Cabugao, Ilocos Sur – Agtultuloy ti nasayud a transaksion iti Cabugao Dayo iti kaaldawanna ti Sabado ket nalalapsat latta dagiti maidayo a baka ken nuang agraman dagiti baboy a kaaduanna ti malako a maparti ken adu pay ti aggapu iti sabali nga ili nga umay aggatang iti partienda iti Tiendaanda.
Iti pannakiamad ti Web In-Action idi Oktubre 12, 2013, imbatad ni Dr. Melvin G. Castro, DVM, Municipal Livestock Coordinator ken agak-akem a Municipal Meat Inspector nga awan ti pakaproblemaanda iti salun-at dagiti maiserrek a mailako nga animales iti Dayo kasta met dagiti maparti a mailako iti Tiendaan (NISTC Public Market) nangruna iti aldaw ti Domingo.
Innayon ni Dr. Castro nga awan pay ti napasamak a naiserrek a lako a karne a di aglasat nga umuna kadakuada.
Kabayatanna, iti pannakiamad ti Web In-Action kadagiti aglaklako iti naangkat a karne iti Tiendaan, impakaammo dagiti Tindera nga aggapu met la ti ilakoda a karne kadagiti nagparti iti Slaughterhouse. Kayatda laeng met iti kumita bassit isu nga angkatenda ti naiw-iwan nga ilakoda ta daytoy met ti gagangayda a pagsapulan a pangalaanda ti nayon ti matgedanda.
Insupusop ni Dr. Castro nga uray dagiti agang-angkat ti karne ket kanayonna a bisitaen iti paglakuanda ken palpalagipanna ida kadagiti pagannurotan ti NISTC Public Market ken agtultuloy a sanitasion iti Tiendaan a pagsayaatan met laeng iti sapasap. # (Web In-Action)
No comments:
Post a Comment