ZONE MEET, NAANGAY ITI UPPAT A VENUE

Cabugao, Ilocos Sur – Naangay ti Zone Meet iti uppat a  Sona ti pageskuelaan  ti Cabugao DepED District idi Oktubre 3, 2013.

Dagiti disso ti pageskuelaan a nakaangayan ti sport selection ket iti sumaganad: Zone 1, Bungro Elementary School, Brgy. Bungro, Cabugao, Ilocos Sur;  Zone II,  Salomague Elementary School, Brgy. Salomague, Cabugao, Ilocos Sur; Zone  III, Lipit Elementary School, Brgy. Lipit, Cabugao, Ilocos Sur ken ti Zone IV, Sisim Elementary School, Brgy. Sisim, Cabugao, Ilocos Sur.

Dagiti sports events a napartisiparan dagiti nakapilian dagiti atleta nga agsasalipto  para iti District Meet ket iti Baseball/Softball; Volleyball; Badminton; Football; Table Tennis; Chess;  Athletics ken Scrabble.

Nagpaay nga Officiating Officials dagiti mangisursuro/dadaulo  kadagiti pagadalan a masakupan ti tunggal sona.

Naaramid ti ababa a programa sakbay a naigannuat daytoy nga sports activity ti DepED. Naiyawat dagiti Sports Gadgets nga immuna  nga inted ni Mayor Edgardo “Ediboy” S. Cobangbang, Jr. kadagiti atleta iti Munisipio. Imbagian ni SBM Dr. Jemaima S. Tan-Yee, Committee Chair on Educatuion  (kaduana ni SBM Josefina S. Vallejo)  ni Mayor Ediboy a nangiyallawat kadagiti sports gadget kadagiti ubbing iti disso ti pagay-ayamanda iti dayta nga aldaw ti Zone Meet (Oktubre 3, 2013).

Nangipaay ti Inspirational Message dagiti Opisiales ti Cabugao DepED nga idauluan ni Mrs. Estrellita M. Siruno, Principal II, Cabugao North Central School ken OIC District Supervisor kasta met iti benneg dagiti Local Officials a nagatendar iti nasao a panagtitipon.

Naibasa  pay ti Athletic Oath sakbay a naaramid ti Proclamation of the Formal Opening of the Meet.

Narugian  ti Competition Proper iti maikadua a parte ti aktibidad. Naaramid pay ti Post Conference dagiti nangtarawidwid iti nadakamat a pay-ayam kalpasanna.

Ti Zone Meet ket naituding a pakaangayan a pangipakitaan  ti kabaelan dagiti ubbing nga adda potensialna iti panagay-ayam iti nadumaduma nga sports events iti las-ud ti napagtitipon a pagadalan. Dagitoyto  ti mangibagi iti maangay a District Meet iti Cabugao DepED ken iti nangatngato a tukad wenno agpang ti pagsasalipan dagiti agad-adal iti elementaria.

Kangrunaan a mangtartarawidwid kadagiti mapasamak nga sports activities iti Cabugao DepED ni Mr. Ronel M. Ubaldo, Head Teacher III, Salomague E/S ken agdama a District PESS Coordinator.  # (Web In-Action)