Cabugao, Ilocos Sur – Kanigid-kanawan ita iti pannakaideseminar dagiti praktikal a wagas a panglapped iti water-borne diseases a pakaibilangan ti Dengue, Typhoid Fever, Gastroenteritis ken Leptospirosis.
Daytoy ti kangrunaan nga akem ita dagiti Medical Personnel iti RHU-MHO nga idauluan ni Dr. Bernardino M. De Gracia, Medical Officer III, OIC-Municipal Health Office, Cabugao, Ilocos Sur. Malaksid iti panangipakaammoda kadagiti umay nga agpaagas iti RHU, maiyallawat pay ti padamag kadagiti sanga ti DOH iti Barangay kas iti Team Kalusugan Pangkalahatan, Health Care-4 P’s a tartarawidwidan dagiti RN Heals kadagiti barangay.
Maibatay kadagiti pakaammo iti pananglapped kadagitoy nga agraraira a sakit ita a bulan ket maaramid koma iti naan-anay a panagdaldalus iti arubayan ken amin a disso a paggargarawan ti indibidual ken grupo ken dagdagusen ti mapan agparikna iti RHU no adda tumaud a madi a rikriknaen ta adda madagdagus nga agtaming a Personnel ken adda maited a mainugot nga agas.
Dagitoy nga aksion ken inisiatiba ket resulta ti nakammayet a panagtutunos dagiti maseknan nga Ahensia ken grupo tapno maimpormaran dagiti umili nangruna iti barangay kadagiti pettat ti itataudna a saksakit. # (Web In-Action)
No comments:
Post a Comment