Cabugao, Ilocos Sur – Naluktan ti 2014 Cabugao Basketball Tournament idi Abril 20, 2014 babaen iti Parada a naaramid iti aglikmut ti Poblasion a nagpartisiparan dagiti Basketball Players iti nadumaduma a Barangay, Coaches, Games Officials ken Marching Band ti Cabugao Institute, Cabugao North Central School ken ti Cabugao South Central School a nangrugi ken nagsubli ti Parada iti Cabugao Cultural and Sports Complex, Brgy. Rizal, Cabugao, Ilocos Sur a disso ti pagdidinnayoan.
Iti Opening Program, indauluan ni Brgy. Captain Nida S. Braceros ti Brgy. Quezon iti Invocation ken natokar ti Musika ti Pambansang Awit ken Cabugao Hymn babaen kadagiti Marching Band.
Simmaruno ti Welcome Remarks ni Vice Mayor Deogracias Jose Victorino “DJ” H. Savellano ket inawisna ti imatang dagiti umili a mangbuya kadaytoy a kangrunaan a parang/pagteng ti sports nga aramiden dagiti umaayam iti barangay.
Innayon ni Vice Mayor DJ a daytoy a paay-ayam ti LGU-Cabugao ket panggepna nga ital-o ti bileg ti sports, napintas a panaglalangen, kooperasion, panagkaykaysa a kangrunaan a timon iti agtultuloy a kinaragsak ken panagprogreso dagiti umili ti Cabugao.
Imbasa met ni Mr. Kevin Somera, pannakabagi ti Office of the Mayor ti Tournament Guidelines.
Naisaganad ti panangited ni Mayor Edgardo “Ediboy” S. Cobangbang, Jr. ti Mensahena kadagiti agsasalip.
Kimmablaaw ken nagyaman ni Mayor Ediboy kadagiti agsasalip ken kasta met kadagiti amin a naitaripnong iti Sports Complex.
Immuna nga inawagan ti Ama ti Ili ti delegasion ti tunggal barangay. Imbinsa ni Mayor Ediboy ti pateg ti partisipasion dagiti agtutubo iti pannakairubuat dagiti aktibidades a mangparagsak iti panagpiesta ti ili.
Impeksa pay ni Mayor Ediboy ti ragsakda nga Opisiales ti ili nga iti mabuybuyada a tunos dagiti agtutubo ket maisarming dagiti tagipatgen a kaugalian ti umili iti Cabugao ket maiyallatiwto met kadakuada iti respeto nga agbalin a lideres iti masanguanan nga aldaw.
Ingunamgunamna iti pannakamantener koma ti sportsmanship ken napinpintas koma manen ti gapuanan dagiti umaayam para itoy a torneo manipud iti kallabes a pasalip. Binigbig pay ti Alkalde Munisipal iti inisiatiba dagiti agpartisipar kadagiti aktibidades nga igangannuatda a mangpasayat iti sektorda a pakaidayawan met ti umili.
Naibasa ti Oath of Sportsmanship iti kaaduan. Kalpasanna, naaramid ti Ceremonial Toss iti nagbaetan dagiti Basketball Players ti Brgy. Pug-os ken ti Brgy. Bonifacio babaen ken ni Mayor Ediboy a binayabay ni Vice Mayor DJ nga inimatangan dagiti kaduana nga Opisiales ti LGU-Cabugao ken Kakapitanes a naitaripnong ken kasta pay iti sapasap a nagbuya iti uneg ti Sports Complex.
Nakikaysa met dagiti Kapitanes ti Barangay a naitallaong nga idauluan ni ABC President, Brgy. Captain Thaddeus “Teddy” U. Soller.
Nag-Emcee ni Mr. Dario Roy Siruno ti LGU-Cabugao. # (Web In-Action)
No comments:
Post a Comment