti panagturposda, ket naangay ti Crop Cut wenno pannakapatta-patta no mano ti bulto nga apiten ti 5,000 metro-kuadrado a Learning Field-da iti nasao a barangay a pagbasaran iti pannakaadaptar ti programa kadagiti mannalon ditoy a lugar.

Umuna a parte ti aktibidad iti dayta a petsa  ket iti  naaramid a Field Tour sakbay ti naaramid a programa.

Nagatendar iti nasao a panagturpos dagiti mannalon da  Vice Mayor Deogracias Jose H. Savellano ken ni SBM Benedicto M. Savellano, Committee Chair on Agriculture. Dinayaw ti Bise Mayor ken ti Committee Chairman ti Agriculture  iti kinatunos dagiti mannalon a mangyagpang ti kaammuanda iti teknolohia a mangpaadu ti apit ken mangikabassit iti magastos iti panagtalon a mabalin a tuladen ti sapasap a mannalon.

Nakikaysa met dagiti Opisiales ti Barangay Dardarat, Office of the Provincial Office (OPAG)-Ilocos Sur, ken dagiti pannakabagi ti DA-Regional Field Unit 1, San Fernando City La Union.

Kangrunaan a nakabuklan ti programa ket iti Presentation of Result of the Study, Presentation of Graduates, Confirmation of Graduates, Acceptance of Graduates ken Awarding of Certificates and Recognition of Outstanding Performance kadagiti Honored Guests.

Kamalman dayta a petsa, naaramid met laeng iti kas iti napasamak iti Barangay Dardarat a Field Day a  panagturpos dagiti Farmers-Beneficiaries ti FFS iti Barangay Repp-ac, Cabugao, Ilocos Sur a nagturposan ti  40 a mannalon nga idauluan ni Kagawad Edward C. Castillo, Presidente iti nasao a barangay. Inatendaran met laeng dagiti Opisiales ti nasao a  Barangay, DA-LGU Cabugao, OPAG-Ilocos Sur ken ti DA-RFU 1.

Panggep dagitoy a programa a naisayangkat babaen ti panagbinnulig ti LGU-Cabugao, OPAG-Ilocos Sur  ken ti DA-RFU 1 ket iti pannakaipaadu ti maapit iti Rainfed Area babaen iti pannakaipakat dagiti Moderno a Wagas ken  Teknolohia iti panagpatanor ti pagay a saklawenna iti intero a Rehion Uno. Tinawen a mapasamak daytoy a proyekto iti ili a Cabugao, Ilocos Sur ket naballigi amin  ti nagbanagan dagiti nayusuat a programa ti LGU-Cabugao nga idauluan ni Mayor Edgardo "Ediboy" S. Cobangbang, Jr.,  ti Agricultural Training Institute (ATI)  ken iti DA iti napalabas a tawen. # (Web In-Action)

TI PROYEKTO TI DA ITI BRGY.SABANG

Cabugao, Ilocos Sur - Nairingpasen a nakongkreto ti Kalsada ti Daclapan-Sabang Road a proyekto ti Departamento ti Agrikultura (DA) nga impatungpal ti DPWH District Engineering Office 1, Bantay, Ilocos Sur.

Kabayatanna, madama  pay a mains-instolar dagiti solar lights  iti masungad ken katengngaan ti kalsada tapno nalawag ti panagdaliasat dagiti bumarangay ken pumasiar a Turista iti maibilbilang a Tourist Destination ti Barangay Sabang. Dagitoy a silaw ket impaay kabayatan ti Termino ni agdama a Gobernador Ryan Luis V. Singson a Diputado iti Umuna a Distrito ti Ilocos Sur.

Iti pannakapasayaat ti Kalsada a komunektar ditoy a barangay iti kabangibangna a barangay  ket manamnama a manam-ayan dagiti mannalon ken mangngalap a mangibiahe iti apit ken makalapanda kasta met iti papanda iti Poblasion iti nadaras a panagdaliasatda iti nalinis ken nasimpa a dalanda iti agdama.

Ti Barangay Sabang ket idauluan ni Brgy. Captain Edgardo S. Cobangbang, Sr. (Web In-Action)