Cabugao, Ilocos Sur – Naaramid itay nabiit ti panagbisita ti Joint Inspection Team a buklen ti Market Supervisor (NISTC), MENRO-LGU Cabugao ken ti Sanitary Inspector tapno matingiting iti pagdurdur-asan ti sanitasion iti Merkado Publiko ti ili.
Iti pannakiuman ti Web In-Action idi Oktubre 3, 2013, imbatad ni Mrs. Norma Z. Bertumen a kaduada dagiti aglaklako a nangamiris kadagiti disso ken suli ti pagtagilakuan a rebbengna a regular a madalusan ken mamantener. Kaduana da Sanitary Inspector Jeanette Garcia ken ni MENRO Edgar S. Balangatan, AT a nagrekurida iti uneg ti tiendaan a kinagiddan ti pannakisaritada kadagiti aglaklako iti pateg ti kinadalus iti pagtagilakuan.
Innayon ni Mrs. Bertumen a kinasaritada pay dagiti Food Handlers iti amin a paglakuan ti makan iti uneg ken suli ti Tiendaan a mangrugi iti Tawen 2014, mairamanton a rekititos ti panangitedda ti Medical Certificate wenno X-ray Result iti sakadaenda a Municipal Sanitary Permit tapno maipasingked ti sanitasion iti benneg dagiti paglakuan ti makan iti Tiendaan.
Dagitoy mga aksion ken inisiatiba ket resulta ti napintas a panangikalikagum ti Gobierno Munisipal iti panangidaulo ni Mayor Edgardo “Ediboy” S. Cobangbang, Jr. iti agtultuloy a pannakamantener ti Sanitasion iti amin nga aspeto ti Tiendaan tapno natalged ti salun-at ti sapasap nga aggatang. # (Web In-Action)
No comments:
Post a Comment