Cabugao, Ilocos Sur – Naipatakderen ti Palay Shed a kaasmang ti Flatbed Dryer ti Bungro Farmer’s Association nga idauluan ni Mr. Edy L. Sevilleja, Presidente, iti dayaen ti nagdissuan ti Flatbed Dryer ti nasao nga Asosasion iti Barangay Bungro, Cabugao, Ilocos Sur.
Daytoy ket karaman iti nagun-od ti Bungro FA a Post-Harvest Facility manipud iti programa ti Department of Agriculture (DA)-Regional Field Office (RFO) 1, San Fernando City, La Union ken iti agtultuloy a pannakikammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr. iti Ahensia ti DA a babaen pay iti “Counterparting Scheme” iti Farm Mechanization Program ti DA ket napaadda dagiti kasapulan a makinaria/ramit a para kadagiti asosasion ti mannalon iti daytoy nga ili.
Segun ken ni Mr. Edy L. Sevilleja a sumayaat ita ti operasion ti Flatbed Dryer-da ta adda madadaan a pagipananda ti bilagenda a produktoda (pagay wenno mais) tapno nasigsigo ti panagpamagada a nakaisangratan daytoy a pasilidad.
Impeksa pay ni Mr. Sevilleja iti nalaus a panagyamanda ken dagiti kakaduana iti Asosasionda iti DA-RFO 1 ken iti LGU-Cabugao iti agtultuloy a tarabay ken suporta dagitoy nga Ahensia iti agtultuloy a pannakapataud kadagiti banag/ramit a pagnam-ayanda a mannalon iti barangayda ken kapada a sagsagrapen met itan dagiti dadduma nga Asosasion iti ili a Cabugao, Ilocos Sur. # (Web In-Action)
No comments:
Post a Comment