Cabugao, Ilocos Sur – Naaramid ti panagselebrar dagiti kameng ti Cabugao Federated Senior Citizens Association maipapan iti Elderly Filipino Week Celebration in Collaboration with Philhealth idi Oktubre 8, 2013 iti Cabugao Cultural and Sports Complex, Brgy. Rizal, Cabugao, Ilocos Sur.
Immuna a naangay ti Nasantuan a Misa iti St. Mark the Evangelist Parish Church sa naaramid ti programa iti Complex. Indauluan ni Dr. Romeo Pira, Spiritual Adviser ti Invocation.
Iti Welcome Talk, inawis ni Mrs. Constancia Sonido ti amin nga umili a mangimatang iti naregget a pannakipaset dagiti nataengan iti kagimongan babaen kadaytoy a selebrasion.
Impaay ni Mrs. Lydia S. Gazmen, MSWD Officer ti Overview of the Activity. Dinakamatna ti pateg daytoy a sektor nga inikkan ti importansia ti Gobierno kadagiti pribilehio ken karbengan agsipud ta isuda ket paset ti pundasion ti napintas a kagimongan iti agdama a henerasion.
Iti Mensahe ni Mayor Edgardo “Ediboy” S. Cobangbang, Jr., kimmablaaw ken nagyaman ti Ama ti ili iti isasangpet daytoy a programa a mangpalag-an ti kasasaad dagiti nataengan. Dinayaw ti Alkalde ti pannakaammo metten dagiti nataengan a mangtunton ti pribilehio a kaibatoganda ken iti panagdinamag iti sabali nga ili a ditoy Cabugao ket maibilbilang a First Class Citizen dagiti nataengan. Innayonna a maibilang a sanggir iti agdama ken iti masakbayan ti Cabugao dagiti nataengan ket rebbengna laeng a maikkanda iti pannakaasikaso ken pagnam-ayan.
Nangipaay met ti inspirational message ni Vice Mayor Deogracias Jose H. Savellano kadagiti nataengan.
Nagsarita met ni SBM Dr. Carlito S. Pano, Committee Chair on Social Services ket dinakamatna ti panangbigbig ti Konseho Munisipal dagitoy a panangsuportar kadagiti nataengan kas pasetda iti pannakatulong ti Gobierno Nasional ken Lokal kadakuada.
Nangipaay met ti Mensahe da Retired Judge Efren S. Ubungen ket dinakamatna nga uray kaskasano ket makatulongda pay laeng a nataengan iti panagsayaat ti komunidadda ken ti ilida.
Binagi met ni Dr. Bernardino M. De Gracia, OIC-MHO Cabugao nga imbislin ti Caring for the Elderly a pakaseknan unay dagiti annuroten ti salun-at dagiti nataengan tapno pumaut pay ti panangnanamda ti biagda.
Naangay ti symposium maipapan kadagiti pakaseknan/karbengan dagiti nataengan iti Philhealth. Nagsarita ni Mr. Francis Canosa, SIO II, OIC Philhealth-Ilocos Sur maipapan iti Philhealth Service Package to Senior Citizens. Dinakamat pay ti Philhealth Officer a mangrugi nga adda agopisina a Taga-Philhealth ditoy Munisipio ti Cabugao tapno matarabay dagiti kameng a ditoy Cabugao iti kaaduan (113%) ti Philhealth Enrollees iti intero a probinsia babaen iti nasaknap ken sapasap a panangesponsor ti LGU-Cabugao nga idauluan ni Mayor Ediboy.
Nairaman ti panagsapata dagiti kabarbaro nga Opisiales nga idauluan ni Mr. Bonifacio Somera, Presidente ken ni Mayor Ediboy.
Nagyaman met ni Presidente Bonifacio Somera kadagiti amin a timmalantan iti kamaudianan ti programa ken ti naballigi nga okasionda a nataengan.
Nakikaysa met da SBM Danny Q. Gazmen, SBM Benedict M. Savellano, SBM Josefina S. Vallejo ken ni Mr. Remigio B. Sunico, OSCA Head ti Senior Citizens.
Nagpaay nga Emcee ni Mr. Dario Roy A. Siruno, Municipal Information Officer. # (Web In-Action)
No comments:
Post a Comment