Friday, April 11, 2014

PANAGDALUS ITI IGID TI KABAYBAYAN, AGTULTULOY

Cabugao, Ilocos Sur – Tumultulong ti grupo ti Clean and Green Program  ti Munisipio nga agdalus kadagiti igid ti kabaybayan babaen iti agtultuloy a panangmonitor ken  panangilungalong da  MENRO Edgar S. Balangatan, AT, ken ni Mrs. Milagros R. Paz, Municipal Fisheries Coordinator, agak-akemda  a dadaulo ti grupoda, kadagiti Barangay Officials ken dadaulo ti Fishermen Associations kadagita a lugar  kalpasan a maiwakasda iti agsumbangir ti National Highway manipud iti Brgy. Sagayaden nga  agpatingga iti Brgy. Pug-os. Agtultuloy latta met ti itutulong dagiti pannakabagi ti  Maintenance Section ti DPWH District Office-Bantay, Ilocos Sur nga agdalus iti igid ti kalsada ken kadagiti rugit a maiwara kadagiti rangtay iti Kalsada Nasional.

Innayon ni MENRO Balangatan nga agtultuloy a  monmonitorenda iti Cleanliness and Beautification dagiti pito a Coastal Barangays a kas iti Barangay Dardarat, Salomague, Sabang, Namruangan, Salapasap, Daclapan ken Pug-os  babaen iti pannakikammayetda kadagiti Opisiales ti barangay kadagitoy a lugar ken dadaulo ti mangngalap. Tumulongda pay a mangdalus  iti agsumbangir a paset ti National Highway iti agpa-Port Salomague ken kadagiti kalsada nga agturong kadagiti nalatak a Tourist Destinations ti ili a kas iti Barangay Sabang, Dardarat,  Salomague, Salapasap ken Pug-os tapno makatulongda pay  iti programa ti Munisipio a mangital-o iti Turismo.

Imbatad pay ni MENRO Balangatan a nagpinta dagiti mangngalap kadagiti Fishing Boats-da babaen iti Color Coding tapno makaay-ayo a  buyaen iti panagurnosda iti igid ti baybay no makasangladda.

Dagitoy nga aksion ken inisiatiba ket paset ti Direktiba ti Local Chief Executive ti ili  iti agtultuloy a pannakaipakat ti panagdaldalus ken panangpapintas  iti aglawlaw ti ili, iti parte ti kadandanuman  ken takdang,  a pagsayaatan ken pakairanudan met laeng iti sapasap ken panagsagana iti umadani a panagpiesta ti ili iti Cabugao inton Abril 23-26, 2014 a mangparagsak kadagiti umili/bisita  iti daytoy a Summer Vacation 2014. # (Web Situational Report)

No comments:

Post a Comment