YOUNG PUBLIC SERVANT, NAGSAPATADA

Cabugao, Ilocos Sur – Nagsapata dagiti napili a Young Public Servant (mangrugi ti Titulo ti Mayor, Bise Mayor ken saad iti Sangguniang Bayan agraman dagiti Ahensia a nakasalinong iti LGU-Cabugao  agingga iti Department Heads ti nadumaduma nga Opisina ti LGU-Cabugao) ken ni Mayor Edgardo “Ediboy” S. Cobangbang, Jr. ita nga Oktubre 14, 2013 kalpasan ti Flag Raising Ceremony iti imatang ti Pamilia-LGU Cabugao iti sango ti Munisipio.

Nagpaay a Facilitator ni Mr. Dario Roy A. Siruno, Municipal Information Officer a nangipakaammo daytoy nga aktibidad ket inawaganna dagiti nagan ti napili a Public Young Servant kadagiti nadumaduma a  pageskuelaan ti ili ti Cabugao para iti Opisina ti Mayor, Bise Mayor agingga iti Sangguniang Bayan. Pinagsapata ida ni Mayor Ediboy iti imatang ti Pamilia-LGU.

CLICK HERE TO VIEW MORE PHOTOS

Naisaganad ti panagsapata dagiti Young Public Servants a kaasmangda ti tunggal  Department Head a pakaidestinuanda. Ni met laeng Mayor Ediboy ti namagsapata kadakuada.

Iti Mensahe ni Mayor Ediboy, kimmablaaw ken nagyaman ta naipatungpal manen daytoy nga aktibidad iti Munisipio-pannakaited ti pagrebbengan kadagiti ubbing nga agad-adal a mangakem kadagiti responsibilidad dagiti Opisiales Lokal ken dadaulo ti nadumaduma nga Opisina ti LGU iti naituding a panawen.

Innayon ni Mayor Ediboy ken maragsakan kadaytoy a maar-aramid ta iti kinaganus ti isip dagitoy nga ubbing nga addaan ti potensial nga agbalin a lider ket masirmata  ti amin nga agtultuloy ti kinaurnos ken kinapintas ti ili a Cabugao iti masanguanan nga aldaw gapu ta matubtubaydan dagiti sumaruno a lideres nga umallawat iti masakbayan  a henerasion ti umili.

Insupusop ti Ama ti Ili a dagitoy nga ubbing ket mataliawdanto dagitoy a pannakaikumit ti pagrebbengan kadakuada ket aramidendanto met dagiti umisu a galad ken pagrebbengan para iti nadurdur-as ken napintas a pagnaedan nga ili ti Cabugao.

Kinarit ti Alkalde Munisipal dagitoy a Public Young Servant nga ipakitada ti panangibiagda ti naikumit kadakuada a pagrebbengan a  mangrugi iti daytoy a petsa a panagsapatada iti akemda. # (Web In-Action)

CLICK HERE TO VIEW MORE PICTURES